جالس فالطازج هوا وصاحبو كيتجمعو ويتعاودو
كمال : فين عرفتي هاد ختنا ؟
واءل : هي قلبات عليا .
كمال : وشنو بينك وبينها شي حاجة؟
واءل: مابيني وبينها والو غير كنعرفها وصافي .. كانت تقدر تكون بيناتنا شي حاجة مي دابا نن
كمال: وعنداك مرتك تمشي تعيق اصاحبي
واءل: اش غتعيق تا نتا .. لالا ماعندها منين تعيق .. ومافيهاش تبقشيش واخا هاد اليامات ولات كتنويني .. بدات كدير ليا الشقيقة فراسي .. اطو نعيط لهاظو نشوف فين هما شفتهم تعطلو (جبدي تيلي ) الو رحاب فينكم ؟
رحاب : انا واجدة كنتسنى غير صاحبتي توجد راسها .. عاد جاتها هي السبة وبان ليها فاليدين والرجلين
واءل : وا قولي ليها طلقي راسك داكشي مغيهربش
كمال : بصوت منخفض) قوليها واش فيها شوية ديال الضو ولا والو نصدقو كنتسناو على والو
رحاب: هههه سمعتووو ههههه قوليه غتشوفها ميديكش النعاس غير صبر راه غزاالة
واءل : واغير سربيو راسكم (قطع)
كمال : ها حنا غنشوفو هاد الشمش اللي كنتسناز طلع كي دايرة
واءل : وشنو بغيتيها نتا ياك مزوج ؟ ولا ناوي ضرب هنا وهنا ؟
كمال: ويلى كانت مليحة وفيها ميدار علاش
واءل: بسخرية) ههه ..مشييتي بعيد اخاي .
عياو يتسناز جالسين فالطبلة مقابلين مع بعضياتهم كيتجمعو ... شوية هز كمال راسو جيهت الباب اللي عاطيه واءل بالضهر وقال بأعجاب وصوت خافت
كمال : وا الملييييح اخاي وفيه مايتقضا
هز واءل راسو يالاه بغا يدور وهي توقف عليه فاتي بابتسامة عريضة
فاتي: سلاام
ابتاسم وسلم وتلفت ندموراه يكمل السلام على البنت اللي سبقو كمال ليها .. يالاه دار وهما يخرجو عينيه وتحل فمو .. فاطمة الزهراء!!!!!
كانت واقفة لابسة صباط عالي وسروال دجين مزير قصير وقميجة بلا يدين مخشية فالسروال .. الشعر مصايب بوكلي والدفار والمكياج والصاك فاليد مهم مزيزة بالمعقول بحال شي عارضة ازياء ولا بنت زوير ؛ واقفة عوجة ويدها على جنبها . . . حيطات النضاضر وهي تشوف فيه مطلعة حاجبها ومخرجة عينيها كدور فراسها وضحك بشرانية
واءل : فاطمة الزهراء!!!
فاتي: هه.... عندي الخدمة ومشغول ?
كانت صدمة بالنسبة لواءل .. الدنيا دارت بيه الدنيا اما صاحبو بقا غير كيشوف هوا ورحاب ... ولا نقولو مريم صاحبتها اللي جاوباتها فالتيلي ومع واءل راسو منفوخ مادا ماجاب فالصوت . شافت فصاحبو وقال
فاتي: هانا جيت كتسناني ؟ كتين شي منقضيو ؟ هانا وصلت
كمال : جلسي اختي مرحبا
جات بغات تجلس هوا يشدها واءل ودمو سخون وجهو حمر وودنيه كيصفرو وغوت
واءل : تكعدي الاللة وشنو كديري هنا ...
كمال: اش كاين...
