💎 بارت : 80 💎
كانو ربعة كيقراو معاه فنفس المدرسة شاف فيهم و حدر عنيه بغا اتجاوزهم حتا رجعو حبسوه ..
شاب 1 : وجهك قاصح اخويا .. جاي كتمختر فالمدرسة من بعد الشوهة ديال باك
صخر : ( خنز فيه ) جمع فمك راه مكنجبدكش .. و حيدو من طريقي
شاب 2 : هههه التلميذ الذكي و المجتهد إلي كيضربو بيه المثل فالمدرسة .. صدق ولد نصاب و مجرم زعما المظاهر خداعة
صخر : ( شنق عليه ) با بزاف عليك .. متجبدوش على فمك
شاب 3 : و مزال كتعفر .. كنتي كتباها بباك الجنرال فلان و كلشي داير ليك الحساب .. ساع صدق مجرم مقطر كيضرب غير من لتحت
طلق صخر من داك إلي كان شانق عليه و ضار ضرب لاخر بلكمة لوجهو حتا رعفو .. ضوروه بربعة و ناويين على الشر أصلا مغددين عليه من زمان و ديما حاسدينو و كيتسناو الفرصة منين ادوزو ليه ..
خرج من لافاك كيضرب فبنادم و مكيشوفش قدامو وصلو خبار اعتقال باه و ناض من وسط المحاضرة .. ركب فالوطو و زاد طاير كيفكر غير فخوه و كيف غادي تكون حالتو الى ساق لخبار ..
حبس فران سيك أمام مدرسة صخر بانت ليه الجوقة مجموعة و خرج كيتمشا بخطوات مسرعة حتا شاف خوه كياكل الدق من عند شي دراري ..
طار عليهم كيضرب و ابعدهم على خوه كيبان ليه غير الظلام بين عنيه .. سخسخهم مزيان و نوض خوه من الأرض كيشوف فوجهو عامر دم جنب فمو كينزف و حاجبو محلول ..
سندو عليه و داه للوطو طلع و داز للمستشفى هو الأول دخلو حتا داواو ليه وجهو و خيطو ليه حاجبو بلاما انطق بحتا كلمة .. كان خايف من رد فعل صخر عارفو غادي اتدمر من هاد الخبر ..
خرجو من الصبيتار و رجعو للدار كيف دخل صخر بانت ليه الأم ديالو جالسة فالصالة و كتبكي .. مشا عندها كيجري حط يدو عليها هزات عنيها فيه و تخلعات من منظر وجهو تلاحت عليه عنقاتو و زادت فالبكا ..
واقف سراج متكي على الحيط و كيشوف فحالة مو و خوه كيف دايرة خبر اعتقال الأب ديالو صدمو لكن مقادرش ابين حزنو ..
مصبر راسو بزز باش ماينهارش و مو و خوه محتاجين ليه أكثر من أي وقت آخر هو الي ولى مسؤول عليهم دابا حتا ارجع ليهم الأب ديالو ..
بعد صخر على مو و سولها بقلق ..
صخر : ماما مالك .. علاش كتبكي ؟
روقية : ( كتقيس فوجهو ) شنو وقع ليك .. شكون دار فيك هاد الحالة ؟
صخر : ماشي شي حاجة .. غير دابزت مع شي دراري
روقية : علاش اولدي .. مموالفاش ليك ضارب مع حد !
صخر : كون عايروني منديهاش فيهم .. لكن باش اجبدو بابا على فمهم منسمحش ليهم
روقية حطات يدها على فمها و دموعها بداو اهبطو ..
صخر : ( كيحرك فيها ) ماما مالكي .. علاش كتبكي واش مريضة ؟
قرب سراج و جر خوه معاه دخلو لمكتب باهم ..
سراج : جلس بغيت نهضر معاك
صخر : شنو واقع .. علاش ماما كتبكي ؟؟
سراج : سمعني مزيان .. الواليد تعتاقل اليوم
صخر : شنووووو ؟؟
سراج : كيف سمعتي .. الواليدة منهارة و مخصكش تزيد على ما بيها .. نبغيك تكون راجل و تقوي راسك .. حتا ارجع لواليد
صخر : ( كيحرك راسو بلا ) لا لا ميمكنش .. كيفاش اعتاقلو بابا .. ياك هو الجنرال كيفاش ادخلوه لحبس .. هادشي مكاينش
سراج : الواليد بريئ و غادي اخرج إنشاء الله .. غير نتا مديرش فبالك
صخر : كفااااش منديرش فبالي و بابا دخلوه للحبس ظلم .. الجنرال بن يازيد ادخل لحبس واش ماشي لحماق هذا !!
خرج من المكتب كيجري تبعو سراج بغا احبسو لكن مبغاش ارجع ليه ركب فاللوطو و بغا اسوق راسو و هو معندوش رخصة السياقة ..
مكانش عند سراج خيار من غير اديه اشوف باه حينت مغاديش اتكرع ليه حتا اشوفو .. مسافة الطريق و كانو أمام مركز الشرطة خرج صخر كيجري و الي لقاه قدامو كيسولو على باه ..
منعوه فالأول و مخلاوهش اشوفو حتا اتاصل سراج بمحامي العائلة و صديق الأب ديالو فنفس الوقت ..
جا المحامي و قام بالإجراءات و سمحو ليهم اشوفو باهم .. دخل كل من سراج و صخر لإحدى الغرف بان ليهم جالس فوق الكرسي و مسند على الطبلة باين عليه مهموم ..
هز راسو و كيشوف فولادو باسف من هادشي الي كيدوز منو بسببو .. قرب عندو صخر و شد ليه فيدو وقفو و كيجر فيه ..
صخر : بابا نوض يالاه نمشيو .. علاش جالس هنا نوووض
إسماعيل : ( شدو من كتافو و قابلو معاه ) صخر سير مع خوك و رجعو للدار .. أنا غادي نفك هادشي و نرجع .. ( باس ليه جبهتو ) يالاه سير مباقيش نشوفك هنا
صخر : لا مغاديش نمشي الا و نتا معيا
إسماعيل : كون تسمع لهضرة .. متخلنيش نتقلق منك .. ( شاف فسراج ) دي خوك و دير داكشي إلي قلت ليك
💎 بارت : 81 💎
جا سراج جر صخر و خرجو من الغرفة كيتجابد معاه مبغاش اخرج ليه يالاه بغا اطلعو للوطو و هما اشوفو باهم مخرجينو بالمينوط فيديه بحال المجرمين .. طلعوه فالسيارة إلي كيديو فيها السجناء تحركات من تماك عاد فاق صخر من الصدمة ..
ضربها بجرية تابع السيارة كيعيط على باه و عنيه مغرغرين بالدموع موقف حتا تقطعات فيه النفس .. تحدر حط يديه على ركابيه كينهج و دموعو كيقطرو فالشانطي مقدرش احبسهم ..
وقفات اللوطو ديال سراج حدا صخر كلاكسونا عليه طلع صخر دار لحزام و تكا على الزاجة و مدارش جهة خوه نهائياً ..
غاديين فالطريق حتا وقف سراج فالسطوب و فتح صخر عنيه كيشوف فالبارك .. بانو ليه جوج بنات وحدة كبيرة و لاخرة صغيرة تكون عندها ديك 10 سنوات ..
بقا كيشوف فضحكة الطفلة الصغيرة ذات الشعر الأسود و عيون عسلية راكبة فالارجوحة و البنت الكبيرة كتدفع بها ..
سرح فضحكة الطفلة إلي باينة عليها غتموت بالفرحة و صوت ضحكتها واصل لعندو .. تحرك سراج و صخر بقا كيشوف فالطفلة حتا بعدو عليهم و مبقاوش كيبانو ..
وصلو للدار و طلع صخر لبيتو ديريكت كان هادئ غير سد باب البيت و هو يبدا اغوت و كيهرس إلي جات قدامو و دموعو كيطيحو ..
سراج و روقية واقفين ورا الباب كيدقو و اعيطو عليه باش احل لباب متسوقش ليهم و خرج لبالكون .. وقف مسند على لحديدة و كيشوف فنقطة وحدة و عنيه حمرين مشا منهم بريق السعادة إلي كان فيهم ..
**** دازو أيام و أيام تحكم على إسماعيل بالسجن المؤبد من بعدما نهالو عليه التهم من كاع الجهات غرقو ليه الضوسي من المزيان ..
صخر كان كيشوفو غير فاش كيحضر للجلسات تبدل و ولى وجهو ممحي من أي تعبير ..
