فاطمة الزهراء سخنات .. الصهدة طلعات معاها ..مالقات ماتقول ، ماكرهاتش تقجو لاكن علاااااش؟ علاااش تقجو ؟ ماشي هي اللي بغات تجي من الاول بوحدها ! اذا كانت ترجع بوحدها . الواجب دارو معاها كأي كليانة وكثر مع العلم ان اللي بغا يشوف شي سيارة كيجي ليها فطاكسي . سكتات كتفكر لقات الحق معاه . تبسمات بزز وقالت
فاتي : شكرا اسيدي
واءل : بابتسامة ) هادا واجب
حنا راسو ومشا دخل خلاها واقفة كدور بلاصتها .. تمشي ولا تبقا! تمشي اش غتبقا وفين تبقا ! خرجات من الباب غادية مع الشارع حتى للطاكسيات وركبات رجعات لاجونص هازة خنافرها .
فاتي: السلام ...
- وعليكم السلام مرحبا شفتي اللي عجبك ؟
فاتي: داكشي علاش جيت .
- مهم اجي وريها ليا هنا والى بغيتي تديها لشي تكنيسيان ولا تجيبيه ليها يقلبها ليك
قلبات عينيها كتنفخ وتمتم بوحدها
فاتي : تقلبها ليا مالي عنتزوج بيها! (دارت عندو) غير طلقني راه مسافرة وخاصني نديها معايا .
- اوك اجي وريني اينا وحدة
وقفات حداه كتشوف حتى بانت ليها وقال
فاتي : هادي .. شحال دايرة؟
- هادي 70000 درهم
فاتي: بزاااف... شحال تبقى؟
بقات تجار معاه وتجابد حتى خلاها ليها بسبعة ونص بزز وعمرهوا وياها الوراق وخرج معاها فالطموبيل للمقاطعة كاليزا معاه الاوراق ورجعها حتى للساحة ديال الطموبيلات دخلات لقات طموبيل دواءل مكيناش يعني هوا مكاينش . عطات الشيك فيه الفلوس وركبات فطموبيلتها فرحانة بيها وخرجات كدور وتسارا عاجبها الحال حتى عيات ورجعات للاوتيل تركنات . تاصلات بالريسطو يويدوها شي اسبوع اخر على قبل وراقها اللي قالت ليهم ودخلات ليهم الشكلي فالعكلي ولقات مول الريسطو اصلا مبهلل مكيقول والو جاتها من الجنة والناس .
نعسات والصباح تلاقات مع امها وختها . شبعو دوران النهار كامل حتى عيات ورجعات لاوتيل نعسات . اليوم الموالي ناضت بقات دور دور تاعيات .. اش دير مادير .. وقفات الطموبيل الحمرى قريبة من لاجونص وهي تخور فراديو كاسيط ديال الطموبيل حتى خسراتها وديمارات الطموبيل رجعات لاجونص . دخلات معبسة كتشير بيديها
فاتي : السلام ... ديك الطموبيل اللي بعتو ليا ماخدامش ليها راديو كاسيط
- مايمكنش نعطيوها ليك خاسرة!!
فاتي :عيط ليا على مول الشي يجي يتفاهم معايا ... كضحكو عليا ولاشنو! عيط ليا عليه يجي دااااابا انا ممحركاش من هنا تا يجي نتفاهمو على هاد الخدمة اللي دار ليا
[23/1 19:27] بارت: جلسات ليه فوق الكرسي شاعلة .. عيا يهضر ويسول وهي تقمعو
فاطمة الزهراء : ماااااتهضرش معايا الله يرحم باك ... ماشي معاك فنهضر جيب ليا مول الشي
- واخا لاللة غير بلا فضايح الناس غتسمعنا وتخصري لينا صمعة المحل .. انا غادي نعيط ليك على السي واءل حفيض غير صبري واحد الدقيقة
فاتي : داااااابا مادروش ليا بحال المرة اللي فاتت بقبت كنتسنا حتى طابو جنابي . داااابا يجي ولا ندير ليكم الشوهة هنا
سمت الشاب وهز لاباراي تاصل بواءل
- الو السي واءل ... السيدة اللي خدات من عندنا طوموبيل ****** ولبارح رجعات عندها مشكل وجالسة كتسنى فيك دابا ... كتغوت قالت بغاتك نتا الى كان ممكن اجي ... واخا السي واءل (قطع ) راه فالطرق هوا جاي
فاتي : ها حنا غنشوفو هاد خاهوا جاي
بقات مربعة يديها كاسنى .. ماشي بزاف ديال الوقت ماهي غير نص ساعة ووصل بالزربة . دخل مستغرب مع الباب بحال العادة . غير شافتو وقفات كتهضر بالنفخة
فاتي : اش هاد التعامل وااه !واش انا درت التيقة وخديت طموبيل غير ول لبارح صبحات ليا ليوم ماخداماش !!!
