فاتي : واخا
قطعات وبدات تعمر ليه فواتساب تا سلات ورجعات لشغلها .. رجع باها لعشية لقاها كتعمر اتاي وهوا يوقف عليها
الاب: اجي نهضر معاك
فاتي: حتى انا بغيت نهضر معاك ... بغيت نقول ليك راه غنرجع لأكادير للخدمة غدا
صفار وجه باها وقال : اجي ابنتي الله يرضي عليك نهضرو بعدا وديك الساعة يدير الله خير .
تبعاتو للصالة ولحقات عليهم مها . جلسوها الوسط وبداو .
الاب: راه تلاقيت واءل . وبدا يرغب فيا مسكين قطع ليا قلبي ... بغاك ترجعي ونرجعو الشمل ... اللي فات مات والمسامح كريم .. وكن هاد السيد مكان باغيييك بصح ونيتو صافية مكانش يبقا يتسنى فوقاش ترجعي... كن مشا تزوج وحدة اخرى ونساك
الام: الله يرضي عليك ابنتي ديري عقلك ... رجعي لراجلك الى بغيتي تكوني مرضية
بقاو عليها بالهضرة يزوقو ونقشو وهي كتسمع ليهم ساكتة حتى سالاو وقالت
فاتي: بشرط ... يدير ليا الخطبة حسن من اللولة والعرس حسن من اللول عاد نرجع .. ويحلف ليا عمرو يعاود .
الاب : يديييرهم من حقك راه مرمد ليك وجهك فالتراب خاصو يشللو بالحليب .
الام : من حقك مهم فاش يجيو نقولوها ليهم ونشوفو شنو يقولو
فاتي: المهم انا الى مدارش ليا العرس حسن من ديال نجلاء بنت عمتي اللي عرضاتني للعرس كتفقص فيا منتزوج بيه ... يدرو بيا فالقاعة بتريطورو والعمارية والنكافة والحوالا مشويين والبسطيلة بالحوت ونبرز بحال العرايسات ويعطيني فلوس الصداق ... اصلا كن مشا بغا يتزوج وحدة اخرى كان غيدير هادشي كامل وبزز منو كااع ... غير انا اللي دريويشة وعما ديما نصبر ونسمح فحقي
الام : عندك الحق... هوا اصلا كن مشا يتزوج غيدير هادشي...وحتى نتي بقيمتك وكرامتك وغلط خاصو يعوض ليك ... براكة غير الناس اللي مخلاو ماقالو فيك
فاتي: (كدور عينيها ) و و وشرط اخر..
الاب: اشنووو عاوتاني؟
فاتي: اللي سول قولو ليه تخطبات .. بيمن حتى للعرس وتعرفو عليه ... كما شركو فيا فامهم بغيت يشركو فيا عينيهم
الاب : ومي الى سولاتني نقول ليها مانعرف ! بغيتي تسخط عليا؟
فاتي : المهم هادا هوا شرطي .
ناضت خلاتهم كيبرقو ومها كتساوي
الام : صافي صافي ساوي خلينا نرجعوها لدارها .. اللي قالت قول اييه خلينا نتهناو فدماغنا من المشاكل حسن ماترجع لأكادير ويبقاو الفام مشركين عليها .
[23/1 21:14] بارت: الاب : ايوا نعيط ليه نقول ليه راه قابلة ترجع وها شروطها ونشوف اش يقول
مشات دخلات للبيت وهي تكمش كضحك ماقاداها فرحة . كلشي بالعكس الله يستر... كن جابتو بيديها كن سمعات عليه الهضرة ... هربتي ودرتي وفعلتي واتكتي و حتى شوهتينا وعاد باغا ترجعي .. ويقدرو يعكسو ليها وتصدق راجعة بزز لا عرس لا شان لا مرشان تولي طلب الله غير امتى ترجع .
بالليل تاصل بيها واءل وهي مخشية فالفراش وقال
واءل : اجي باك قاليا باغا عرس وهايلالا والزندقة وداكشي بصح؟!
