جلس حداها كيتجمع هوا وياها تا مشا الحال وناضت وصلها بطموبيلتها حتى للدار . سلمات عليه ونزلات طلعات فحالها ؛ اللقاء زاد قربهم من بعض وزادو تطلقو مع بعض اكثر ، عاود تاصل بيها بالليل وشد معاها الحديث .. شوية ..شوية شوية بدا كيفوتو الحدود الحدود ديالو ..
كمال : متكية ؟ ديري ليا بلاصة حداك
فاتي : ههه
كمال : اش لابسة بعدا؟
فاتي: لابسة حوايجي اش غنلبس!
كمال : زعما شي حاجة سيكسي ... الصهد هادا
فاتي: واييه وفيا النعاس .
كامل : ماقنطتيش بوحدك؟
فاتي: لا ولفت
كمال: نجي نونسك ؟
فاتي: مرحبا هههه
كمال هاني جاي
فاتي: خهه... غنخليك دابا .. الصباح فايقة بكري .. حتا لغدا ونهضرو
كمال : اوك بيزو
قطعات معاه .. لاكن حسات براسها كتجاوبو بزز .. يمكن حيت رجع كيهضر معاها بطريقة مارتاحتش ليها هي ماشي بحال من قبل ، حطات راسها على المخدة نعسات وماهي غير ساعة الا ربع وبدا الصونيط كيصوني فالباب .. ناضت دايخة من النعاس... يالاه طاب ليها النعاس وهوا يصوني الباب ، هزات بينوار طويل لبساتو وخرجات خايفة لوسط الدار وقفات حدا الباب وقالت
فاتي: شكووو؟؟!
كمال : انا كمال غير حلي
تصدمات وحلات ليه الباب بالزربة شافت فيه مصدومة وقالت
فاتي: كمال!!! علاش جيتي ياك لاباس؟
كمال: غتخليني واقف فالباب؟
بقات كتشوف مالقات ماتقول وخافت شي حد من الجيران يشوفها وهي تقول ليه
فاتي : منقدرش ندخلك الدار فيها الكامرات وماشي ديالي ... سير دابا عفاك قبل مايحل شي حد الباب يقول عليا شي كلمة خايبة ... سير عفاك
كمال : ياك نتي قلتي اجي؟ كتجري عليا دابا؟
فاتي : حاشا ولاكن غير ضحت معاك .. سير عفاك سير حتى لغدا
دفعاتو مخلوعة وسدات الباب وقلبها غيسكت ... ماحملاتش راسها وللحضة كرهاتو وكرهات التصرف ديالو ، مشا رجعات لبلاصتها نعسات وكتعاود السنيتة مخلوعة حتى داها النعاس . الصباح فيقها التيليفون كيصوني وفتحات الخط جاوبات
فاتي: الو ماما لاباس عليك ؟ كيدايرة كي داير با وخوتي كلشي مزيان؟
عيشة : كووولشي بيخير نتي مزيانة ؟
فاتي: الحمد لله مزيانة
عيشة : المهم راه فلوس لاصورانص خرجو على سلامتك ... شحال وهما كيجرجرو فينا . وباك راه مابغاش يقولها ليك ودار معاهم نهار الاثنين يدوزوهم ليه للبنكة و مع 10 دالصباح نهار الاثنين قالو ليه تجي تسنيي الوراق باش يدوزو ليه الفلوس .
فاتي: اويييلي علاش مقالهاش ليا؟!!
عيشة : قلتهااا ليك قالك مانتي بنتو ما هوا باك
فاتي: اييااااااه وفلوسي ياخدهم زوينة هادي !!!! انا نهار الثنين نكون تما .. ماشي بنتي ولاكن فلوسها حلال عليا .. انا بسبابو دكدكت فعضامي وكنت غنموت ودابا باغي يدوزهم لحسابو !!! تا هاد ولاد لحرام جرجرونا على هاد الفلوس يخخخ
عيشة : هاني علمتك .. وماتقولي بيه والو راه مافراسوش عارفة راه غير حصلتو وصافي اما راه مابغاش كاع يسييق لينا لخبار ..
فاتي: ولاهيلا زوينة هادي !!! ولي امري غير فلفلوس ! وفاش نسول على فلوس لاصورانص يقول ليك باقا حتى لعام الجاي حتى لعام اللي موراه !