الكل لاحظ التغيير فتصرفات صخر بحال إلى هزيتي شخص و حطيتي واحد آخر .. مي بسيف الأب ديالو و مثالو الأعلى دخل للسجن ضلما بحال شي مجرم و فينما مشا كيسمع الهضرة على باه ..
حتا رجع ساد عليه بيتو مبقاش كيمشي لا لمدرسة و لا للنادي التداريب إلي مكانش افلتهم حتا نهار مبقاش كيمشي ليهم ..
ضرب على شي حاجة سميتها التنس أي حاجة كانت زوينة فحياتو تخلى عليها خاصة فاش تحكم على باه بلي مذنب ..
هاد المرة مبكاش و مدار حتا ردة فعل حدو تبع باه بعنيه و هما مخرجينو بلباس السجن حتا غبر .. ناض خرج من المحكمة خدا طاكسي و مشا للمكانو المفضل الجرف إلي كان كيجي ليه هو و باه ..
وقف تماك لساعات كيشوف فالامواج و دماغو مبلوكي كان عايش حياة مثالية و فجأة عالمو نهار .. رجع للدار و سد عليه بيتو كيف العادة مبقاش كيخرج منو و وقتما هضر معاه خوه كيصدقو قالبينها ..
لكن المعاناة موقفاتش هنا بعد شهر من تحويل إسماعيل للسجن مات مطعون بسلاح حاد كيفاش وقع و شنو السبب ..
معطاوهمش راس الخيط حدهم قالو بلي ناض الشغب فالسجن و السجناء هاجمو بعضياتهم و تضرب بالخطأ .. الخبر نزل على روقية و سراج و بالأخص صخر كيف الصاعقة مزال ماستوعبو دخولو للسجن حتا جاتهم خبار موتو ..
الأيام ولات بحال بحال عند صخر و نفسيتو غير ما زايدة كتأزم سراج كيشوف فخوه و اتحسر عليه حتا هو حاس بالدقة لكن صابر .. قدر اتقرب لصخر من جديد بعدما كان كيتلقا غير الصد من عندو و حاول اساعدو استرجع حياتو و ارجع اكمل قرايتو و داكشي إلي كان ..
فأول يوم فاش رجع صخر للمدرسة كان عندو الباك داك العام تلقى المضايقات من عند زملاؤو إلي مكانوش افلتو الفرصة باش اهينوه ..
واحد النهار كان فحصة الرياضة واقف وسط ملعب كرة السلة كيلعب بالكورة ..
لابس شورط و تيشورت فالاسود و سبرديلة بيضة البنات واقفين حاضينو و كل وحدة تنعت فيه و تبتاسم .. كانو تلاتة الشبان نفس دوك إلي كانو هجمو عليه لاحضو اهتمام البنات الزايد بيه و معجبهومش الحال .. الحسد دارها فيهم و عند بالهم هو كيدير هاد الحركات باش الفت إنتباه الإناث ..
معارفينش بلي صخر محاسش بوجودهم و لا شنو ضاير بيه عايش فعالمو الخاص بيه .. واحد فيهم مشا كيجري و ضرب ليه الكرة حتا تلاحت بعيد هز صخر عنيه فيه غير شافو شكون و هو اخنزر ..
قرر انساحب و اتجنب المشاكل لكن شكون خلاك وقفو عليه دوك الجوج لاخرين و بداو الوحو هضرة كيف السم ..
شاب 1 : معندك قلب راجع بحال الى ماوقع والو .. منك أنا منبقاش نبان و لا نبدل البلاد
شاب 2 : خليه عليك دابا ابكي لينا هنا
شاب 3 : ابكي كاااع .. ولى مرية !!
شاب 2 : على مافراسكش الخبار إلي ضايرة .. خونا صدق مراجلش .. واش عمرك شفتيه مع شي بنت ؟
شاب 1 : ( ضرب يديه مع بعض ) و الاهيلا .. عليها كنقول الدري مكيشوفش فجهة البنات .. قول فيه اللعيبة ههه
شاب 2 : امم .. جاب الله باه مات .. كون عرف ولدو خرج ليه زامل كان غادي اقتل راسو نيت
الدراري : هههههههه
💎 بارت : 82 💎
كيف تجبدات سيرة الأب ديالو رجع واحد آخر ولى حمر و عنيه طرطقو فيهم عروق حمرين .. هجم عليهم بتلاتة كيضرب فهدا و هدا معاقلش على راسو كمية الغضب الي كان جامع خواها فهاد اللحظة ..
خلاهم منشورين كل واحد مبيس من جهة و خرج رجع للدار و دغيا وصلات خبار شنو وقع لروقية و سراج و خبروهم بلي غادي اطردوه من المدرسة ..
قرر سراج اخرج خوه من البلاد و اسفطو بعيد على الأقل إلى بدل المكان اقدر انسا شوية شنو وقع .. صخر معارضش غادر لبلاد و اختار أمريكا فين اكمل قرايتو ..
من داك النهار مبقاش حط رجلو فالمغرب حتا دازت 11 سنة عاد رجع كشخص آخر ..
رجع ظابط فالشرطة المغربية من بعدما درس و تكون فامريكا دار بلاصتو دغيا و اسمو ولى معروف و الكل كيعاود على كفائتو و ذكاؤو ..
فاش رجع للمغرب رحبو بيه بالاحضان عارفين واحد بحالو تكون على برا غادي انفعهم و احسن صورة الشرطة المغربية الي واصلة للحضيض ..
دازو عامين على مجيئ صخر و مكايناش القضية إلي اشدها و ميحلهاش حتا تكلف بقضية ' سفاحة الطريق السريع ' ..
و هنا تغيرات حياة صخر و خدات منحى آخر دخلات حياتو إنسانة غير عادية عرفها بجوج وجاه كره واحد و عشق لآخر ..
حيا قلبو من بعدما مات نهار مات الاب ديالو و دق لأول مرة لفتاتو إلي بغاها من أول نضرة بدون علمو ..
بعد مرور ثلاثة أيام من الألم و النزف مات دراكون موتة ديال لكلاب عمر و مراد تكلفو بالجثة ديالو و مدير السجن تعاون معاهم ..
صخر جاه من نقطة ضعفو و إلي هي عائلتو و قرر اتعاون معاهم رجعو جثة دراكون لزنزانتو و علنو بلي مات بسكتة قلبية .. كلشي تصدم من الخبر لا السجناء و لا حتا حلفاؤو إلي فالخارج و كاين إلي رتاح بسماع خبر موتو ناقص واحد ناقص مشكيل ..
صخر أول حاجة دارها من بعدما خرج من السجن هي مشا لعند الأم ديالو إلي غير شافتو تلاحت عليه تعنق و تبكي .. عام مشافتو عند بالها مشا لأمريكا و مباقيش غادي ارجع حينت كاعي عليها ..
لكن فاش شافتو رجع لعندها مبقاش طلقات منو بكات و باست و حضنات ابنها حتا شبعات حاولات تعوض هاد المدة إلي كانت جالسة على نار كتسنا رجوعو ..
سراج هو الوحيد إلي عارف فين كان صخر و منين شافو رجع صحا سلام عاد ارتاح و رجعات الإبتسامة على وجهو ..
ناضت روقية توجد و طيب بيديها و مخلات مدارت الفرحة مسيعاهاش و كانت وجبة العشاء وليمة على حقها و طريقها .. جلسو مجموعين صخر سراج روقية و إيلاف على مائدة الأكل مجمعين و كاع رجعات فيهم الروح بعدما تجمعو من جديد ..
عدم وجود صخر كان مخلي فراغ كبير حتا لو انو معايش معاهم لكن كان كيجي وقتما سنحات ليه الفرصة .. و عام مدة ليست بالقصيرة و حتا فاش مشا غادر فجأة و خلاهم مشوشين عليه ..
تسمع جرس الباب و شوية بدا كيتسمع صوت الكعب العالي كيتقرقب الكل وجه نضرو جهة الباب اشوفو شكون جا ..
وقفات جامدة و الصدمة على وجها فاش جات عنيها على صخر إلي جالس معاهم فالطبلة .. كانت عارفة بلي مسافر و مكانتش متوقعة تشوفو قدامها جات طل على روقية كيف موالفة حتا كتفاجأ بيه ..
مقدراتش تحيد عنيها عليه توحشاتو بلا قياس و كتشوف التغير فشكلو تزاد وسامة و إلي دارها كتجي معاه ..
روقية بدات تصفار و تخضار خايفة من ردة فعل صخر دورات وجها ناحيتو كيف لاخرين بان ليهم كياكل بهدوء و مدار حتا رد فعل ..