فاتي : اصلا كن بغا شي واحد اخر يتزوج بيا كن درت هادشب بحالي بحال كاع البنات علاه ما المطلقة مكطلعش فالعمارية!!
واءل : لا غير سولتك ... وعلاش هلد التخربيق كاامل غيدي لينا الوقت .. اجي نرجعو بحالنا واللي بغيتيها نشريها ليك
فاتي : مكاين عرس مكاين رجعو تصبح على خير .
قطعات عليه شادة الضحكة وهوا يعاود يصوني
واءل : حشومة عليك والله علاش كتقطعي حنا غير كنهضرو!
فاتي : انا ماشي رخيصة على راسي ... راهم كبر مني وتزوجو 7 دالمرات وعرسو ... الى مابغيتش صافي بلاش حتى انا مرتاحة هاكا
واءل : بجدية ) بغيت غير نسولك وجاوبيني بصراحة ... واش كتبغيني ولالا ؟ حيت عندك زايد ناقص كي رجعنا كي مارجعناش؟
فاتي: كي بغيتك كي مابغيتكش .. الى مارجعتش تيقتي فيك راه مكاين والو ... التقة هي كلشي . ونتا جيتيني بحال الى خصتيني ! ولا انا يمكن اللي رخصت راسي وقبلت نرجع ليك!
واءل : لالالالا بلعكس انا حيت توحشتك بزااف ماكرهتش نرجعك ليوم قبل غدا والعرس وداكشي كياخد وقت وانا موحشك فهميني
فاتي: دابا نطلع ليك فراسك وتقلب على البديل غير صبر الأيام كطبر دغيا
واءل : بأنزعاج ) ياك ... وليتي كتهضري معايا بحال هاكا ! علاش كتقولي هاد الهضرة .. والله نيتي ما هاكا
فاتي: ايوا شفتي .. قلت ليك التقة منعادمة هاد الساعة وغنديرها فيد الله ونرجع ... والى مافنيتكش ديرها دابا مزال ايام الله طويلة وتبدل نيتك .
بقا ساكت مدة وقال : بغيتي لعرس.. واخا نديروه ماقلتي عيب
فاتي: راسي كيضرني تصبح على خير
قطعات عليه وهي تجيها الضحكة .. تخشات ففراشها نعسات فرحانة .. اخيرا جرات بيه الحبل والكرة عندها تلعب بيها كي بغات .. وكن رطبات شوية كان يجر بيها الحبل هوا ويلعبها كي بغا ويرجع يتقلق هوا ويغضب ويتسنا منها تصالحو .
الصباح ناضت مشات للحمام ودازت للصالون قادات الحالة ورجعات للدار .. عيات تسنل يعيط ماعيطش.. اليوم التالي كذلك ... الرابع .. الخامس حتى بدات دخلها الزيت .. اويلي ياكما صافي باااح ! واقيلا قصحات معاه حتى طج .. ناري نافيها اللي يتأزم وطير فرحتها وتبدل بكنازة ... حتى نسات الايام الكحلة اللي عاشت وغترجع ليها تاني؟؟! غدا الخطبة ... وغدا خصو يجي .. ماعيط ماسول ماحتى حاجة .. وجدو كلشي و وجدات كلشي .. كلاها التخمام وسيفطات مها تسول باها ياكما عيط ليه ... والو ماعيطش ... اش واقع ؟ تعيط ليه هيا؟ وييلي ماجاتش هادي هي عزة نفسي ! ومايمكنش تبقا هاكا معارفا واش تكمل توجادها ولا صافي تحبس ؟ ... صبرات داك النهار بزز وكل شوية تهز تيليفون طل عليه ... اش دير مادير تنزل تيليبوتيك تصوني .. داكشي اللي دارت ... صونات وجاوب
واءل : الو ... الو؟
فاتي: الصمت
واءل : الو؟ تيت تيت تيت
قطع ... ويلي مال هادا باينة عليه صحة سلام وتيليفون فيدو ... علاش ماقدرش يعيط ويسول ؟ ياكما صافي دار بناقص؟
رجعات بحالها ومها فين ما تسولها تقول ليها كيعيط ... براكة غير الخلعة اللي فيها وتزيد تعاود لمها تركب فيها الوسواس والخلعة كتر من اللي راكباها .