دفعو واءل: حاااايد يدك متحطهمش عليها راه مراااتي هادي
وقفات مغزفة : شدي الصاك . (لاختو لريحاب و هي تبدا ) باااااقي كتهضر يا عييييفت الرجااااااال .. يا الشماااااتة .... ياا الغدااااااار هاااااه
ضربات ديك الطبلة باللي فيها قلباتها وكلشي واقف كيتفرجو مخلوعين ... فاطمة الزهراء ولاو فيها عشرة . مااشي هي هادي فاتي الدرويشة ... وحتى واءل معصب وماحملش المنضر اللي دارت ليه ... ماعرف يحسح عليها ولا يساوي معاها .. دار عند مريم وقال بغضب
واءل : دايرينها علياااا هااا؟؟ لاعبينها عليا نتي وياها
شنقات عليه فاتي : شهاااااار .. شهااااار وانا كندي و نجيب معاك فالهضرة والتيليفونات ... شهر و نتا كتسنا تشوفني ... وباااااش بدلتيني باااااش هه بيا !! بدلتيني بيا !!!! حستب ليك انا حمااارة واش ماعرفش شكون انا وللا حساب ليك عاااط حطني الكار!!! هضر ولا دابا كترجل .... زعما راااجل ؟!!!! حصلتي دابا يا الغدااار هاااه حصلتي
هزات صباطها وبظا ضرب هنا وهنا كتلهت دارت ليه الشوهة كل شوية تزل عليه للراس بصباطها اللي فيديها وهوا كيتعرفت معاها ويدفعها مع الحيط باش يحيد ليها . قرب كمال يفك وهوا يدفعو واءل وساط فيه كاع داك الغضب
واءل : واجمع يدك از****** ديها فكرك ماتقربش ليها
نزلات عليه فاتي للراس بالطالون كتشتف : خليييه يقرب .. خلييييه وااااش بيني وبييينك تحكم فيا داااابا ... يشد منين ما بغا
واءل : بعصبية زير ليها يديها) فااتي ... براااكة من الفضيحة
فاتي: كدفع ) الفضيحة يا الكلب .... الفضيحة الخااااءن يا الشمالاتة كلشي يعرف ...كلشي خاصو يعرف نتا شكون (كتغوت بحر جهدها ) سمعوووووو سمعوووو ... هادا راااااااجلي . راااجلي و.. (سد ليها فمها)
واءل: فاااتي حضري عقلك (كينهج) بلييييز ديري عقلك وسمعيني
فاتي: عضاتو) طلق مني ماتشدنييييش ... ماتحطش عليا يدك ... شهر وانا صااابرة .... شهر . نفكرك اش كنتي كدير ليااااا ..هاااااا .. انا ناااعسة ونتا مع وحدة اخرى كتهضر فرحاااان .... انا مطيبة الغدااا ونتا داير مع وحدة اخرى تغدا ..... انا فالدار هازة ليك الهم ونتا برا عااايش ليا حيااتك .. عاااايش ليا الحب ...
واءل: غااالط .. غالط سمحي ليا
دفعاتو : متشدش فيا .. طلق مني ماتشدش فيا ... طلق الشماتة طلق
نزلات عليه بالتيلفون ديالها راسو لجبهتو حتى تشخشخ عليه ... قلبات عليه الدنيا بالغوات والناس كيفكو وهي كتقلب منين دوز ليه .. هرسات عليه الكراسة .. هرسات عليه الطبالي ودفعات على الكبالي دالناس ... فاتي مابقاتش كتشعر واللي جات قدامها كتهرسها ... كل مرة تعكل طيح وترجع تنوض ليه كتجبد فيه وتنقو باش توصل بيه وهوا وا كيهدن فيها ... دفلات عليه وخرجات حفيانة من الطازج ومريم موراه كتجري .. تبعها واءل حتى للطوموبيل وكملات عليه الباقي تما بالقميش والعضان والغوات . تدخلو الرجال كبار فكهم وبعدو واءل وهوا كولو دمايات من وجهو وواخا هاكاك باغي يهضر معاها .. جروه للتيساع باش تبرد القضية وطلعات فاتي فطموبيلتها من بعد ما فرجات فيه امة لا الاه الى الله .هي ومريم ومشاو من تما ..