أسيل : ( عنيها على صخر ) سمحو ليا جيت فوقت غير مناسب
روقية : ( بتردد ) ماشي مشكيل .. لقيتنا عاد كنتعشاو ( شافت فالخدامة ) جيبي ليها طبسيل
أسيل : لا بلاش خاصني نمشي .. مرة أخرى
روقية : تعشاي معنا و ديك الساعات سيري
أسيل : بلاما نبزطكم .. خاصني نمشي .. بصحتكم
دارت غاديا حتا وقفها صوتو ..
صخر : الواليدة قالت ليك جلسي تعشاي .. اوى جلسي تعشاي و ديك الساع سيري الى بغيتي تمشي
💎 بارت : 83 💎
جمدات من وقع الصدمة صوتو و هضرتو كيتعاودو فوذنيها واش بصح هضر معها و قال ليها تجلس تعشا معاهم ..
توقعات منو اغوت عليها و اجري عليها كاع حينت آخر مرة تحلف فيها مباقيش تعتب فدارهم .. بقات واقفة فبلاصتها حتا حسات بيد جراتها ضارت و هي تلقى إيلاف ..
جاراها لجهة الطبلة و مبتاسمة ليها جلسات جنبها نيت و حدرات راسها على الطبسيل كتاكل بشوية و الصمت حتا واحد متكلم ..
صخر : ( وقف ) إلله اعطيك الصحة الواليدة .. توحشت طيابك كنا كناكلو الزبل فديك القرينة ماشي النعمة
روقية : بصحتك اولدي .. ( تفكرات هضرتو ) انا قرينة علاش كتهضر ؟
صخر : مديريش فبالك .. هاني طلعت لبيتي نرتاح
تحرك كيتمشا بنخوة أسيل بلاما تحس بقات متبعاه بعنيها حتا طلع مع الدروج و غبر .. دورات وجها لقات روقية كتشوف فيها مركات ابتاسمات ليها روقية و حركات ليها براسها زعما اكون خير ..
طلع لبيتو و دخل خدا دوش لبس شورط اسود قصير و تلاح فناموسيتو شدها كلها .. بقا كيشوف فالسقف مدة ضور راسو لمخدة إلي على يمينو و دوز يدو عليها ..
تقلب على كرشو و خشا وجهو فلوسادة كيقلب على ريحتها و صورتها مفارقاتش خيالو حتا نعس ..
~~ أصبحنا و أصبح الملك لله ~~
يوم جديد مليئ بأحداث مفرحة و حزينة فاق بكري كيف عادتو هبط لصالة الرياضة الي فالفيلا ترينا لمدة ساعتين طلع دوش و لبس عليه .. تيشورت بيض مع سروال كحل و جاكيط كحلا و كاط بيج رش ريحتو و خدا الفون و الكونطاكت ..
هبط كان مزال كلشي ناعس و ركب فاللوطو و توجه للمكان السري الكوخ إلي خارج المدينة .. وصل بانت ليه سيارة عمر فتح الباب و دخل هز الغطاء إلي فالارضية و مغطي بزربية هبط مع الدرجات ..
شاف عمر جالس فوق الفوطوي و هاز شي حاجة فيدو بحال كتاب .. عمر شافو و حط داكشي من يدو فوق الفوطوي و دار عليه مخدة صغيرة و ناض قرب عند صخر ..
صخر : جايب شي حاجة و لا والو ؟
عمر : ( قرب منو و عنقو ) على سلامتك بعدا .. دخلتي لجحر الحنش و خرجتي حي ما عندي منتسالك
صخر : ياكما توحشتيني ؟
عمر : لا بلعكس عاد شفت الهنا
صخر : اوى عطيني المفيد
عمر : آه فراسك دراكون معندو حتا حد لا عائلة لا أصدقاء .. حتا حد متسوق للجثة دفنوه غير فالغابة إلي قريبة للسجن .. و أكيد شركائو تبراو منو
صخر : هادشي قلتيه ليا لبارح فالفون .. و طلقني راه بديت نتعصب
عمر : ( كيحك راسو ) بالصح قلتو ليك .. وليت كنسا هاد الأيام
صخر : ( بصوت عالي ) غادي نعوق مك الى منطقتيش .. فين هي غديييييير ؟؟
عمر : ( شاف فجهة الفوطوي و رجع شاف فيه )
داز فيه صخر و مشا لجهة الفوطوي زف بديك المخدة و هز المجلة كيف شاف الغلاف خرجو عنيه .. ميمكنش العارضة الي فالغلاف هي نفسها غدير حبيبتو كيفاش و علاش و شنو كدير فالمجلة ..
فتحها و بدا كيقلب العدد ديال المجلة عامر غير بتصاورها تصدم و فرح منين شافها واقفة على رجليها و فنفس الوقت مفقوص و معصب ..
كيشوف فالوضعيات الي دايرة و التصاور الي واخدين ليها كيفاش حتا ولات عارضة فاش كانت كتفكر كمش المجلة فيديه بغا اتفركع ..
خنز فعمر الي كان واقف بعيد لا يجي اخوي فيه عصبيتو و خرج كيسوط ..
🌸 #كوريا_الجنوبية 🌸
من بعد داك النهار إلي نهارت فيه غدير رجعات غير كتسها و قليل فين كتضحك خاصة فاش كتفكر الحلمة .. شحال من مرة كتبغي تسول ركان على أحوال صخر و لكن كتردد معرفات شنو دير و حتا لخدمة مبقاتش كتركز فيها و شحال من عرض رفضاتو ..
جالسة فبيتها كيف العادة و كتقرا فكتاب سمعات الصونيت و ناضت لابسة غير بيجامة .. فتحات لباب و هي تلقاه قدامها تبسمات ليه واخة معندها خاطر ..
ركان : ( مخنزر ) زعما نتي غير ديال العصا .. علاش مكتجاوبيش على الفون .. مخلياني كنتشوا غير بوحدي
غدير : سمحلي .. مصدعيني من الخدمة و طفيتو
ركان : ( شدلها فيدها ) مالكي واش عيانة ؟
غدير : ماشي شي حاجة .. غير حاسة براسي بغيت نبقا بوحدي و نرتاح شوية
ركان : ديك الساع عيطي عليا و لا دوزي عندي للمصحة
غدير : مكاين لاش .. بغيت غير نرتاح شي يامات و غادي نرجع كيف كنت
ركان : سيري لبسي حوايجك نخرجو شوية
غدير : لا بلاش مافياش
ركان : ممنوع الرفض .. خاصك تخرجي الى باغة ترتاحي ماشي تبقاي بين ربعة ديال لحيوط .. ( قرصها فحنكها ) فين مشاو النصائح ديالي الالة لغزالة !
غدير : اوكي
💎 بارت : 84 💎
مشات غدير دوشات بسرعة و لبسات عليها شورط دجين قصير و تيشورت بيض واسع مع سبرديلة بيضة .. نشفات شعرها و طلقاتو دارت مايكاب خفيف و هزات صاكادو فضهرها ..
خرجات لقات ركان جالس فالصالة كيتسناها هز فيها عنيه و طلعها و هبطها بإعجاب جات زوينة و كيوت .. خلات ملاحظة لسوجين بلي خرجات مع ركان طلعو للوطو و تحرك غادي فشوارع سيول الخلابة ..
مدينة زوينة بزاف خاصة فهاد الوقت من السنة أشجار' Cherry Blossoms ' منتاشرة على طول الشوارع و وازهارها متفتحة بلونها الوردي و الأبيض .. داز ركان لمطعم شعبي و تغداو بمأكولات بحرية مصحوبة باطباق جانبية الي ضرورية فالمائدة الكورية حساء أرز و كيمتشي إلخ ..
كملو و طلبات غدير من ركان اتمشاو على رجليهم شوية خرجو غاديين كيهضرو و اضحكو .. خدات غدير الفون و بدا كتاخد فالسيلفيز عجبها الجو و ارتاحت شوية ..
كانت الدنيا عامرة بلي كوبل شي غادي شي جاي و شي كيتصور و شي كيتمعشق .. قرب ركان عند غدير و وقف من وراها و دار يدو على خصرها دخل راسو حتا هو فالسيلفي خداتها و هي كتضحك .. بعدات عليه جات ضور و هي تشوف خيال واقف بعيد عليهم و عنين مراقبينهم ركزات الشوفة و هو اطيح ليها الفون من يدها ..