قطعات مع امها وناضت مشات للخدمة .. ماعيطاتش لكمال ولا طاح ليها فالبال .. قضية لاصورانص ربجاتها وخافت باها يسرط ليها فلوسها وخيليها الله كريم وهي شحاال كتسنا فيهم يخرجو ليها . داز النهار وحتى كمال مسولش فيها ، حتى قربات تخرج باليل وهوا يسيفط ليها مسج وهي خارجة من الباب
كمال : راني مقلق عليك .. ومع ذلك ماسولتيش فيا . نازال منسيت داكشي ديال لبارح .
بقلت كتشوف فالمساج وهي تجبد تيليفونها عيطات ليه
فاتي: الو كمال لاباس عليك
كمال : واااالو افاطمة الزهراء مقلق منك
فاتي: ولاكن نتا عارفني بوحدي والدار ماشي ديالي وجيتي عندي ... صدمتيني والله
كمال : مهم ماعليش ..كنت بغيت نجي عندك مي لقيتيني عيان الى ساليتي دوزي نشوفك انا فلوتيل .. نعيط لعنوان اوك
[23/1 19:23] بارت: فاتي : بتردد ) واخا
قطعات معاه وبقات واقفة كتخمم .. طريقة كمال فالتعامل معاها تبدلات .. ولا كيدايقها ومابقاتش مرتاحة ليه .. علاش؟ علاش تبدل فاش جا عندها ؟ علاش كان ضريف وكلامو زوين قبل ميشوفها ... شنو الفرق؟ مابغاتش تحرجو بالاخص هوا جاي على قبلها يشوفها لاكن ضيافتو جاتها تقيلة على القلب حتى ولات تقول امتى يمشي وترتاح . شدات طاكسي رجعات بحالها للدار وسيفطات ليه مسج فالتيلفون
فاتي : سمح ليا راه دازت عندي صاحبتي وماصلاحش ليا نجي .. حتى لغدا انشاء الله ونتشاوفو بالنهار اوك .ديزولي
سيفطات المساج وخشات تيلي فالصاك مابغاتش تجبدو باش متشوفش الرد ديالو حيت باينة 100% مغاديش يعجبها الرد وغيدايقها .
رجعات بحالها للدار وبدات تجمع حوايجها باش تشد الكار ديال 11 داليل اللي غيديها لكازا . جمعات باليزتها ودخلات للدوش دوشات لحمها وخرجات لبسات دجين جديد قصير مع صبادري بيضاء وتيشوط كحلة مكتوبة بالابيض ودارت دفيرة جنب مع شوية دمكياج وريحة ، جرات باليزتها الصغيرة ومشات شدات الكار ناعسة فالطريق حتى وصلات وهي تعيط لمها فتيليفون من المحطة
فاتي : الو ماما ... انا فالمحطة دلكيران غانمشي دابا لشي اوتيل صغير نحط فيه باليزتي باش نسبقو قبل مايسبقني ...8 نكون فلاجونص نقاد مساءلي كاملين ... يالاه بسلامة
شدات طاكسي مع 6 دالصباح مشا لاوتيل صغير عادي حطات فيه باليزتها وخجرات بالزربة شدات طاكسي لاجونص .. عطات لاكارط ناسيونال عطاتهم كلشي بأنها اللي تعرضات لحادثة السير وديجا شوواهد طبية ديالها عندهم .. وقعات وسالات وعطات الكونط ديالها ليهم وخرجات رجعات فحالهها لاوتيل تفطر .
مع 12 ديال النهار كانت ناعسة كترد الصرف ديال النعاس اللي ماشبعاتش حتى كتعيط ليها مها
فاتي: الو ماما
عيشة : هيييه!! باك غياكل جنااابو قالك علااااش زعما تجي وديري شرع يديك .. واش كتحدايه ولا شنو .. ماعجبوش الحال ومارضاااااش من الصباح مابغا يسكت .. حس براسو تشمت
فاتي: ومالو هوا ومالي ياك نكرني علاش تابع مساءلي ؟!! صافي خليه يقول اللي بغا
عيشة : قالك فوقاااش جات وفين جالسة ... راه بغا يطرطق محشابش ليه كاع يخرج منك هادشي كامل ... بغا يحكمك ماعرف مي يدير ليك وانا قلت ليه مافراسيييش .. المهم فلوسك شديتيهم .. اسوا متعرفينس منعرفك حيت عارفة كن شدهم مكنا نشوفو منهم تا ريال ويقول باقي مشدهم ... بقا يغوت وقالينا تبيعني على بصلة ههه
فاتي: مانبيعو ما يبيعني يعطيني شبر التيساع نكون بيخير ... مافهمتش باغيني وماباغينيش؟ الى باغيني غير باش يدير فيا اللي بغا وينكدها عليا غير خليني هاكا حسن ليا .