مريم : وقفي جنب . وقفي بلاتي تبردي شوفي كي كترعدي ... وقفي غاتمشي دخلي فشي واحد تقتليه
وقفات فاتي فجنب الشارع وحطات راسها على الفولون كتبكي وتشهق وداتها كاملة كترعد
فاتي: شفتي الكلب .. شفتي يقدر يخوني مع 10 .. الحيوان الى خليتها فيه راني بنت الحرام والله حتى نكرهو فعيشتو
مريم : ندمت ... ندمت اختي تا شاركت معاك فهادشي والله . . . كن حساب ليا غنوصلو لهادشي والله منزيد معاك فيه.... محسابش ليا انا كاع واءل غايدير بحال هاكا .. مانويتهاش.
فاتي: ولاد الحراااام كاملين .. تعطيهم عينيك يطمعو ليك فالحجبان
مريم : ناااري ... غيكون مشا للدار غيحساب ليه مشيتي ليها
فاتي: خليه يمشي . غيلقا يدو والريح .. باش نعلمو الغدر كي داير
مريم : اش درتي ؟!!!!
فاتي : هزيت الرحيل كامل ديتو قبل مانمشي عندو ... خليت لمو غير الحيوط كيسفقو ... وغدا يلقاني واقفة كنتسناه عند القاضي .. مابقات بيناتنا عشرة وطاح من عيني متبقيتش حاملة نشوف فيه الشعرة
[23/1 19:07] بارت: رجعات فاتي بحالها نيشان لدار صغيرة سبق ليها كراتها وحطات فيها رحيلها حيت دار مها ماعندها فين تهز ليها حتى كرسي دخلات للدار وهي مقلوبة كل حاجة فين محطوطة ... كانت عارفة راسها اش باغا ولاياش باغا توصل . كرات الدار وجمعات لحوايج ومع خروج واءل من الدار الصباح عيطات على الدراري هزو ليها الرحيل وحولاتو لدار اخرى وهادشي كاامل بلا مايسيق بيها حتى واحد من دارهم لخبار. حطات واحد السداري جلسات عليه وسط داك الزحام وبدات تبكي وتلطم بالفقصة .. عمرها نواتو يغدرها ولا مع غيرها يخونها .. ولاكن هادشي اللي وقع معاها يقدر بعاودو مع غيرها وتجيه عادي .. كما قدرات تصيدو هي قادرة تصيدو وحدة واخرى .. شنو كان غيطرى لو طلعات بنت اخرى بنفس المواصفات اللي عطاتو .. اكيد كان غيشد معاها الخط وتمشي فاطمة الزهراء تكب الماء على كرشها . تصدمات صدمة العمر وحتى وحدة ماتقدر تصبر لهادشي اللي دازت منو ... شللات يديها منو ودابا واخا يحلفو ليها على سيد الرجال ماتعاود تيق . دارت كروة حمراء على الرجال كاملين ... كانت تحلف على واءل انه عمرو يفكر يغدرها ولا يشوف فغيرها ... كانت كتشوفو فمرتبة وواخا يحلفو ليها عليه فمكة ماعمرها كانت تيق ولا تمشي معاهم فالهوى .. ولاكن هاداك الانسان اللي كتشوفو من دون الناس بنضرة فشكل وماعمرو يجي فبالك انه يجي شي نهار ويغدر .. هاداك اللي كيحل عليه عينيه ويمسحهم من الجلاللة وكيقلب حياتك ويخليك تشك فخيالك .
بقات متكية راسها على الحيط كتراجع نفسها وما جرى ليها وتبكي بوحدها حتى صوتا ليها تيليفون فيقها من سهوتها .. هزاتو طلات عليه لقات باها اللي متاصل بيها . .صافي وصلاتهم الخبار وبااينة واءل مشا عندهم كيسول عليها . فتحات الخط وهي مافيها اللي يهضر وعارفة خبير واليديها وشغايقولو ليها وهضرتهم كدخل ليها من ودن وتخرج من ودن ماستاعداتش كاع تسمع ليها
فاتي بصوت مخنوق: الو ..