واءل " منين ماخدماش؟ ونفرضو ماخداماش غتجي بشوية تقول لي لينا ماخدماش وحنا نشوف معاك الحل ماشي بلغوات والفضايح!
فاتي : مامسالياش نبقى غادل جايا الله يرحم لواليدين الى كنتي نتا مسالي انا مامسالياش
واءل: واخا واخا ... اجي معايا وريني منين ماخداماش
خرجات معاه لبرى ويالاه فاتت الباب وهي تشةف بنت سمرة بشعر كحل معاه فالطموبيل جالسة لداخل شادة تيليفون.. خرجو عينين فاطمة الزهراء وقلبها تزيير وداخت فبلاصتها ناعرفات تزيد ولا ترجع باللور ، دوخاتها البنت وكل شوية تلفت تشوف فيها و واءل جالس لداهل فالسيارة كيقلب ليها على المشكل فين كاين .. كيهضر بجدية وهي واقفة برا كتجاوبو وعقلها مع البنت لخرى
واءل : خاصر ليك راديو كاسيط!!! مي هادا تجر شي جرة باش تهرس ! ماعطيناهش ليك هاكا مهرس !
فاتي: عينيها فالبنت ) اه اه
واءل : خاصو يتبدل كامل هادا
فاتي : اه
واءل : بفف... نتي اللي جريتيه شي جرة ولا خليتي طموبيل محلولة بغاو الشفارة يسرقوه؟
فاتي : انا جريتو ... ومكرهتش نريشو
هز عينو فيها مطلع حاجبو وهي دور شافت فيه عاد استوعبات
فاتي: الشفااار اللي جرو ومكرهتش نشدو ونجمع عليه الناس .. شنو ندير دابا ؟
واءل : خاصو يتبدل
فاتي: واخا بدلو لي
واءل :غادي تدي الطموبيل وتشريه ليها من جديد من محلات البياس ديال الطموبيلات حنا مكنبيعوش البياس .. والة بغيتي يتقام عليك شوية رخيص شوفي لافيراي
فاتي: كفاش!!! وعلاش ماشي نتوما اللي غتبدلوه؟
خرج من طموبيلتها وقال : حنا بعناها ليك صحيحة فصيحة وبفمك قلتي الشفار . مايمكنش اللي خصرتيها تجي عندنا حنا نصلحوها ليك اشمن ربح فيها على هاد الحساب
فاتي: واخا .. واخاااا سيدي الله يرحم الواليدين
طلعات زعفانة لطموببلتها وكسيرات ساخطة .. جاتها البكية وعرفات راسها خسراتو ومعندها كي دير ترجعو .. رجع كيتعامل معاها عادي جدا بحال الى عمرو عرفها .. تستاهل هي اللي دارتها راسها .. اش داها تقول ليه كنوجد لعرسي! ومن بعد الله يسخر علاش غيحرق دمو مع وحدة كتبني فمتسقبلها مالو ما عندو نفس !
مشات بحال صلحاتو راسها .. تقال عليها الهم ومقادراش ترتاح بالمرة .. عقلها مع واءل وراسها غيفركع .