دازت ليها دوزيام ابيل وقطعات تيليفون مع امها وجاوبات كمال
فاتي: الو كمال
كمال : سيفط ليك مسج لبارح مجاوبتيش وعيطت ليك مجاوبتيش .. مافهمتش مالكي؟ انا جيت عندك من كازا باش نشوفك ونتي كديري معايا بحال هاكا؟! واش ماباغانيش نجي
شدات جبهتها كتنهد وقال : اففف كمال ..كمال سمعني انا عندي شي مشاكل عاءلية ولبارح كنت مشطونة ناشي ماشي متبغيتكش ولا درتها ليك بلعاني ... شي حاجة خرجات ليا من الجنب شديت الكار بالليل وجيت لكازا .. راه عقلي عامر
كمال : كفااااش!!!!! وايلي على مشيييييتي لكازا!!!
فاطمة : الزهراء : اه حيت عندي شي حاجة ضرورية داكشي علاش جيت وغنبقا واحد السيمانة نشوف مي وخوتي شحال ماشفتهم ونقاد شي مساءل مع البنكة عاد ديك الساعة نجي .. غير سمح ليا اخويا والله
[23/1 19:23] بارت: كمال : وصافي مللي نتي فكازا غنرجع تا انا ماعندي ماندير هنا ... مهم نتلاقاو فكازا
فاتي: ان شاء الله .. الله يعاون وسمح ليا على هاد التسخسيخة
قطعات معاه ورجعات جبدات عليها بنعسة حتى للعشية ولبسات حوايجها وخرجات ، رجعات تهلا فراسها بحال اللي كانت قبل الزواج .. رجع باين عليها الخير من حوايجها والذهب اللي دايرة .. حويلقات صغار وسنسلة وكورميط فاليد وخاتم ووجها منور ولباسها غالي كتلبس ليمارك وتهز الصاك ماركة .. 5000 درهم اللي كتخلص كتمشي ليها غير فحوايجها كل شهر حاجة جديدة .. بلا خالتها اللي كتسيفط ليها من السعودية كل مرة 3000 درهم 4000 درهم فالشهر ... صفا وجهها من التعب والارهاق واخا الخاطر مزال مارجع لبلاصتو لاكن على الاقل ولات تاكل وتخرج وتسارا كي الناس . خرجات لابسة كولون رمادي وقميجة طويلة شوية فوق الركبة فالكحل والابيض وبالغين ديال ديو وصاك كوتشي صغير وريحة عنبر فانسي كتشم من بعيد . خرجات دازت صايبات شعرها بوكلي و مشات لقهوى جلسات كتسنى مها وختها يوصلو .. يالاه دخلو وهي تنوض عنقاتهم وبدات كتبكي ومها كتبكي حتى بردو على قلبهم وجلسو كيتجمعو .. بدات تسول على احوال العاءلة وعلى الحومة والجيران موحشة كازا وموحشة الحومة والعراسات اللي شحال ماتعرضات ليهم ولا مشات شافتهم .. اما مها كتسول غير عليها كفاش عايشة واش مرتاحة واش مخصوصة وتعاود على النكد اللي معيشهم فيه باها وديما النكير بحال الى مجلسهم عندو بالجميل .. دوزات العشية مع امها وجبدات شي براكة من الصاك عطاتها ليها واخا مابغاتش تشدها حطاتها ليها فاطمة الزهراء بزز منها خلات مها غير كتشوف
عيشة: البنات فيهم الخير على الدراري .. البنت عمرها تنسى مها اما الولد يجي شي نهار وينسى... البنت الى شرات كيلو داللحم تقسمو فالنص .. النص ليها والنص لمها .. الله يرضي عليك ابنتي .. سيري انا راضية عليك دنيا وأخرة عمرك تخيبي وعمر ربي يضيعك .. الله يرضي عليك ابنتي .. كل نهار ندعي معاك فصلاتي .. الى كان باك مابغاكيش انا باغياك ونضل نرضي معاك صباح وليل .. الله يفرشك ويغطيك بالرضى
باست فاطمة الزهراء راسها ومشات شدات طاكسي رجعات بحالها .
من اللحضة اللي حطات فيها راسها وعقلها وبالها مع واءل .. يمكن حيت كازا كتفكرها بيه .. يمكن حيت ماخلات هي وياه حتى قنت ومنين ما دازت كتفكر ايامتها معاه .