كتشوفو هو بشحمو و لحمو واقف و كيشوف فيها فعنيها شوفاتو كانو قاصحين و عامرين غضب .. ولات كترجف كلها و عنيها تغرغرو بالدموع مكرهاتش تجري و تلاح فحضنو و تعنقو بكل قوتها ..
لكن خايفة و حتا شوفاتو زرعو فيها الرعب امكن عرف شنو دارت لمو و كرها و بحال والو جاي اعاقبها كاع الاحتمالات الخايبين دازو فبالها فهاد اللحظات .. ركان شافها واقفة و مركزة فبلاصة وحدة دور وجهو و هو إبان ليه صخر كحل بالعما كيتساءل شنو جابو لهنا و كيفاش عرف مكانها عاوتاني ..
لاحظ النظرات المتبادلة بيناتهم كأن الوقت توقف و غير هما بوحدهم الي كاينين تماك .. زير على يدو و كيلعن فحظو المكفس مجيئ صخر غادي اضرب ليه كلشي فالزيرو و امكانية أن غدير ترجع لصخر ميقدرش استحملها ..
نزلات دمعة على خدها و هي باقة فنفس الوضعية غمضات عنيها و زيرات عليهم فاش شافتو ضار و عطاها بالضهر و زاد ..
قلبها وجعها و هي كتشوف فيه كيبعد طاحت فالأرض و طلقات العنان لدموعها .. ركان جا عندها طاير هزها و هز الفون من لأرض و رجع لبلاصة فين باركة اللوطو ..
حطها فيها و هي غير ساهية و دموعها دايزين طلع و كسيرا غادي سايق معصب و خايف عليها كيلعن فصخر على مجيئو إلي دار فيها هاد الحالة ..
وصل للدار هبط حل ليها الباب و بغا اهزها منعاتو بيدها بلاما تهضر و دازت من حداه دقات الباب .. فتحات سوجين الباب دازت من حداها بلاما تهضر معها و دخلات لبيتها سداتو و تكات عليه بداو شهقاتها كيعلاو و نازلة بظهرها مع الباب حتا طاحت فلرض ..
غدير : ااااعععع .. ولى كيكرهنيييي .. اااااه علاااااش يااااربي علاااااش .. صخررررررر كيكرهنيييي هئ هئ
سمع ركان غواتها من الخارج عيا ادق و اعيط مبغاتش تجاوبو ضرب فواحد الكرسي و خرج زاعف و كيسب .. سدات سوجين الباب و مشات جابت الساروت الاحتياطي فتحات الباب و دفعاتو كانت غدير من وراه ..
سوجين : غديييير حبيبة .. خليني ندخل راك شوشتيني عليك
كحزات من على الباب دخلات سوجين و تحدرات عندها عنقاتها و كتبوس ليها فراسها .. غدير حتا هي شدات فيها بقوتها كتبكي و مرة مرة تنطق بسميتو ..
غدير : هئ هئ صخرر مشا و خلاني .. صخر مبقاش كيحملني .. منقدرش نعيش بلا بيه .. غادي نحمااااق هئ هئ
سوجين : ( بعداتها من حضنها ) آش كتقولي ؟ شنو وقع حتا وليتي فهاد الحالة ؟؟
غدير : ( كتشهق ) ش شفتو .. ج جا لهنا هئ .. صخر جااا
سوجين : صخر !!! واش داك الي عندك تصاورو فالفون ؟
غدير : ( حركات راسها باه )
سوجين : واش جا لكوريا .. فين شفتيه و شنو قال ليك ؟؟
غدير : مهضرش معايا هئ هئ .. كنت مع ركان فالساحة وسط لمدينة .. شفتو كيشوف فينا رمقني بنضرات ضروني فقلبي .. و ضار مشا بلا ميقول والوووو
سوجين : صافي احبيبتي .. باركة عليك من البكا .. ضروري الى ضحكتي شوية توخريها بكا
بقات كطبطب عليها عاوناتها توقف و دخلاتها لفراشها تقلبات على جنبها و غمضات عنيها .. خرجات سوجين كيف سدات الباب و رجعات غدير تبكي و تشهق اليل كامل مشافت النعاس ..
في اليوم التالي ناضت مدكدكة و عنيها منفوخين مشات لجيم مع سوجين غير بزز عندهم جلسة من هنا لتلاتة أيام ..
الي دوزاتهم كيف الزومبي البسمة اختفت من وجها و غير كتخمم و كتجنب كلشي حتا ركان .. جهزات راسها و مشات للشركة هي و سوجين دخلات لاستوديو و سوجين كان عندها التصوير فالخارج .. دازت لدريسيغ روم قادو ليها الشعر و المايكاب و لبسو ليها الزي الأول كان فستان أبيض سامبل و زوين ..
خرجات و هي تلقا عارض لابس سوت عرفات بلي الجلسة ديال ثنائي تعارفو بيناتهم و بداو الخدمة ..
وقف اللوطو قدام الشركة هبط و دخل بخطوات كبار مشا نيشان لاستوديو وقف حدا الباب و عنيه مشاو ليها ديريكت كيشوف فيها شوفات نارية ..
💎 بارت : 85 💎
واقفة كتبدل فالوضعيات هي و العارض مرة شادها من خصرها مرة منعنقها من كتفها كل مرة فين كيحط يديه .. غدير حاضر غير الجسم ديالها و العقل غايب كتحرك بحال الآلة و ممركزاش نهائياً حتا أنها مانتبهاتش لوجودو ..
و هو على شوية اتفركع محس الا برجليه قادوه عندهم و بدون إنذار جر غدير من بين يدين العارض .. و نزل عليه بلكمة لوجهو و مصدر رزقو خلاه منشور فلرض كينزف من شي قنت و كلشي كيغوت ..
جرها من وراه مزير على يدها بجهد و هي مشوكيا و كتألم من القبضة إلي داير ليها .. خرج من الشركة و جرها حتال لباركينغ وقف و دفعها على اللوطو ديالو حتا تزدح ليها ضهرها ..
هز يدو حتال لسما نزل عليها بصفعة تاريخية ..
صخر : تبارك الله علييييك .. مخليتي ليااااا منقووووول .. رجعتي تمشاااااي و نتي تفرعني .. هادي هي الخدمة إلي بااااانت لييييك هاااا .. زامل ابقاااا اتلمس فييييك و اعبز كيف بغاااا .. هدا رااااه التقحبين بالعلالي .. فااااش كن
غدير : ( قاطعاتو ) توحشتك
سكت و بقا كيتأمل فوجها و عنيها و فخدها الي حمر و مصورة فيه يدو ديك الكلمة باش نطقات فشلاتو و سرحات معاه ..
هجم عليها بدون سابق إنذار و تلاح على شفايفها كيبوس و اعاود .. لصقها مع اللوطو و حاكمها بجسمو حتا تنا ليها ضهرها و مالت للور ..
حط يدو مورا عنقها و قربها ليه أكثر كيمص فشفايفها بشوق و غضب .. قبلتو كانت عنيفة و مليئة بالحب فنفس الوقت و غدير من وحشها ليه ممنعاتوش و استسلمات حتا هي ..
مدة طويلة و هما باقي غارقين فالقبل المتتالية و الطويلة انفاسهم كتسمع منين و لين .. بعد على شفتيها بصعوبة صدرو كيطلع و اهبط فتح عنيه و شاف فيها بحدة ..
ضعاف قدام عنيها بلا ارادتو واخة حالفها فيها و لكن منين استرجع شنو شاف نهار جا رجع ليه داك الكم الهائل ديال الغضب .. شدها من دراعها بجوج و زدحها مع اللوطو كيهضر تحت سنيه ..
صخر : هادي هي الخدمة الي باغة تخدمي .. هادا هو حلمك أنك تكوني صحافية .. و لا صافي ضارت ليك فلخوا و قلبتيها تقحبين ( كيحرك فيها ) هضري
غدير : ( كتبكي و تحرك راسها بلا )
صخر : و داك الشياطة ديال صحيبك قابل ليك على هاد الزبل .. فين مشات الرجلة ياكما طيحها فشي قنت .. مخليك تبوزاي مع الزوامل انعلبوووووه
غدير : ص صخرر ي سمعن
صخر : ( دفعها ) آه سمحي ليا .. كنظن مبقاش عندي الحق نتدخل فيك .. و نتي عندك واحد أخر فحياتك و نسيتي هاد بنادم
غدير : ( كتحرك راسها يمين شمال ) هئ لا لاااا .. عم
صخر : كنحس بالغباء و انا جاي كنقلب عليك و تابعك بحال الكلب .. مي مزيان كان خاصني نشوف بعنيا باش نقدر نخرجك من حياتي فخطرة .. كنتمنا ليك السعادة فحياتك الجدبدة
دار ركب فاللوطو و تحرك بسرعة حتا تحكو الروايض فلرض خلاها مصدومة من هضرتو و آخر جملة كتردد فوذنيها يعني صافي كلشي سالة ..