دازت 4 ايام وهي على نفس الحال .. مشا واءل .. باشمن سبة تاني غادي تلاقا بيه .. والى ماقلبلتش عليه هي ماعمرو غيفكر يقلب عليها هوا .. ركبات طموبيلتها ومشات كدور .. الايام كتجري مابقا ليها والو ترجع لأكادير .. اش دير مادير مشات تاني لاجونص وهاد المرة وقفات بعيد كتشوف فطموبيلتو واقفة حدا الباب .. بقا عاسة عليه حتى خرج هوا ونفس البنت ركب زاد وزادت حتى فاطمة الزهراء موراه .. خلات حتى بعد وفات لاجونص وقربات من طموبيلتو من اللور . يالاه وقف فالسطوب وهي دخل فيه من اللور قاصت ليه الطموبيل
[23/1 19:28] بارت: نزل من الطموبيل مكشكش ناوي على خزيت يالاه دار بغا ييحيح وهوا يلقاها موراه حاللة عينيها ، نزلات من الطموبيل بابتسامة وحنان
فاتي: سمح ليا ..
قاطعها مخرج عينيه : سمح ليا نظيرها فجيبي فين كانو عينيك الاللة ؟!!!
جمعات الضحكة وخرجات عينيها : ايييوا مالنا ياك لاباااس جمع فمك ماشي هضرنا معاك بشوية طلعتي للسما ... اش وقع كاع نقيدو كوووسطة ونصلح ليك خرشاشتك
نزلات البنت اللي معاه طويلة ورقيقة كتعوج وشدات فيه
- ايوا مالنا ! اش قلة الترابي تعلمي تهضري وهضري معايا انا اللي مرى بحالي بحالك
قبل مادوي فاطمة الزهراء وكانت على السبة وكتقلب نيت على السبة .. طارت عليها بحال الى قاتلة ليها باها
فاطمة الزهراء : ايوا نهضرو بلغتنا يا سفود العواشر
تدخل واءل كيفك بيناتهم وكل وحدة كتشير بيدها
ناضت قربالة والناس كيفكو .. تقلب واءل على فاطمة الزهراء قلبة وحدة وخرج فيها عينيه ودفعها بعدها
واءل : نتي مينفع معاك غير البوليس .. مافهمتش علاياش كتقلبي .. ضاربة ليا الطموبيل من اللور وزايداها بلغواات ... مالقيتي شكون يربيك
جبد تيليفونو بغا يعيط .. اما هي تزيرات وراسخا سخن كرهات راسها وتمنلت الارض تشق قدامها .. مابقاش بيها الوجه باش تبقا واقفة ولقات احسن حل هوا تسخف.
يالاه حط تيلي فودونو وهي طيح طيحة وحدة فالارض .. تجمعو الناس عليها وبقات السمرة كتغوت
- تبوووحيييط باااااز راه دايراها بلعاني التمتيل شحال كتعرفو ليه
تلفت واءل وهوا محني وخرج عينيه فالبنت وقال
واءل : دخلي جلسي فطموبيل وماتخرجيش من تما حتى نجي
جرا عليها وهز قرعة دالماء من الطموبيل بدا يفزك لفاتي وجهها
واءل : كحزو شوية للور مالكم كتفرجو عندنا حلقة هنا ! كل واحد يمشي يشوف شغلو الله يرحم الواليدين
رجع لفاطمة الزهراء كيضرب فوجهها ... جاتها البكية والحكرة وبدات تنخصص .. حلات عينيها وبدات تبكي وتشهق .. تنهد وشد بيدها وقال
واءل : اجي طلعي فطموبيل ... طلعي بشوية
طلعها للور فطموبيلتها وركب هوا لقدام بعد طوبيلتو وطموبيلاتها على الطريق للجنب ورجع عندها لقاعا بغات تموت بالبكى
واءل : صافي ماطرى والو .. لخليفة عالله ماشي مشكل ... واش تعيط على باك ولا مك ولا شي حد من العاءلة يجي عندك ؟ ماتقدريش تصوكي فهاد الحال
قالت وهي كتخرك راسها وتبكي : لا
واءل : علاش؟ مايمكنش تصوكي ونتي هاكا .. مستحيل راك عارفة العواقب كي دايرة ... نعيط على باك ؟ ولا خطيبك ولا ...
قلباتها وجهها كتشهق : ماعندي لا خطيب لا والو اهىء اهىء اهىء
عقد حجبانو وقال : كفاش؟!
فاتي: بابا بغا يزوجني بزز مني وهربت اههىء اهىء اهىء
واءل : كفااش !!! واايلي! علاش غيزوجك بزز منك ؟ علاش ناي ماقابلاش؟!