وصل اليوم الموعود ... الملحون مطلوق فالدار خوا والعود .. الصالة ملمطة والحلاوي واجدين وفاتي فالصالون كتجبد شعرها وعقلها مع تيليفون .. ويييلي حي اليوم الخطبة وماعيط يقول حتى راحنا واجدين وجاين!
رجعات بحالها صابغة الدفار وطالقة الشعر لابسة قفطان خفييف ابيض والحنة فاليدين والشربيل فالرجلين .. لقات مها غادية جاية كتوجد وهي توقف عليها
فاتي: فين با ؟
عيشة : مشا للجامع يصلي؟
فاتي : ماعيطوش؟
عيشة : نسولك نتي اللي عندك تيليفون وكتهضري معاه!
فاتي: .ا ااا اه طفا ليا انا نمشي نشارجيه .
دخلات لبيتها فيها البكية وكتغزل .. طاح ليا الطونسيو حتى بداو ودنيها كيصفرو ... شنو دير دابا تعيط ليه ؟ مابقا ليها تا حل .. ماعندها مادير تصبر وتسمع شي قمعة هي هاديك اللي تجيب ليها التمام .. يالاه هزات تيليفون بغات تصوني وهي تسمع الباب ديال الدار تحل وصوت الناس وباها كيضحك
الاب : زيدو مرحبااا مرحبااا
[23/1 21:14] بارت: ماتهنات حتى سمعات صوتهم داخلين مع الباب عاد جلسات كترجع النفس وتردد
فاتي : الله ياربي حمدتك وشكرتك .. حمدتك وشكرتك ياربي ... كان غيسكت ليا القلب .
تفرع عليها الباب بالجهد ومع هي جالسة حداها دفعها جات ليها وطلات معا فرحانة
عيشة : نوووضي عند الناس سلمي عليهم ... نوضي ههه مخشية هنا زعما حشمانة
فاتي : بشوية ماتعرفوش تحللو البيبان غا بشوية! اصلا مرعودة غا بوحدي ماعرفت مالي بحال الى اول مرة غنتزوج .
عيشة : واا نوضي عند الناس سلمي عليهم حشومة .
ناضت بالزربة كتفتف .. رشات الريحة ووقفات حدا المراية كتقاد القفطان والمكياج والشعر... جمعات النفس وطلقاتها وخرجات مع امها حانية الراس .. دخلات حشمانة ماقدراش تهز فيهم العين .. سلمات على امو باست يديها وباست راس جدو وجداتو وهما فرحانين و دازت سلمات على خواتاتو سلمو عليها حتى هما مبسمين عاجبهم الحال ووصلات ليه مدات يدها وهي تهز فيه عينها معبسة ماكرهاتش تقجو .. ضحك وقال بصوت خافت
واءل : باينة عليك الحشمة
خطفات يديها وجلسات حداه حشمانة . تكلم الحاج وقال
الحاج : ايوا سيادنا جينا طالبين نرجعو بنتنا لعندنا ...نلمو الشمل ونديرو الزريعة ... راضية ابنتي افاطمة الزهراء؟
هبطات عينيها حشمانة و واءل حداها كيشوف فيها بنص عين .