دخلات للشركة و مشات للطوليت كتجري سدات عليها و عطاتها للبكا حتا بغات تسخف مشا بلاما يعرف شنو داز عليها فغيابو و شحال عانات و كانت محتاجة ليه ..
فهم داكشي كيف بغا بلاما اسولها شنو بينها و بين ركان كان خاصو استفسر هو الأول عاد احكم .. هي عمرها خلاتو اقرب ليها و لا امسها بطريقة حميمية كتعتابرو فمثابة صديقها و طبيبها الي خرجها من البؤس ..
لا أكثر و لا أقل علاش هو استنتج دغيا بلي بدلاتو و نساتو كيفاش استهان بان مشاعرها اتجاهو تكون بهاد السطحية و تنساه فهاد المدة القليلة ..
هي غير مزادت بغاتو كثر و تعلقات بيه فهاد المدة و كلمة توحشاتو قليلة باش تعبر على داكشي الي حسات بيه فبعدو عليها هاد العام ..
خرجات من الطواليت من بعدما غسلات وجها رجعات للاوستوديو و اعتاذرات ليهم و للعارض إلي نزف من نيفو ..
مقدراتش تكمل جلسة التصوير بدلات عليها و خرجات تمشات غير على رجليها غادة و مرة مرة طيح دمعة من عنيها ..
صخر رجع للاوطيل كيغلي الداخل ديالو فنزاعات واحد الراس كيقول ليه سير جرها و ديها معاك صحة و لاخر كيقول ليه خليها عليك .. قربك منها كيجيب ليها غير العذاب و التعاسة شفتيها كيف عايشة هانية و كتضحك استرجعات صحتها و حياتها ..
بدل حوايجو و خرج مشا لأقرب بواط دخل و جلس فمكان بعيد على البشار جابو ليه مشروب قوي كيف طلب ..
عمر كاسو و نزل عليه دقة وحدة و رجع عمر لاخر كيشرب و عقلو معها حاس براسو ضايع و معارفش شنو يدير .. جا لهاد البلاد على أمل ارجع حبيبتو معاه و اتجمعو فمرة حتا كيلقاها فحضن ولد خالتو و الضحكة مفارقاتش وجها ..
حس بألم كبير فاش شاف داك المشهد مخاصهاش تضحك مع حد من غيرو و لا تكون فرحانة و هي مع رجل آخر .. هي عارفة ركان كيبغيها و بقات معاه و علم الله شنو وقع بيناتهم هادو هما الأفكار إلي كانو كيضورو فراس صخر و كيحفرو فقلبو ..
شاف أقدام واقفين عليه لابسين كعب عالي أحمر طلع عنيه مع سيقان عاريين حتا وصل لوجه الشخص إلي واقف قدامو ..
كانت فتاة شقراء لابسة جيب قصيرة بالكاد مغطية ليها طرمتها و طوب قصير خصرها كولو عريان .. وجها دايرة ليه مايكاب جريئ ملامحها زونين و فصالتها حتا هي واعرة طويلة و رشيقة و عامرة من البلايص الصحيحة ..
صخر : ( هز حاجبو ) What do you want ?
..... : ( بالدارجة ) ممتيقاش عنيا .. صخر بن يازيد !!!
💎 بارت : 86 💎
صخر : شكون نتي ؟
...... : هادي أنا ياسمين .. معقلتيش عليا كنا فنفس النادي ديال التنس
صخر : ( هز كاسو كيشرب ) معرفتكش
ياسمين : أنا بعدا عاقلة عليك و بزاف كاع .. ممكن نضم ليك .. توحشت أيام المراهقة بالنسبة ليا كانت أحسن فترة
صخر : ( دار ليها اشارة تجلس )و أنا كانت عندي اكفس فترة
جلسات جنبو ملاصقة معاه خدات كاس و كبات ليها مشروب ..
ياسمين : ( رشفات من الكاس و شافت فيه ) فراسك كنت طايحة فيك ديك الساع .. كنت كنحماق على شي حاجة سميتها صخر و كنت كنتبعك و نراقبك من بعيد .. حتال واحد النهار جيت عندك كنتي مع خوك و ولد خالتك مديت ليك رسالة حب ههه .. و نتا مبغتيش تشدها من عندي مشيتي و خليتني بلاكة .. كن مخداهاش من عندي خوك كن حماقيت .. ( حطات يدها فوق فخضو ) عقلتي ؟
صخر : ( شاف فيدها و رجع شاف فيها ) لا معقلتش .. و هزي ديك اليد إلى باقي باغاها
ياسمين : ( سحبات يدها ) اححح نموت أنا فالقسوحية .. عندي الزهر فاش تلاقيتك من جديد .. عمرني نسيتك و آخر حاجة كنت نتوقعها هي نتلقاك فكوريا ههه
صخر : و نتي شنو جابك هنا ؟؟
ياسمين : ( عضات شفايفها ) الخدمة
صخر : ( تكا على الفوطوي و جبد سيجارة ) الى كملتي كاسك نوضي تكعدي .. باغي الكالم
ياسمين : باينة فيك مهموم .. شنو بان ليك نمشيو لشي اوطيل .. هنا فكوريا عندهم اوطيلات خاصيين بالعشاق
صخر : ( شدها من شعرها و قربها لوجهو ) شتي الأعصاب إلي فيا كلهم غادي اخرجو فيك الى مانضتي تقااودي من قدامي
ياسمين : ( شادة فشعرها ) ااااي .. اوكي اوكي غير طلق
طلق منها و رجع تشبح كيف كان ناضت هي غادة كتشوف فيه و عنيها تغرغرو .. مشات للطواليت سدات الباب و جلسات تبكي و تنوح هزات عنيها فالمرايا كتشوف فوجها الي ولى كولو مجخلط ..
ضربات لمرايا بيدها حتا تهرسات و يدها ولات كلها دم حلات الباب خارجة شافتها وحدة كانت داخة لطواليت و هي تغوت ..
كتشوف الزاج مشتت و الدم مقطر فالأرض رجعات كتجري منين جات .. أما ياسمين مكانتش مسوقة ليدها إلي كتنزف و خرجات من البواط ركبات فاللوطو ديالها .. جبدات علبة و خدات فاصمة لواتها على يدها و رجعات راسها اللور و دموعها غاديين ..
صخر كمل القرعة و ناض خرج ركب فاللوطو ديالو و ديمارا محبس حتال قدام الدار فين ساكنة غدير .. تقاد فالجلسة فاش شافها جاية هي و بنت آخرى باينة عليها كورية لابسين سيرفيت و هازين بلاستيكات فيديهم ..
كان باين عليها الحزن واخة كضحك مع البنت الأخرى ضرو قلبو خاصة فاش شاف آثار صباعو باقي مصورين فخدها .. زير على الفولون بيديه و كيلعن فراسو حينت مد يدو عليها ..
اما هي مشافتوش حينت اللوطو زاجها فيمي دازو من حداه و دخلو للدار تبعها بعنيه إلي ماليهم الشوق حتا تسد الباب خرج من اللوطو و وقف قدام الدار ..
مد يدو بغا ادق و هو ارجعها فاخر لحظة ضار بسرعة ركب فسيارتو و تحرك من تماك زاف ..
دخلات غدير و سوجين وجدو لعشا كلاو و كل مشات لبيتها كيف دخلات غدير و سدات عليها تمحات الإبتسامة من وجها .. مبغاتش تبين قدامهم بلي كتعاني و كضحك غير بزز باش ميسولها حد على شنو واقع معها ..
تكات ففراشها خدات الفون و دخلات لكالوري كتفرج فتصاورو كيف ديما .. كتزومي كل صورة و تأمل ملامحو و عنيها كيتجمعو فيهم الدموع و تختمها بالبكا حتا تنعس .. ديك الساع كانت فاصلاهم المسافة أما دابة فهو قريب ليها و بعيد فنفس الوقت ..
كيفاش حتا وصلو لهنا و علاش فينما تقول الدنيا ضحكات ليها كترجع تعقد الأمور و ابعدو على بعض و هما أمس الحاجة اكونو فجنب بعضياتهم ..
حطات راسها على الوسادة و كتفكر قبلتو ليها و كيف دابت بين يديه مكرهاتش كن توقف الزمن فديك اللحظة .. لكن ماشي كلشي كتمناه كيوقع ممكن اقدارهم عندها إتجاه مختلف و ممكتابينش لبعض ..