فاتي : لا اهىء تهىء اهىء... ردني لوتيل اهى اهىء اهىء
هنا سرات مع واءل .. او بصح! علاش جالسة فلوتيل مجالساش مع دارهم !! من نهار شافها داها للاوتيل !.... على هاد الحساب بصح هاربة من دارهم .. تنهد وقال
واءل : واخا صافي سكتي من لبكى .. انا غنردك للاوتيل .. صافي ماتبكيش . واحد الدقيقة ونرجع
مشا لطموبيلتو وهي تهز راسها كتمسح فدموعها وطل عليه من الزاج واقف كيهضر مع ديك البنت
واءل : تسنايني هنا ولا نشد بيك طاكسي تمشي ؟ غاندي السيد للسبيطار مريضة ونرجع
- كفاااش! تخليني هنا ! وتديها هي مالها شكون تكون !!! زوييينة هادي!
واءل : عرفتي شديري ... اصلا كنتي غادا فطاكسي ولا لا ... فرعتي ليا راسي نمشي عند صاحبتي نمشي عند صاحبتي كتسناني. نزلي سيري عند هاد صاحبتك اللي من صباح ونتي فارعة ليا راسي بيها ... ماتغديتش فخاطري وكل شوية جالسة عليا غنوض نشد طاكسي .. نوضي دابا نيت راه قربتك شوية منها
- واءل واش كتهصر بصح!!! راك كتهضر معايا انا . . راه انا هادي نسرين!
واءل : نسرييين .. نتي هي مارلين مورو ... نوضي سيري طلعتي فراسي
نزلها وشير لطاكسي خشاها فيه وقال
واءل : سيري عند صاحبتك تعطلتي عليها .
[23/1 19:33] بارت: رجع كيجري عند فاطمة الزهراء لقاها متكية راسها كتنخصص
واءل : نديك فطوبيلتي ؟ .. ديالك خاصها ديبناج يديها تصلح
فاتي : واخا .. ماشي مشكل
واءل : يلاه نزلي معايا ... غير بشوية عليك
شد ليها فيدها نزلها وداها لطموبيلتو ركبها .. تاصل يباناج كيتعامل معاهم يهزو ليه الطموبيل يديوها لبلاصتها منين شراتها حتى يصلحها ليها هوا بحكم تضررات بزاف من لقدام ماشي بحال ديالو تكمشات شوية من الور وصافي.
طلع فالسيارة وكل شوية يدور عندها يسولها واش مرتاحة ..
فاتي : مابغيتيش نمشي للاوتيل دابا ... ديني لشي بلاصة حدى لبحر حاسة براسي مخنوقة ... باغا نشم الهواء
واءل : واخا .. نديك لعين الدياب تكلسي شوبة، تغديتي؟
فاتي: لا مزال
واءل : يالاه نديك لشي غيسطو ... الجوع اللي دار ليك السخفة
داها لكرنيش عين الدياب ونزلات كتنفض فحوايجها . دخلو لغيسطو وجلسو ... شربات الماء وتكات على ضهرها وواءل قدامها جالس
واءل : شوية دابا؟
حركات راسها بالايجاب كتبحوط عليه ودايرة فيها مريضة مهرسة مهمومة جميع مصاءب الدنيا والدين نزلو عليها .
واءل : شنو تاكلي ؟
فاتي: اللي بغيتي .
عطاها الموني عزلات هي وياه وربع يديه قال ليها
واءل : عاودي ليا شنو وقع ؟ عاودي باش ترتاحي
فاتي: بابا بغا يزوجني بواحد كبير فالسن ومريض فيه الزهيمر .. وهربت ليه لأكادير
واءل : امتى هادشي؟
فاتي: شحال هادي ... ولاكن حالف حتى يزوجني بيه .. هربت لأكادير جلست تما .. حتى عيطو ليا على فلوس لاسيرونص عاد جيت .. وجيت بلا ميعرف .. نكرني مابقاش حاسبني بنتو ... وخايفة يلقاني ويشدني بزز مني .
واءل : ماعندوش الحق يزوجك بزز منك ! السيبة هادي ولاشنو! على هاد الحساب علاش العدول كيسولوك واش قابلة ولا لا... والى ماكنتيش قابلة ميزوجوكش ... واش باك تسطى ولا مالو !