صبح الحال وناضت بكري .. لبسات سروال توب طالع من الكرش وواسع من لتحت وبودي قصير من الفوق بالخيوط من لكتاف واسع على الكرش جاتها اللبسة زوينة وانيقة فالازرق . صندالة دالصبع وصاكها وريحتها وخرجات طالقة شعرها وجامعة لافخونش منفوخة لقدام . ايلاينر فوق العين وجبدات شفترها ومشات تلاقات بمها وختها كيتسناوها .. شدو طاكسي ضاحكين فرحانين جيهت البحر يتغداو الحوت .. جلسو فالطبلة ضربو الحوت مع راسهم وبقاو تما حتى ادن العصر عاد ناضت مها كنوصيها ترد بالها وترجع بحالها لاوتيل بكري . تفارقو ومشا فاتي لمعاريف كتسرى ودور حتى عيط ليها كمال فالتيلي
كمال: الو فاتي .. فينك راه وصلت الصباح فين نتي؟
فاتي : انا فالمعاريف كندور .. توحشت كازة
كمال : وصافي فين نتي نديرو شي قهيوة ؟
فاتي: انا حدا ماكدو خديت شي حويجات وغادية كندور
كمال : تسنايني تما حدى ماكدو انا جاي دابا .. راه قريب ليك
فاتي: واخا انا غندخل ليه ناخد كلاص على بيدمن تجي .
قطعات معاه ودخلات خدات ماك فلوري وموني ديو و طلعات لفوق تجلس .. يالاه جات تجلس وهي طيح عينها على واءل جالس تما مع ولد وبنت كبار كيتجمعو قدامهم الماكلة كيضحكو ، باقي هوا هوا .. نفس البلية دالكاسكيط على راسو وسبورتيف .. دجين وتيشورط كحلة والفورمة .. ماتبدلش .. دورات وجهها كترعد قبل ميشوفها وبدات ترجف و ورجليها خواو بيها ماعرفات تنوض ولاتجلس .. خواو بيها الركابي ودارت بيها الدنيا وناضت وقفات بغات تمشي حتى كيوقف عليها كمال كيفرنس سلم عليها بالوجه وقال
كمال : مال وجهك صفر ؟ مالكي
فاتي : والو .. غير.. يالاه تمشيو
شد ليها فيديها لقاهم باردين وهي تالفة فبلاصتها وجلسها كترعد .. مابقات عرفات مادير
فاتي : يالاه نبدلو البلاصة..
بغات تنوض وهوا يشدها فيديها وقال
كمال : جلسي مالكي كترعدي
مع الشدة فاليد وهي صفرا عاطية لواءل بضهرها كيوقفو عليهم جوج عيالات بجلالبهم مخرجين عينيهم ..
- حصلتيييي يااااا ولد الحراااااااام ... ياااا الكاااافر ياااا الغداااااار
مع غوات مرت كمال اللي وقفات عليهم هي وحدة اخرى معاها كلشي تلفت ووقفات فاطمة الزهراء كترجف ماعرفات والو وتلفت واءل جيهت الصدع وهوا يتصدم ومن الصدمة وقف حال فمو
[23/1 19:24] بارت: وقف واءل كيشوف مصدوم فكمال وهوا شانقة عليه مرتو .. اما فاطمة الزهراء فكانت مدرقة بحيط خشبي مشبك وعاطياه بالضهر مشافهاش وركز مع كمال والفضيحة ديالو .. تصدمات فاطمة الزهراء ووقفات كترعد ماعرفات مادير .. داخت و هزات صاكها بغات غير تخوي البلاصة .. جراتها المرى اللي مع مرت كمال بغات تنتفها لاكن تدخل سيكوريتي والناس دماكدو واكتافات تخوي عليها مشروب كوكا كولا وكلاص ماك فلوري طلاتها كاملة ووسخات ليها حوايجها .. حرات فاتي وبقات ساكة حاطة يدها على فمها .. كلشي ناض وقف كيتفرج .. جروهم السوكيرتي لبرا كيدفعو فيهم وتسلات فاتي مهبطة راسها بالزربة دخلات للحمام اللي قدامها من جيهة اخرى وفلتات من عينين واءل اللي كان على شوية يشوفها .. دخلات سدات عليها وبدات تبكي وتشهق قدام المرايا مامتيقاش شنو شافت عينيها ومن الصدمة تبلوكات مقادراش تيق .. بدات تخوي على وجهها الماء وتحط يدها على صدرها كتشهق ، حوايجها توسخو وحالتها حالة .. كفاش غتخرج من تما قدام الناس .. كفاش غادي تشوف واءل اللي عند بالها شافها .. هزات الصاك اللي شرات فيه الحوايج ودخلات للطواليط بدلاتتهم بكسوة قصيرة حتى الركبة وخشاتهم فصاكها وخرجات كتنخصص للمراية غسلات وجهها ومسكات الكحل اللي ساح وجمعات شعرها سفنجة مخربقة لفوق . هزات صاكها وحوايجها ومشات جيهت الباب ..يالاه حلات الباب وهي تساطح مع واءل داخل للطواليط . دخلات فيه دخلة وحدة تا ضرها نيفها وهي تهز راسها فيه . .تصدم فاش شافها وبقا واقف بلاصتو مصمر .. اما هي هبطات راسها بغات دوز وهوا يشدها من يدها
في حين الحيحة نايضة قدام ماكدو ومرت كمال واللي معاها واقفين كيسناو فاتي تخرج .. المقاتلة نايضة بين بين كمال ومرتو . كيجرها وكترجع للباب باغا دخل ورجال الامن مانعيها وماعرفوش حتى شكون هادي اللي كيتسناو لداخل حيت طلعو فاللحضة اللي تدخلو فيها الناس وهربات فاتي للطواليط.