الاب: فييينك؟ اش هادشي درتي ؟ واش هادشي كيديرو بنات الناس؟ واش كاينة شي مرى دير هادشي اللي درتي ؟ الى بغيتي تغصبي اجي لدار باك وشكي ليه ... علاش تهزي الرحيل ومن الدار تخوي ليه؟
فاتي بصوت فشلان : شكووون قالك اصلا انا غانجي نغضب عندك ؟ انا اصلا ماناوياش نغضب ..باغا نطلق وماهزيت الرحيل حتى عارفة راسي اش باغا ندير
الاب: وااا نعلي الشيطان واش باغا طرطقي فيا شي عرق؟ اشمن طلاق راه مكاين بووو طلااق ... كاع الناس كيدابزو وكاع الناس كيتقاتلو ولا كن كيبقاو مجموعين ... ماشي كلمة زوج الطلاق .
سكتات مغنضة عينيها ماقيها اللي يحفي الحرجة مع باها . واخا تقول ليه اللي قالت ماغاديش يسمع ليها وسيرة الطلاق حتى اب مكيحملها ومايحملش بنتو ترجع عندو مطلقة
الاب: فينك دابا؟ اجي دااابا للدار
فاتي: انا مع صاحبتي مافيا اللي يجي
زعف وماكرهش يخرج ليها من التيلفون : واش غاتجي للدار ولا نوري لطاسيلت الصحبات... المرى المزوجة كتبات فدار باها ولا دار راجلها ... دابا تكوني عنظي ماتعاوديش معايا الهضرة .. .ايوا زوينة هادي قالك صااحبتي !!!
قطع عليها التيليفون وهي تنوض بالفقصة زدحاتو تاهوا مع الحيط ... اللول شخشخاتو فوق راس واءل وهادا ضربات بوه مع الحيط .
مشات لباليزتها جبدات جيلي طويل لبسانو باش ماتبقاش كتبوزة قدام باها بالدجين مزير ويبدا عليها بالهضرة وهي راسها منفوخ ماعندها ماعندها فين تزتزن الدبانة .
لاحتو عليها ودارت صندالو فرجليها .. اما صباط طالون بقا مشير فالطازج شكون تسوقليه
نزلات كتسوط من مناخرها .. عارفة راسها غتلقا تما واءل فدار باها كيتسناها .. دمها سخون وناوية على خزيت .. اللي بغا يوقع يوقع يكفي هادشي اللي وقع ليها وعمرها نواتو فحياتها
ديمارات الطوموبيل ونيييشان لدار باها مع جوايه المغرب . سطاسيونات ونزلات لقات طوموبيل دواءل حدا باب العمارة وهي تعقد حجباناها
فاتي : الله يعطيك شي موصيبة ضربك يا الكلب
طلعات لدرا مع الحلة دالباب سمعات صوت باها وواءل فالصالة . دازت فمها قبل ماتهضر معاها ودخلات عليهم لقاتهم جالسين بجوج .. شافيها واءل وهوا وجهو كحل هاز هم الدنيا والدين ... حنكو مقموش وعنقو فيه شرطة كويلة من دنو وعي نازلة تا غطسات فالتيشروط .