غمضات عنيها و نعسات على هاد الأفكار إلي رجعات تراودها من نهار شافتو من جديد ..
💎 بارت : 87 💎
** يوم جديد **
ناعس فوق الناموسية بشورط فقط و خاشي وجهو فالوسادة تحرك على صوت رنين الهاتف مد يدو لكوافوز هزو دوز الخط و حطو على وذنيه ..
عمر : امتا غادي ترجع ؟
صخر : ( بصوت صباحي خشن ) صبحنا على الله .. مال مك بايت تحلم بيا ؟
عمر : من الأحسن ترجع فاقرب وقت ممكن .. حينت خوتنا بداو كيهبشو من وراك .. واقيلة شاكيين بلي راك باقي حي
صخر : ( حل عنيه و تقاد فالجلسة ) اوكي .. غدا نكون تماك وجد كلشي
عمر : كلشي واجد خاص غير ترجع
صخر : ( قطع ) فااااااك
ناض خدا دوش و لبس حوايجو كاجوال رما عليه جاكيط كحلا و خرج من الاوطيل ركب فاللوطو و زاد نيشان لدار غدير .. وصل للشارع فين ساكنة و هي تبان ليه غادة جنب الطريق وقفات حدا الباساج بغات تقطع الشانطي ..
شعل الضوء الأحمر و وقفو السيارات تحركات غدير قاطعة الشانطي و صخر متبعها بعنيه حتا بانت ليه سيارة جاية بسرعة فائقة و قاصدة غدير ..
عنيه خرجو و بدون تفكير كسيرا و ضرب سيارتو مع لاخرى من الجنب حتا خرجات على الشانطي و دخلات فواحد البوطو .. الدخاخن طالعة و الناس كيغوتو هز راسو إلي تضرب مع الفولون حس بسائل نازل مع جبهتو حط يدو و لقا الدم ..
حيد الحزام و نزل كيقلب عليها بعنيه و الخوف لاعب عليه شافها طايحة فوسط الشانطي و مكتحركش .. مشا عندها كيجري هز ليها راسها و كيضرب بشوية على خدها .. دقائق فقط و وصلات سيارة الإسعاف الناس الي شافو الحادثة تاصلو بيها مخداتش حتا 10 دقائق و وصلات لمكان الحادث ..
جاو المسعفين كيفحصو غدير هزوها فالحمالة و غاديين بيها لسيارة الإسعاف صخر مطلقش من يدها .. بانو ليه مسعفين آخرين هازين الشخص إلي كان راكب فالسيارة الي كانت باغة ضرب غدير ..
كيف دازو من حداهم تصدم فاش شاف وجها رجع حمر و كيغلي مكرهش امشي اكمل عليها كانت ياسمين الفتاة إلي تلاقا فالملهى ..
ركب مع غدير فسيارة الإسعاف شاد فيدها و كل ساعة ابوس فيها حتا وصلو للمستشفى و دخلوها للطوارئ .. بقا واقف واقف فالخارج كيتسنا على اعصابو حتا جا الطبيب طمأنو عليها ..
الطبيب : ( الحوار بالإنجليزية ) المريضة بخير غير سخفات من وقع الصدمة .. و عندها جروح بسيطة بسبب الطيحة .. راه علقنا ليها السيروم كيف تسترجع وعيها امكن ليها تخرج
صخر : ( تنفس الصعداء ) شكراً دكتور
الطبيب : هذا واجب
مشا الطبيب و رجع صخر عند غدير فالمستعجلات حيد الريدو و جلس جنبها و شاد فيدها حاطها وسط يديه .. مر الوقت شوية و هي توقف عليه واحد الممرضة ..
الممرضة : ميستر تفضل معيا البوليس بغاو اهضرو معاك
وقف و سبقها للكولوار لقا جوج رجال شرطة ..
صخر : ( بالإنجليزية ) يااس
الرجل : معاك الظابط كيم .. نتا هو صاحب السيارة الي سببات الحادث ؟
صخر : اه هو هدا
المحقق : ممكن تفضل معنا
صخر : اوكي .. تسنا هاني جاي
رجع صخر لفين ناعسة غدير و المحقق متبع ليه العين .. خدا صخر حقيبة غدير الي حطوها ليها حدا راسها هز الفون و قلب على نمرة صاحبتها ..
سيفط ليها مسج من عند غدير و رجع الفون تحدر باسها فجبهتها قبلة طويلة و خرج .. مشا مع المحققين لمركز الشرطة دخلوه لواحد البيرو فين كاين الظابط ..
دخل صخر و من وراه الرجال إلي جابوه كيف هز الظابط راسو شاف صخر و هو انوض .. قرب ليه و عنقو عناق رجولي بقاو الرجال لاخرين غير كيبقللو فعنيهم مفاهمين حتا لعبة ..
الظابط : ( بالإنجليزية ) OMG .. لا لا ميمكنش .. صخر بن يازيد بشحمه و لحمه عندنا فكوريا
صخر : مشنق العنين باقي نتا هو نتا
الظابط : ناري فاش فكرتيني .. فيامات أمريكا اصاحبي .. شنو جابك لهنا ؟ ( شاف فرجالو ) فيناهوا خينا إلي سيفطناكم تجيبوه
المحقق : ( شاف فصخر ) هو هدا شاف
الظابط : ( بصدمة ) واات .. صافي خرجو شوفو شغلكم ( شاف فصخر ) جلس اصاحبي
صخر : مالك تصدمتي .. أنا هو مولاها
الظابط : و كيفاش وقع ليك ؟
صخر : ( كيهضر و مزير على يديه ) واحد بنت القحبة كانت غادي تخرج ف
الظابط : فمن ؟؟
صخر : فواحد البنت كتخصني .. و أنا نتعرض ليها بالوطو .. كن ما كنت تماك كانت غادي تصفيها ليها انعل جدبوها الحمارة لاخرى
الظابط : واش كتعرف ديك إلي وقعات ليها لاكسيدون ؟
صخر : واحد الحمارة تلاقيتها لبارح فواحد البواط .. قالت ليك كانت كتعرفني شحال هدا
الظابط : كتظن بلي كانت قاصدة ديك البنت و لا غير صدفة ؟؟
صخر : أكيد ماشي صدفة .. و لكن مغاديش تبقا فطاسيلت مها
الظابط : راه قالو ليا بلي كلات دقة صحيحة .. و محال واش تنجا منها
صخر : بغيتها تبرا باش نبرد فيها غدايدي .. نوري لحمارة مها كيفاش تجرأ تآدي شي حاجة ديالي
الظابط : صخر متهورش و خدم بالعقل .. كاميرات المراقبة صورو كلشي و مغاديش توجه ليك حتا تهمة .. إلى برات راه غادي نعتاقلوها بتهمة محاولة القتل
سمعو الدقان و دخل شرطي حط شي ملف قدام الظابط و خرج .. الظابط فتح الملف شاف داكشي و هو اهز راسو فصخر و مد ليه الملف ..
الظابط : مصيبة هادي
صخر خدا الملف و بدا اقلب فداكشي و اعاود و علامات الغضب بانو على محياه ..
💎 بارت : 88 💎
الظابط : سيفطهوم اجيبو معلومات على صحاب السيارات بجوج .. اوى الطرف الآخر و إلي هي البنت إلي خرجتي فيها كانت راكبة فسيارة مستأجرة ..
و رجالي مشاو خداو معلوماتها من لاجونص و عرفو فانا اوطيل كانت نازلة و هادشي إلي كتشوف لقاوه فغرفتها ..
كان الملف عامر بصور لقاوهم فحقائبها صور خاصة بصخر من أيام الدراسة حتا ليومنا هدا و كاينين صور مقطعاهم و ملصقاهم مع دياولها .. بحال كوبل مزوج و ملصقة جنبهم صور لدراري صغار و كاينين حتا صور عائلة صخر و صورة لغدير دايرة عليها كروة حمرة ..