الاب : مرحبا بيكم والف مرحبا .. والى خرجات منا شي كلمة دالعيب غير سمحو لينا ... اللسان مافيه عضم وفساعة الغضب ميحضر الشيطان ... سمحي لينا الحاجة
ام واءل : المسامحة السي عبد الله ... الحمد لله اللي تجمع الشمل ... حنى منلقاوش حسن من فاطنة الزهراء بنتنا وراه هي وحدة منا كاشي غريبة علينا ... الله شاهد معزتها فقلبي بحال بناتي... الله هي دريويشة وراسها صغير كتحتارم بعدا اللي كبير منها ولا يجيب شي موصيبة تمرر لينا حياتنا
عيشة : هي مرضية ولاقاها ربي بيكم حتى نتوما الله يعمرها دار ... ولاكن الحاجة راه شرطات علينا شروط نقولوهم الى بغا بصح يردها ... خاصو يدير ليها قسمة ويغسل ليها وجهها اللي تمرمد فالتراب ... مايخفاكش المطلقة اش كيتقال عليها ... وفاطمة الزهراء طعنو فضهرها حتى شبعو واخا مدايرة لابيديها لا برجليها وخلصات بصحتها شي حاجة اللي مادارتهاش هي.
الجد: اييه حنا هادشي عارفينو ... وعارفين لسان الناس ماضي .
الاب: ايوا هادشي علاش يدير ليها العرس ويعطيها صداقها ... بحال الى غيتزوج بيها من الاول. تمشي بالشان والمرشان بحال كاع العرايسات
واءل : ماقلتي عيب ... قابل على هاد الشروط كاملة ...غير هوا مانطولوش فالعقد
الاب: من غدا ترجع راه حالو سااهل
واءل : على هاد الحساب غدا نتلاقاو عند العدول ... واللي طلباتها حلال عليها
الاب : ماتعاود غير الصلاة على النبي
زغرتات الام وتحطات الحلوى وتفرق اتاي... دارت فاطمة الزهراء الخطبة على حقها وطريقها ... شربات الحليب وكلات التمر وهي معبسة فوجه واءل مكتبغيش كاع تشوف فيه .. اما هوا فرحااان كيضحك ويتجمع ويضحك معاها عادي . تعشاو الناس و قطعات الحلوى وسلات الحفلة .
خرجو مشاو ودخلات لبيتها فرحاانة مقاداها فرحة .. يالاه حطات راسها تنعس وهوا يصوني ليها .
فاتي : شنو؟
واءل : مالك تاني؟
فاطمة الزهراء : ماماليش ... شوف نتا مالك
واءل : تا انا ماماليش ... نتي اللي بنتي ليا معاجبكش الحال .. قبيلة مابغاش ضحكي مالكي؟
فاتي: راسي كيضرني .. مافيا اللي يهضر ويالاع شربت دوليبران باغا نتسنط لعضامي خليني نعس تا لغدا ونهضرو
واءل : هههه واخا الاللة تصبحي على خير
قطعات ونعسات نعسة وحدة .. فعلا راسها كيضرها والخلعة سخسخاتها بالمعقول .
صبحات ناشطة ماشطة راشقة ليها كتوجد تمشي مع باها عند العدول .. لبسات الجلابة اللي جاب ليها والصندالة ديالها وطلقات شعرها و وقفات حدا للمرايا .. صونا ليها تيلي وهي تجاوب بابتسامة
واءل : الو حبيبة .. كي صبحتي؟
فاتي : الحمد لله
واءل : وا نزلي راه كنتسناوك لتحت انا وباك
فاتي: جيتي؟!
واءل : من لبارح وانا هنا طلقي راسك
فاتي : انا جايا
نزلات كطير لقاتو فالباب .. طلعات اللور بلا متسلم حشمانة من باها لايقول بطا عليها امتى امشي موحشة فالحلوى!
مشاو عند العدول وداز كلشي خوا هاداك .. رجعات فاتي على دمة واءل من جديد بصداق كيحمر الوجه .. فرحات ووجها حمار اما هوا ماعليه كلام .. خرجو ركبو فالطموبيل راجعين للدار وهوا يقول باها
الاب : حطني غير حدا هاد الميكانيك راه حاط عندو الطنوبيل تخسرات ليا وسيرو نتوما
حطو واءل وتلفت عند فاتي
واءل : اجي رجعني هنا
فاتي: غير خليني هنا
واءل : وانوضي رجعي مال راسك قاصح.. واش نسوق ولا نبقا داير عندك!