وقفات عليهم قدام باها وعينيها كيقطر منهم الشر وقالت بخال شافت عدوها
فاتي: علاش تابعني لهنا ؟؟؟ اااش باااغي مني نرد ليك حوايييجك ؟
وقف واءل وباها دقة وحدة كيهضرو بجوج ..واءل كيرطب الجو وباها طالع ليه الدم ماكرهش يضربها
واءل : مجايش على الحوايج والله ماجاي عليهم جاي باش نهضرو ونصفيو الخواطر
الاب: جلسي حتى تكوني فدااارك وغوتي فيها عندي هنا غتجلسي و تكمشي ماطلعيش ليا السكر راني على نقشة ... وديك المشية ديال صاحبتي والرحيل اللي هزيتي بووووووحدو
واءل : ماااشي مشكل فالرحيل اعمي واش حنا دابا غرضنا فالرحيل .. انا جاي عندها هي ماشي على الرحيل
فاتي بدات كترعد بالاعصاب ولا كيبان ليها باها و واءل بحال الشياطين وهضرتهم كتزيد تشعل فيها النار بحال البنزين .. مها جالسة ساكتة ودايرة يدها على خدها مالقات ماتقول وماعنظ صوتها فين يتسمع مع صوت الاب القوي والغضب ديالو
فاتي: غنجيكم من اللخر... (شافت فباها ) هاد الراجل حراام عليا وانا حرااام عليه ... والله ورجعتوني ليه حتى نقتلو ونمشي عليه للحبس ... وربي المعبود حتى نقتلو ونقتل راسي موراه .... ماحاملااااش نشوف كمارتو ولا نسمع صوتو ظظ قتلوووني .. دبحووووني ...سلخووووني ... وماااانرجش واخا تنطابق السماء مع الارض
واءل : عفام غير سمعيني .... اااه غااالط والله تا غااالط غير سمعيني .. نتي دابا معصبة خليك حتى ترتاحي و تبردي ونهضرو
فاتي: كتشير بيديها) فااااش غنهضرو فاااش فااش فاش ؟؟؟ واش با عااارف بعدا اااش درتي لياا ولا معااارفش
الاب: عاااود لياااا وراه هضرت معاه . . . داكشي اللي دار مكيدارش وراه عتارف بالغلط اللي دار وماعنرو يعاودها ... نعلي دالشيطان دابا (دار عند واءل ) سير معاها ردو الرحيل .. وديرو شي ولد ولا بنية يعمر عليكم راه قلة مايدار هي اللي كتجبد المشاكل ... كن دابا عندكم شي ولد كوراكم ملهيييييين معاه ماتفكروش كاع فهاد التخربيق ولا يجيكم للبال كاع
فاتي ودنيها بداو يصفرو وكتشوف فباها دغيا صفا الامور وسهلها وفك الجرة .. اش دير معاه دابا وهوا جاه هادشي ساهل .. اه حقا ما حقا الغلط كيوقع والمسامح كريم ! هادشي اللي خسر عليها .
جلسات فوق السداري شادة راسها بين يديها وباها كيرضي عليها ويصفي الخواطر
الاب : يالاه نوضي ابنتي نعلي الشيطان ... حتى الى عاودها مرة اخرى وانا ديك الساعة اللي غنتفاهم معاه .. نوضي سيرو رجعو الرحيل للدارو راه غتمرضو نتونا ونمرضو حنا وحتى واحد مايبقا فبالو هاني الى مصفاوش الخواطر
هزات راسها كترجف وقالت بشوية
فاتي: مغنرجعش ... وقتلتي يلا بغيتي تقتلتي ولا جري عليا لبرا باش تهنى ... هاد السيد هادا يطلقني ... يعطيني براتي ... انا مابقيتش حاملاه لاهوا لا ديك الدار.... ربي حلل الطلاق وانا منكدير حتى حاحة اللي حرام
جلس باها كيسوك وواءل واقف باغي يبكي
الاب : لا حولة ولا قوة الا بالله العلي العضيم ... سير اواءل دابا وخلي حتى لغدا يصبح ويفتح ... تكون هاظ العجاجة دازت .. ولا الى مكانش تما فين تنعس جلس بات معانا
واءل : ماشي مشكل غنشوف شي اوتيل ماشي مشكل فالمباتة (بتوسل ) نعلي الشيطان افاطمة الزهراء ... اجي نهضرو انا ونتي
الاب: هضري نتي وياه انا غنمشي نصلي العشاء ... وراه الطلاق مكااااينش باش تهني راسك .. واخا ضربيه معاه الحيط
ناض لبس واحد الصندالة دالميكة وسروالو قصير ومشا جر معاه الام خرجها وبقات غير فاتي قالبة وجهها كتزفر وصدرها كيطلع ويهبط .. قرب منها واءل حادر راسو ويالاه قال...
واءل : راه...