فاتي: مرضت والله .
واءل : وانا قلتي ليا مخطوبة وكتوجدي للعرس حساب ليا بصح
فاتي: لا.. راه غير قلت ليك هاكاك وصافي
واءل: مهم ماعلينا ... نتي لاباس عليك .. اش كتعاودي ... كي دوزتي هاد العماين هادي؟ بقا راسي ضارني على قضية الزواج ومراتك اللي قلتي ليا ! شرحي ليا شكون قالك انا تزوجت؟
فاتي: علاش متزوجتيش؟
واءل : ههه.. ماتزوجت ماخطبت ما زمرت شكون اللي قالك انا تزوجت!
فاتي:بارتباك ) من موور .. ط ..طلاق جاني اتصال من واحد صاحبتي قالت ليا واءل تزوج بمريم
هز راسو وطرطق عليها بالضحك : واش من نيتك !!! لا واش من نيتك! شايط على راسي ولا شنو؟
فاتي : مانعرف
واءل : ااااه .. هدا هدا هدا .. صافي فهمت ... غتكون هي قالت ليهم تزوجنا حيت واحد صاحبي كان خاطب ختها ومافراسيش انا ختها ولا واش كتجيهاا كاع... وكنت كنتلاقا انا بداك صاحبي هوا وخطيبتو وكنعرفها مزيان مي عمرني سولت واش عندها شي ختها سميتها مريم ولا مانعرف ... مهم فالعرس عرضني للقاعة مشيت مع الدراري وداكشي وهي تبان ليا ... مافهمت والو ... جات عندي كضحك بحال الى بيني وبينها عشرة ... فرحااات السيدة فاش لقاتني تما فالعرس .. ماعلينا مهم نوضونا قالك نتصورو مع العريس والعروسة ومشيت حدى صاحبي جلست حداه فوق الفطوي طويل وخي تجي كطير جلسات حدايا باتكشيطة والشعر وداك التخربيق ودايرة واحد التاج صغير فرحانة بيه ... انا محملتهاش ضسرات بالزربة .. مهم تصورنا ونضت طالع ليا الخز معاودش نضت تصورت واخا عياااو فيا .. لغد ليه كنلقا الدري صاحبي اللي تزوج مسيفط ليا الصورة ديال انا وياها مقطعاها ومزوقاها من الجناب وقالي واش بينك وبينها شي حاجة !!! مافهمت تا وزة .. وشافتها الوليدة ماعرفت شكون هاد المحسنة اللي وراتها ليها وناضت كتسخط عليا .. قالت ليا تزوجتي وعرستي بلا خباري وكلشي سايق الخبار الا انا.. مهم روينة وكملاتها وجملاتها طاكاتني فالطوف بأننا تزوجنا ودايراها ضحك زعما مي بنادم حسابو بصح وجالس كيبارك...صحابي كيعيطو ليا مافهمو والو كيسولو واش جبت المرى التانية حيت اصلا ماقلت لحتى واحد انا طلقت ... من غير لافامي اللي ... خلاص راه قالتها ليهم الواليدة ... ضربات بيا البوق
[23/1 19:34] بارت: فاتي : اوييييلي!!! واش بصح ؟ مالها هادي تسطات.. وشنو درتي معاها!
واءل : هه سحاب ليك انا ساهل ليها ! سكرينيت البوسط كامل كاتبة فيه باركو ليا والعقبة ليكم البايرات .. كاتباها بحااال هاكا .. سكرينيت البوسط اللي حطات بالصورة وسكرينيت دوك التعاليق وداكشي اللي وصلني من صحابي مهم كلشي ومشيت خرجتو تصاور وشديت الطريق نيشان لدارهم خرج ليا باها .. كانو الضياف ديال العرس مزاالين تما ماشماوش ... هادشي اللي كنعاود ليك نهار التالت ديال العرس ... خرج ليا باها بديت كنحماق عليه ونحيح وخرجات علءلتها كاملة كيطلو .. وريت لباها داكشي كامل وقلت ليه انا مزوج وخلقات ليا مشكل مع مرتي ومشات لدارهم ورفعات عليا دعوة الطلاق هي وباها بسبب هادشي اللي دارتو بنتك .. فيت كنعرفها ولا كتعرفني جينا نحضرو لعرس صدقنا مزوجين صحة اش هاد البسالة وقلة الترابي .