تلفتات عندو كترجف وقالت
فاتي: شنو بغيتي؟
تبسم والفرحة فعينيه وقال : فاطمة الزهراء ! ... لاباس عليك ؟
نترات يديها بغات تمشي وهوا يشدها
واءل : بلاتي فين غادية !
فاطمة الزهراء : طلق مني الله يرحم الواليدين .. مكنعرفكش متشدش فيا .
مشلت نزلات وهوا يتبعها .. يالاه خرجات وهي طير عليها مرت كمال بغات تنتفها وتدخل واءل دفعها ورد فاطمة الزهراء موراه وهي كترعد
[23/1 19:24] بارت: مرت كمال : كتخبااااي يا بنت الحراااام ... يا سراااقت الرجااااال
كمال : كيجر مرتو ) براااكة من الشوووهة ... يالااه
مرت كمال : طلق مني يا الكلب... طلق مني ومزاااال كتحامي عليها
خرجات ليها فاطمة الزهراء مخرجة عينها فيهم كتغوت
فاطمة الزهراء : فيييين كنعرفك ولا كنعرفووو واش مريييضة نتييي ؟!!!
واءل : مالهم معاك اش كاين؟
فاتي : ماعرفتش كنت جالسة فماكدو وجا هادا جلس حدايا باغي يتعارف ووقفات عليه هادي !!! والله ماحيت معاك ومكنعرفوش اصلا
كمال : رتاحيتي دابا .. راه مكنعرفهاااااش مابيني وبينها وااالو درتي الشوهة على والو
مرت كمال : سكت با الشلاهبي وانا قريت مساجاتك معاها كااامليين يا الكلب ... حييدووو ليوم نقتلها
وقف ليها واءل مخرج فيها عينيه وقال
واءل : واسيري سيري .. سيري بدلي الساعة بأخرى راجلك راه كيهضر مع النص بنات المغرب .. سيري الله يعفو عليك نتي وياه
شدات فيه فاطمة الزهراء من اللور كتستحمى بيه وكتشوف جوج عيالات باغيين ياكلوها وواءل واقف ليهم
فاطمة الزهراء : واااسيري الله ياخد فيك الحق نتي وداك راجلك خرجي ليا بوحدك وتشوفي شندير ليك يا البقرة ونتوما كتحاماو هااا
شدها واءل من يدها وقال : يالاه فحالك ... خليها تهلل بوحدها
شدات فيه خايفة وكتشوف فالناس كيتفرجو فيها .. يالاه بغات تمشي وهي تجرها وحدة من شعرها من اللور طيحاتها .. مع الدور جمع معاها واءل بتسرفيقة للوجه تا رعفات .. ناضت فاتي بالفقصة والغدايد طارت ليها على وجهها هبطاتو ليها بدافراها كامل وهي طيح غيبات ليهم فالارض .
تخلع واءل وتحنى عندها .. دارو بيها كيرشو عليها فالماء هوا وصاحبو والبنت اللي معاهم .. تخلع كمال والعيالات وبغاو يخويو البلاصة مللي شافو اقضية حماضت .. لاكن يالاه بغاو يمشيو وهوا ينوض ليه واءل شنق عليه وعطاه كلاك للحنك تل دار فبلاصتو وجر المرى اللي نتفاتها بيدو كان غيزطم فيها لو ما تدخلو الناس بعدوه كينهج ورجع عند فاتي بعد عليها الناس وهزها داها للطموبيل حطها اللور .. جلس حداه صاحبو وجلسات اللور شادة لفاتي راسها على رجليها البنت اللي معاهم وكسيرا كيطير بيها .
البنت : شكون واش كتعرفها؟
قال كيسوط : راه هي فاطمة الزهراء مرتي