الظابط : نهار حطيتي رجلك فهاد البلاد كان نهار جات فيه حتا هي .. كنظن بلي جات على قبلك و لا تبعاتك و بحال والو كانت فنفس الرحلة إلي جيتي فيها .. باينة عليها ' Stalker ' ( مطارة ) هاد الناس كيكونو مراض و مهووسين و السيدة طايحة فيك و ولات مريضة بيك .. و منين استهدفات البنت إلي كتعرف الا و حسات بلي بغات تاخدك منها .. خاصك دير احتياطك اقدر تكون حياتك فخطر و حتا الناس إلي ضايرين بيك
صخر : إلي مفهمتوش علاش عاد بانت و هي كانت مرقباني سنين هادي .. و حتا جيت لكوريا عاد جات لعندي
الظابط : تصرفاتهم كتكون غير متوقعة .. و اقدر قالت هادي هي الفرصة فين تعرف على راسها
صخر : تصرفات على أساس تلاقينا صدفة و قالت بلي جات على قبل لخدمة ههه .. هادشي إلي كان ناقصني .. شوف نقول ليك من السبيطار لحبس منبغيهاش تشوف الضوء .. المصبيطرة لاخرة مبانت ليها غير غديير
الظابط : متخافش .. هنا عندنا القانون صارم و مكيتعاتقش مع بحال هادو
صخر : ( وقف ) أنا خاصني نرجع للمغرب غدا .. غادي نمشي هاني حينت خليت الأمور بين يديك
الظابط : كون هاني
صخر : احفضك اخويا
الظابط : طريق السلامة
خرج صخر من تماك و غير مزاد صعر هاد المصيبة هي بقات ليه باش تكمل الباهية .. زاد حمل راسو مسؤولية شنو وقع لغدير بسببو كانت غادي تموت ..
رجع للمستشفى يالاه كان داخل و هي تبان ليه خارجة هي و سوجين و ركان هازها بين يديه بقا واقف بعيد عليهم و متبعهم بعنيه .. شافهم طلعو فسيارة ركان و تحركو ركب فاللوطو و تبعهم شافهم دخلو للدار بقا تماك مدة حتا بان ليه ركان خرج مشا فحالو ..
نزل من اللوطو دق فالباب حلات ليه سوجين دخل بلا حتا كلمة سوجين عرفاتو شكون سدات الباب و نعتات ليه بيت غدير وقف قدام بيتها للحظات حلو و دخل ..
كانت ناعسة فوق ناموسيتها و عاطياه بالضهر عنيه مشات ديريكت لدراعها إلي ملوية عليها فاصمة .. حسات بالحركة فالبيت دورات وجها حتا كتفاجأ بيه فبيتها غمضات عنيها و عاودات فتحاتهم لا تكون كتخايلو ..
منين حلاتهم من جديد تأكدات بلي فعلاً هو و ماشي مجرد تخيلات خاصة فاش جلس جنبها و حط يدو على راسها كيدوزها على شعرها ..
صخر : سمحيليا .. غلطت فاش جيت عندك لهنا .. منين عرفت بلي عايشة بخير و بريتي كان عليا نخليك و منكونش أناني لهاد الدرجة .. كن وقعات ليك شي حاجة بسبابي عمرني كنت نسامح لراسي .. نساي الماضي و عيشي حياتك و شوفي غير لقدام .. كنتمنا ليك السعادة
تحدر باسها من راسها بوسة طويلة خشا يديه تحت ضهرها و جرها عندو خشاها فحضنو و زير عليها بقوة .. استنشق ريحتها لآخر مرة نزلات دمعة من عنيه و ناض خرج من الغرفة بلاما اتلفت ركب فاللوطو و زاد ..
بقات كيف الجماد ممستوعباش شنو طرا حسات بلي عمرها باقي غادي تشوفو داكشي مناش كانت خايفة وقع .. الوعد الي عطاها بلي عمرو اتخلى عليها فين مشا ها هو ودعها و سمح فيها يعني قصة حبهم وصلات لنهايتها !!!
☆☆ خرج من المطار لقا سراج واقف حدا اللوطو ديالو كيتسناه استقبلو سراج بعناق حار بحال إلى حس بيه محتاجو .. ركب هو وياه و تحركو ..
صخر : ماباغيش نمشي للدار
سراج : اوكي .. غادي نديك لبلاصتنا المعلومة .. نيت شحال هدا ما سورفينا
بدل سراج الطريق و كسيرا خارج المدينة غادي فطريق جنب البحر الأزرق و رمالو الذهبية كتلمع كان منظر رائع خاصة لعشاق الشاطئ ..
وقف جنب فيلا صغيرة حدا لبحر هبط كيتجبد من بعدما ساق لمدة ساعات .. حل صخر الباب و خرج خاشي يديه فجيابو و تقابل مع لبحر وقف جنبو سراج و بجوج كيشوفو فالامواج الهايحة ..
سراج : بحال إلى عرفنا جايين .. شحال هدا ما شفت الأمواج عاليين بحال هاكة
صخر : ( الصمت )
سراج : شفتك رجعتي بوحدك
صخر : باركة من الهضرة و زيد وريني شطارتك .. قالو ليا كنتي تدرب من ورا ضهري
سراج : معندكش مع المركز الثاني .. اليوم تولفو احنيني
توجه كل من صخر و سراج لكاراج جبدو ألواح الركمجة و حيدو حوايجهم بقاو بالشورطات و توجهو للشاطئ .. كان البحر هائج و ماشي ديال العومان لكن ممتاز لهواة السرفين دخلو لداخل و بداو اركبو على الأمواج العالية ..
صخر خوا كاع طاقتو السلبية و حاول ارتب افكارو واخة كيبان ليه كلشي كحل بلا غدير .. مي باقي طريقو طويلة و عندو أمور تابعاه و واجبات إتجاه عائلتو مبغاش اكون أناني و افكر فسعادتو فقط ..
دوز النهار كامل هو و سراج فالبحر حاول معاه خوه اجبد منو الهضرة و اخليه اخوي عليه همومو لكن صخر اكتفى بالصمت و تجنب أسئلة سراج ..
💎 بارت : 89 💎
دوز صخر و سراج داك النهار فالبحر عاد رجعو للدار كيف وصل صخر استقبلاتو روقية بالاحضان و نقات ليه وذنيه حينت سافر بلا ميعلمها .. جلس معها شوية و طلع لبيتو دخل دوش و تلاح نعس دغيا من التعب ..
فاق الغد ليه لبس عليه جينز و تيشورت بلا كمام و لبس عليه جاكيط .. هبط لتحت لقاهم مجموعين على مائدة الفطور باس لمو راسها و جلس ..
روقية : مالك فايق بكري .. متقولش ليا غادي لخدمة .. رتاح ليك بعدا غير شوية و ديك الساع رجع
صخر : ( رشف من قهوتو ) الخدمة هي إلي رجعاتني
سراج : هي اليوم نشد الأخبار ؟ السي صخر غادي ابان فالتلفزة
صخر : ( وقف ) شدها و لا تشدك .. هاني مشيت
روقية : غادي ترجع لغدا ياك ؟
صخر : الواليدة راه غادي نرجع لداري
روقية : ( عنيها غرغرو بالدموع ) واش ماشي حشومة عليك تبعد على ميمتك .. نولي نرجع نشوفك مرة فالشهر .. علاش كتعاقبني هاكة اصخر علاش !
صخر : ( تنهد ) صافي الواليدة بلاما تبكي .. خلي ادوز اليوم و نرجعو نهضرو فهاد الموضوع
خرج ركب فاللوطو ديالو و تحرك للمركز ديريكت .. داخل كيتمشا بخطوات كبار خاشي يديه فجياب السروال إلي شافو كيتصدم كيفاش الظابط صخر بن يازيد حي ..
الصدمة كانت باينة على وجه أغلب رجال الشرطة متسوقش ليهم و توجه لقاعة الاجتماعات ..
دخل لقا عمر مراد و رانيا واقفين و العقيد جالس فراس الطبلة الي مكانش متفاجئ بظهور صخر .. لأنو هو الوحيد بجانب فريق صخر إلي عارف بلي باقي حي لقا عليه صخر التحية و جلس ..
العقيد : على سلامتك .. عمر شرح ليا كلشي .. مستاعد لهاذ الخطوة ؟
صخر : اتم الاستعداد
العقيد : ( وقف و مد ليه يدو ) بالتوفيق
صخر : ( صافحو ) شكراً سيادة العقيد
خرج صخر و فريقو و دخلو للمكتب ديالو كانت الطبلة عامرة بالمعدات .. حيد صخر جاكيط و لبس واقي الرصاص و صمطة إلي كتهز السلاح عمر المسدس و خشاه فبلاصتو .. نفس الشيء دارو الفريق لبسو واقي الرصاص و عمرو سلاحهم لبس صخر جاكيط و عطا أوامرو عاد تحركو ..
خرج سابق و ركب هو و عمر فاللوطو ديالو و مراد و رانيا فاللوطو الي من وراهم ..