حيحت عليهم تما تا رجع كيطلب ويزاوك نسكت .. عاءلتها كرهوها فديك اللحضة كلشي بدا يهضر .. ماخصهاش دير هاكا . لا حشومة .. لا هادي ... ماتفرقش الراجل على مرتو ... قلت ليهم فخاطري ... تفرقنا واللي عطا الله عطاااه ... طلعات مع الدروج فديك اللحضة مافهمات والو لقات البلبالة نايضة فالباب .. قبل ماتسول على شنو واقع جمع معاها باها بواحد التسرفيقة حتى جات فالارض وبدا يسخط عليها ... باها باينة فيه راجل معقول ومكيرضاش ... كان غيقتلها كن مافكوهمش .. خليت ليهم الحرب وهبطت بحالي .. لقات الجوقة فالحومة وانا ونهز يدي قلت ليهم انا مزااااوج وهاد ختنا فرقاتني على مرتي وكتقول لناس تزوجنا .. مابيني وبينها والو وبغات تلسقتي .. حينا حضرنا لعرس ناضت تصورات معايا وحطاتها فالفايس وصلات لمرتي ناضت دعاتني على الطلاق ... ان هادا منكر ههههه ومشيت فحالي . مهم تشوهات وسط عاءلتها خاطفت الرجال ووسط حومتها منين ما دازت تحشم تهز الراس ... وانا مشيت عند الواليدة بقيت عام كنحلف بيها ما مزوج ولااا بغات تيق ههه... ورجعات حاضياني فين مشيت فين جيت وكتسول عليا .. دخلها الشك خافت نتزوج ونخبي عليها
فاتي: وييلي هادشي كامل !!!
واءل : هه زين صحابات اللي عندك ... لا صحاب زينين لا جيران زينين .. مافهمتش كفاش حتى كطيحي على داك القوم .. ونزيدك ديك جارتك اللي ديما جالسة معاك فالدار .. نهار مشيتي وعرفو باللي طلقتي .. عرفتي اش جات عندي كتقول ليا !
فاتي : شنو؟
واءل : قالت ليا عيييت نصح فيها وكنقول ليها غتخرجي على راسك .. وداكشي اللي كديري فيه مامزيانش وراجلك مايبغيش وديما كنهضر معاها باش دير عقلها وااالو ... والله يجيب ليك بنت الناس ماحسن منها .. نتا ولد الناس الله يلاقيك مع بنت الناس
فاتي: هييييه!! وهي اصلا باش عرفاتنا طلقنا ؟ وعلاش طلقنا ؟ معارفينش
واءل: قوليها راسك ... ماعارفاش علاش ومسحات فيك كلشي .... مهم طلقتي راه نتي اللي فوتيف وعياو ينصحوك
فاتي: غنمشي عندها نوريها والله لا بقات فيها
واءل : صااااافي سالينا من ديك العمارة ... مابقيتش ساكن تما سدات مدام
فاتي: وفين وليتي؟ رحلتي!!!!
واءل : رحااالت الشهر اللول ... بعتها ومشيت سكنت مع الواليدة فالدار . اصلا لصقاتني .. حتى بانت ليل واحد البقعة زوينة قريبة من لاجونص وخديتها وبينتها على خاطري r+4 درت ليها لاكاف وكراجات لتحت وطبقة اللي فوقهم فيهم لاصال ديال رجال وعيالات وسكنت انا لفوق .. فوق مني جوج طبقات خاويين ماعرفت اش ندير فيهم . بوحدي كي جن كندور فيهم ويجي بنادم يزوجني وطلقني كي بغا .. ها واءل تزوج ه واءل طلق .. غير واءل اللي كاين تفووو ... دابا مكاين لا عمارة لا باب عمارة لا جيران .. كاين دار مستقلة والشارع والقهاوي ... غير الى بغيني تصاحبي مع الشارع مااانعرف
دورات وجهها : واصلا اش داني ليها انا
واءل : ابتاسم وقال ) علاش مانوياش ترجعي لدارك (غمزها ) نبقا بوحدي انا باير مانتزوجش!!!