نزلات منفخة رجعات لقدام ودارت على رجل وهوا كل شوية يشوف فيها .. شد ليها فيديها باسها وقال
واءل : توحشتك
سكتات قالبة وجهها للزاج مقادراش تشوف فيه باش مضحكش .. سهات تا لقات راسها وقفة حدى البحر بالطموبيل وهي دور عندو
.فاتي : علاش جينا هنا؟
واءل : نجلسو شوية ... جمعي حوايجك ليوم تمشي معايا صافي
فاتي: لا .. حتى لمور العرس غير تهنى
طلع حاجبو وقال : شناهواا! وعلاش ؟
فاتي: هاكاك
جاتو الضحكة كيشوف فيها اش كتخربق عليه وهوا يجرها من عنقها وقال
واءل : اجي نشوفو واش موحشاني بصح ولا كتكدبي
غفلها وجرها وطار ليها على فمها شدا راسخا بجوج يدين ملهوف كيبوس ويعاود لقاها تاهيا عطشان يا برق السما ... اموت من طول الغياب . دغيا تحلات وجهلاتو تا بغا يطرطق كيلهت ويجر فيها رجع لثها وجهها حمر
[23/1 21:15] بارت: بعدات كتقاد حالتها وقالت بدلع وهوا حال فمو فيها
فاتي : نطلب طليبة
واءل : يالاه نمشيو للدار
فاتي: وابلاتي نطلبك بعدا
واءل : شنو؟ يالاه نمشيو للدار وطلبي اللي عجبك
فاتي: لا هنا
واءل؛: واخا يالاه شنو بغيتي؟
فاتي: بدلع) ياك دابا نتا كتبيع وتشري فالطموبيلات ياك .
واءل : امم
فاتي: كل مرة تجيب وحدة جديدة ياك
واءل : من بعد
فاتي: وكتبغيني ياك
واءل : واطلقينا
فاتي: بغيت رونج روفر بيضاء
حل عينيه وقال : شنو هي !!! هههههه حلفي هههههه
فاتي: شنو دابا منستاهلهاش؟؟؟ شحال من مرة جبتيها وبعتيها
واءل :هز راسو كيضحك) انا اللي شحال وانا نبيع ونشري فيهم عمري جبتها راسي !!! كنمشي ونجي فهاديك اللي عندي وعمرني فكرت نبدلها .. جيتي من اللخر وبغيتي روووونج روفر !!
فاتي: وشنو زعما شي حاجة صعيبة ؟ كت مكانش عندك اه ... نتا كتجيبهم كتجيبهم جيب ليا وحيدة وكمدها
واءل : هههههه نكمد 80 مليون كاملة ههههخخه
بدا يضحك مقدرش يسكت وهي كتشوف فيه معبسة بقا فيها الحال .. تكمشات بلاصتها وقالت
فاتي: ديني لدارنا عييت
تلفت عندها وقال : راه 80 مليون الشريفة كدير هاديك اللي بغيتي نتي ... واش عارفة الى ماااااثلا مثلا جبتها ليك وخشيتيها فشي حيط اش غيوقع فيا هههه
فاتي : صافي بلاااش كاع .. ردني غير لدارنا ... مللي عزيتيها فيا وعندك باش تجيبها صافي
واءل : بلاتي نديرو قضية ... باغا غا رونج روفر... نجيبها وركبيها ماعليش ... مي ناخدها انا ونعطيك هادي طويوطا تا عيا واعرة شكون بحالك
دارت يدها على جنبها معجبة وقالت : اييييه !!! تجيييبها راسك وتعطيني انا لقديمة ماحشمتيش
واءل : خهههههههههههه والله تا خايف دخلي مها فشي حيط وتخرجي عليا ف 80 مليون ... انا نجيبها و فين ما عجبك نديك نديك
فاتي : يا اما تجيبها ليا انا ديالي انا نسوقها يا اما بلاش كاع
واءل : بلاش حسن ... علاش ماطلبيش شي وحدة على قدك بااااركا عليك ... رونج دقة وحدة !