دارت مخرجة عينيها : مااااتهضرررررش معااايااااا..... سمعتي.... كرهتك كرهتك كرهتك .... واخا دير لي درتي .. واخا تموووووت عمرني نرجع ... انا وياك صافي سالينا وكاااع داكشي اللي بيناتنا صافي بااااح ضربتيه فالزيرو .... حتى باش نرجع ليك مكاينش علاش....... براتي تعطيها لي وانا مشامحة ليك فالزمر كامل .... باغا منك حتى ريال ... الناس كيطلقو بالمعروف ... انا غندير ليك الخلع .
قطعاتها فيه خلاتو ساكت مالقا يقول . ناضت من حداه دخلات لواحد البيت وسدات عليها فيه ماتعشات ماداقتو حتى دخلات عليها امها وجلسات حداها مربعة يديها
الام : اش واقع ببناتكم عاودي ليا من اللول حتى للخر.. باك راه دخل للبتو سد عليه و واءل مشا بحالو .. يالاه هضري شنو وقع
شافت فيها كتبكي وعينيها منفوخين وبدات تعاود ...
فاتي: قلت زعما اجي نجرب نشوف واش يقدر يهضر مع شي وحدة اخرى ... حليت واحد الفايس كاين عندي قديم وكنت ديزاكتيفيتو .. بدلت ليه السمية ودخلت كنجربو ... بان ليا فالاول بعقلو ساعة صدمني امي .. صدمني كان كيدخل للبيت ويسد عليه يبدا يتجمع وانا فالكوزينة كنرد عليه وربي اللي عالم بيا ديك الساعة ... غير كندخل عليه كيسد تيليفون ... تخيلي انا فالسبوع مع الناس ومعطلة والليل وماعيط حتى يسول فيا ... شاد التيليفوني وكيجاوبني فالواتساب ... نضت على سعدي ووعدي طلعت للسطح وطلعت واحد البنت كتقرا فالليسي معايا عطيتو يسمع الصوتو وقلت ليها تهضر باش سيدي ومولاي يسمع الصوت ... الناس فالسبوع ناشطين وانا فالسطح كنبكي كي الحمقة . جالس يسولني اش لابسة واش دايرة وباغي يهضر معايا فاليتيلفون ... عطيتو نمرة مريم وعاودت ليها كلشي وشداتو بالهضرة .. ماعقلش على صوت الاوديو وتاق وكيسيفط ليا فالبيزوات عاجبو الحال ... ومزيز ومفركس وغادي عارض عليها وانا مطيبة لغدا وكيكدب عليا قالك مشغول .. حتى وقفت عليه تما . (شدات وجهها بيديها) صدمنيييييي صدمنيييييي وماعمرني شكيت فيه فحياااتي .... كنت كنشك فراسي ونقول يمكن ماشي هوا . مشااات التقة مشاااات ومانقدرش نعاود نتيق فيه فحياتي على هادشي اللي دار فيا ... عمرني ضنيت يديرها هوا ويطلع منهم مكانتش باينة فيه ... هادي اخر باقا نتيق فشي واحد
الام : والله ما عرفت اش نقول ليك .. الشيطان دخل بيناتكم ... راه ندم كن شفتي باك اش دار ليه بالهضرة ماخلاش ليه .. بقا ساكت مقدرش يهضر ... والى جينا نشوفو .. راجلك كن ماكانش باغيك مغايشيش يعاود لباك كلشي ويسمع الهضرة ويرغبو يرجعك ليه ... كن مكانش ميتسوق ليك يعطيك براتك ومايسمعش كاع لهضرة دباك .. يديرها من الجنة والناس ويخرج يدور يشبع دوران اش بغا بيك وماعندو تا حاجة تربطو بيك
فااي: تا انا ماغنعطلووش ... يمشي يشبع دوران مع راسو .. كما دار ليا ليوم يدير ليا وغدا . راسي ضارني وغدا غنشوف شي واحد يشري مني ديك الثلاجة ونعطي فلوسها لشي محامي يرفع ليا عليه دعوة الطلاق .. كبرها تصغار