فاتي : وعلاش دابا قلتي اجيبيها ليك وتعطيني لقديمة ... هي عندك لفلوس
واءل : ههههههههن ضحكتيني والله ... مهم نمشيو للدار ومن بعد نشوفو قضية الطموبيل
فاتي: مغنمشيش... نتا باغي غير حاجتك وانا فاش طلبتك على رونج عزيتيها فيا ... هادي هي غترجع تيقتي فيك
واءل : اش جاب دابا الرونج للتيقة !!! (حط راسو على لفولون كيضحك ) سخفتيني ... (هز راسو) باغا رونج؟
فاتي : اه
واءل : بشرط
فاتي: شنو هوا؟
واءل : ماتبقايش تهزيها حتى تشاوري معايا .. غنصلح ليك ديك الطموبيل اللي شريتي مني والرونج تهزيها مرااااا مرا
فاتي: فكرتيني .. ارا 6 ونص اللي عطيتك ديالي ... ياكما هي اللي رديتي ليا فالصداق!!!
هز راسو وطرطق بالضحك عليها وقال : وناااري جلدة مع راسك ... دابا من اللخر رونج ولا 6؟
فاتي : رونج
واءل : وا نساي الستة مكتسالينش ... براكة 80 اللي غنحط فيها
فاتي: باااز ليك ياك كتبيعها ب 80 ماشي غتشؤيها ب 80 راك غتشريها بشي 60 ولا 50 ورابح فيها 30 مليون ولا 20 شكون بحالك ! وجاي كتقولب عليا
واءل : 50 ولا 60 سهلتيها ؟ مكيجمعها غير الفم . كتجيك ساهلة تنطقي بيها
فاتي : ونتا كيجيوك ساهلين تحسبهم ... راك كتربح فيهم زبالة دالفلوس ماسوقيش غادي تشريها ليا
واءل : ويالاه للدار دابا
فاتي: وغتشريها ليا؟
واءل : ماشي دابا حتى يفوت العرس وروينتو راه طاح عليا بغسيل الفندق ... ماعرفتش منين كينزلو عليك هاد البلانات
فاتي: من فعايلك اللي كدير معايا ... مهم دابا امتى تشريها ليا .. راه شفتها عند فلاجونص محطوطة كتبري فننننة هههه
واءل : وماحشوماش عليك تخرجيها للشمس تكحال
فاتي: عااافاك ديني لاجونص غير نشوووف عفاااك
واءل : عيقتي افاطمة الزهراء قولي ليا ماباغاش تمشي للدار وصافي
فاتي: من تما نمشي معاك
واءل يالاه زيد لهاد لاجونص ... وماتلسقيش ليا عليها اصلا مبيووعة هاديك بفلوسها غندير ليك الهرس اللي بغيتي
فاتي : لااا منلسقش غير نشووف
[23/1 21:16] بارت: ديمارا الطموبيل نيشان وقفها حدا لاجونص ونزل هو اوياها دخلو .. دار يديه فالجياب واقف واحل معاها وهي مشات كدور بالرونج فرحانة .. كطلع فيها تقيس الركبة وترجع تنزل دور بيها وواءل واقف كيسوط من مناخرو حدا الشاب اللي جالس فالبيرو
الشاب : واش غتخرجها؟
واءل : لا خليها الى سولاتك قول ليها مبيوعة
فاتي: واااءل .. اجي اجي تشوووف
واءل : ويالاااه دابا خلي حتى نجيها ليك
فاتي : و اااجي تشوووف
تنهد ومشا عندها حط يدو على الطموبيل وقال : هانا شنو؟
فاتي : نخرجوها دابا؟
واءل : قلت ليك مبيوعة وغنجيبها ليك كلمة وحدة ويالاه دابا ديري عقلك
شد ليها فيدها جرها من تما بزز وخرجها كتطلب وحلون عليه يخجرها ليها ديك الساعة ساعة تا هوا كتر منها كيديها على قد عقلها . طلعها وشد الطريق للدار يالاه تحرك وهو يصوني باها
فاتي: الو .. واخا تسناني تما
واءل سمع تسناني تنا وهوا يسخط .. شاف فيها وقال
واءل : شكون اللي غيتسناك
فاتي: بابا حدا قهوة الشينوي بغاني ضاروري
واءل : ياك قلنا غنجلسة شوية وتشوفي الدار !
فاتي: حتى للعشية مور العصر .. غنمشي دابا راه واقف كيتسنى
غمض عينيه وقلب وجهو عاض فالصبر ... قلب الدورة لقهوة الشينوي وقال
واءل: جمعي حوايجك .. الليلة غتباتي معايا صافي احبيبة
فاتي: ان شاء الله
عنقها بقوة وباسها وقال : رونج غنجيبها ليك صافي وصبري عليا يفوت العرس
فاتي: واخا ههه
باستو ونزلات عند باها ومشا واءل
فاتي: شنو؟
الاب: يالاه تشوفي واحد القاعة عاد وراها ليا واحد السيد دابا كبيرة وزويييينة ديال الفريع
فاتي: فين؟
الاب: غير هنا .
جرات معاه رجليها لقاعة كبيرة عصرية ودخلات كتشوف .. مزينة بالورد والضواو واللون البفسجي بارد والابيض فالارض بالرخام .. قاعة راءعة .. قنعاتها وعجباتها وفاش وصلات للتمن وهي تصدم ..
فاتي: 3 دالمليون! وفليلة؟
الاب : ياك هوا اللي غيخلصها
فاتي: لالا واخا هوا .. راه رزقي حتى انا هاداك وزايد فيا ... اويلي على 3 .. نشوف وحدة اخرى حسن كاع .. ليلة مادات ما جابت مالهم غياكلو ليا القاعة فالعشاء؟؟
- ايوا الى بغيتي نقص ليك شي حاجة
فاتي: انا جهدي 2 براكة .. وديك جوج راه بزاف عليا
- بزااف مامسلكاش
فاتي: حتى 3 نامسلكاش يالاه نمشيو بحالنا .. جات خارجة وهوا يعيط ليا كينيكوصي معاها فالتمن .. بقات لاسقة ف جوج حتى هبطها ليها لجوج وهي تخرج من تما فرحانة تاصلات بواءل وقالت
فاتي: الو . عاد شفت القاعة واااعرة وزوينة ب 3 دالمليون
واءل : بزاااف غلا عليك
فاتي: مابغاش يهبط عليها عييت معاه ... ولاكن غتعجبك واااعرة
واءل : وا تعجبك غير نتي اما انا ماكرتهش نتعشا ونمشي بحالي واخا نجلس غير فالسطح ... مهم فاش نجي غنتفاهم معاه على التمن .. داك التمن اللي عطاك بزااف .. 3 فليلة ! مالنا غتديوها معانا ولا شنو
فاتي: وصافي راه تافقنا على 3 .. خاصك دوز ليا لفلوس باش نشدها
واءل : تانجي ونشوف معاه وانا اللي غنخلصو.. نتي شوفي داكشي اللي باغا وقوليها ليا انا اللي غنتفاهم على التمن .. زدتينا بهاد العرس وهمو تا قلنا سالينل ورجعنا من الاول... كن دوك الفلوس اللي غتمشي فالعرس درنا بيهم شي تسافيرة لشي دولة وتقام رخيصة على هاد العرس
فاتي: واصلا غادي نسافرو ندوزو شهر العسل علاش مالك ماغتسفرنيش!!!
واءل : علاش ماجيبيش ماكينة وريشيني دقة وحدة بلل ماتبقاي نتف نتف نتف نتف شوبة بشوية ... بقا ليا السفر تا هوا فالحساب
فاتي: اللي كيبيع بالرخيص كيشري بالغالي