تحركو للوجهة الي قاصدين مسافة الطريق و كانو أمام فيلا كبيرة .. نزل صخر و الفريق وقفوهم لي كارد حتا جبد الشارة ديالو عاد سمحو ليهم ادخلو ..
كان جالس على طبلة الفطور كيشرب قهوتو الكحلة لابس بيجامة و فوقها بينوار و هز الصحيفة كيقرا أخبار البورصة .. سمع الصونيت لحظات فقط حتا وقفو عليه بربعة كيف تعرف على صخر خرجو عنيه من بلاصتهم ..
صخر : ( جبد ورقة و خشاها ليه فوجهو ) مصطفى المجدي أنت رهن الإعتقال بتهمة إغتصاب و قتل الضحية بروج لأشقر
مصطفى : شنووو ؟؟؟ واش كتخرف و لا مالك ؟!
صخر : ( عطاه بونية حتا طوش دمو ) تحرك تقااود قدامي .. نوريك تخراف كيف داير .. مراااد !
تقدم مراد و دار المينوط لمصطفى و دفعو قدامو تبعوه و خرجو هكاك ببنوارو أمام الكارد الي مكان بيدهم والو قدام رجال القانون ..
طلعو مراد اللور ديال السيارة و هو غير كيسب و اتحلف بلي غادي اخرج عليهم كاملين .. تحركو من تماك مراد و رانيا رجعو بمصطفى للمركز اما صخر و عمر فمشاو للوجهة الثانية ..
بعد دقائق وقفو أمام فيلا أكبر من الأولى ضاير بيها صور كبير و حديقة قد الخلا و بوابة ضخمة .. كيف الأول نزلو و منعوهم لي كارد من الدخول حتا عرفو بلي هما ظباط و عندهم مذكرة عاد سمحو ليهم بالدخول ..
واقف صخر و عمر وسط الفيلا كيتسناو فجلالتو اخرج عندهم من بعدما دخل أحد لي كارد اعلمو بمجيء ضيوف غير متوقعين ..
خارج من المكتب ديالو لابس كومبلي كري مخطط و هاز سيكار فيدو كيتمشا بنخوة حتا وقف قبالت صخر ..
و بدورو تصدم من رؤية صخر حي يرزق لأن خبار موتو وصلاتهم أول بأول ..
..... : شنو شرف زيارتكم لينا ؟
صخر : ( بصوت حازم ) الوزير سعيد بن طبيب انت رهن الإعتقال بتهمة إغتصاب و قتل بروج لأشقر .. تفضل معنا
الوزير : ههههه نكتة زوينة هادي .. اغتصاب و قتل هههه .. آه و شكون هادي ثاني ؟
صخر : متخافش حتال للمركز و نعشو ليك ذاكرتك مزيان .. تفضل
توجه عندو عمر و بغا ادير ليه المينوط
الوزير : خطوة جريئة منك .. نتمنا متندمش على هادشي إلي كادير
صخر : ( بصوت عالي ) باركة من الهضرة و تحرك خلاص
كانو لي كارد واقفين و بغاو اتدخلو حتا دار ليهم الوزير بيدو اتراجعو .. مد يدو لعمر دار ليه المينوط و خرجوه طلعوه اللور ديال اللوطو و رجعو للمركز ..
دخلوه لغرفة الاستجواب من غير ديك الي كاين فيها مصطفى و بدون مقدمات بدا صخر استجوابو ..
صخر : ( جالس مقابل معاه كيشوف فيه بمكر ) واقلة تفاجأتي فاش شفتيني ؟
الوزير : ( الصمت )
صخر : آه نسيت .. باغي تلزم الصمت حتا احضر محاميك .. ماعلينا .. التهم إلي موجهة ضدك واضحة و مكاين لاش نديو و نجيبو فالهضرة .. حينت باقي خاصنا واحد .. و الي هو راس الحربة ( بعد صمت ) توران !!
💎 بارت : 90 💎
هز الوزير راسو فصخر بصدمة كيتعجب منين عرف بهاد الإسم بلاما احس على راسو رد فعلو أكد لصخر بلي غادي فالطريق الصحيح ..
صخر : سيكم توران قريب اشرفنا و نديرو ليكم نتوما التلاتة أحسن إقامة فالاوطيل إلي كنت نازل فيه .. راه 7 ستار و الخدمة ممتازة حتا المتعة موجودة غادي تبرعو ليا مع راسكم
الوزير : بقا تحلم .. معندك حتا دليل على هادشي الي كتقول .. غا داوي خاوي .. و غادي تندم على هاد الخطوة إلي درتي
صخر : ( فتح الملف إلي قدامو و دفعو ليه ) هاك قرا ليك شوية المفيد
نزل الوزير عنيه و بسرعة مد يدو و بدا اقلب فالاوراق و ممتيقش داكشي إلي كيشوف .. صدمة من الوزن الثقيل وثائق كتضمن الدعوة الأولى إلي رفعات بروج ضد الربعة إلي غتاصبوها و مذكورين بأسمائهم .. الحقيقية ما عادة 'توران' ..
و تفاصيل الواقعة هاد الضوسي إلي غبرو ليه الشفف بفضل نفوذهم و تدار آخر جديد بإسم واحد معندو حتا علاقة بالاغتصاب و مكانش كاع حاضر داك النهار .. فقط شد فلوس صحيحة باش اشهد بلي بروج نعسات معاه بارادتها و مكاين بو إغتصاب ..
صخر : السيد إلي رشيتو مشا عند الله .. صفاتها ليه "السفاحة" كيف كيقولو .. و حتا نتا كانت جاية نوبتك مي عند جد مك الزهر .. تخايل لقاوك مقتول فشي جايحة و *** مقطع ههه خايبة حتا فالتعاويدة .. ( ضرب على الطبلة حتا قفز الوزير ) و لكن خاتمتك غادي تكون اكفس من هاكة منين طحتي فيديا
الوزير : هادشي كولو مزور .. و باغين تلفقو ليا هاد الاتهامات باطل
صخر : ( وقف ) جلس تكونسونطرا مع راسك شوية .. هاني راجع ليك
خرج صخر من تماك و توجه للغرفة الأخرى إلي فيها مصطفى دخل و شاف فيه بحدة حيد الجاكيط و لاحها فوق الكرسي ..
مصطفى بدا ابلع فريقو هو من النوع الخواف و دافع جبهة و لكن عارف صخر آش كيسوا ..
صخر : مرحبا بيك عندنا .. عمر امنضرا قال شي حاجة ؟
عمر : نو شاف
صخر : اممم .. خصارة سيف اكون عندو اب بحالك .. مي كنضن تبرأ منك شحال هدا ياك .. طلعتي حيوان من الدرجة الأولى .. كون غير اكتافيتو بالسرقة و النصب و لكن لا .. زدتو حتا الاغتصاب و التحريض على القتل .. إنسانة بريئة مدارت ليكم والو و تعديتو عليها و خرجتو ليها على حياتها ( بصوت كيزعزع ) و حياة عائلتهااااا
صخر عرف مصطفى من النوع إلي مزاكيش مزيان و خاصو غير دفيعة باش اكر و هنا فين بغا العب عليه ..
مصطفى : ( كيترعد ) م م مدرت والو .. ا أنا مقتلتهاش
صخر : و لكن اغتاصبتيهاااا !!
مصطفى : ك كنت شارب و مكنتش عارف شنو كندير .. هما إلي سبقو و و أنا درت بحالهم .. م مقتلتهاش
صخر : شكون هادو ؟؟
مصطفى : آا .. شنوو ؟
صخر : صحابك إلي كانو معاك ديك الليلة
مصطفى : م معقلتش عليهم
صخر : هههه .. و بعدا صاحبك لعزيز عقل عليك و حط سميتك كاع .. الوزير سعيد بن طبيب !
مصطفى : ( بصدمة ) كيفاااااش ؟؟؟
صخر : كيف كتسمع .. راه فغرقة أخرى و اعتارف بكلشي و حتا إسمك حطو فوق الطبلة
مصطفى : ميمكنش .. الغدااار
صخر : مزال مصر تبقا ساكت ؟
قدر صخر اخلي مصطفى اعتارف بلي كان أحد المغتصبين إلي تعداو على بروج و اعتارف بلي الوزير حتا هو كان معاهم .. لكن فاش سولو على توران و شكون هو التازم بالصمت و بان الخوف على ملامحو ..
وقف صخر و خلا عمر اكمل معاه الإعتراف إلي بغا خداه رجع عند الوزير و دار معاه نفس القضية .. وهمو بلي مصطفى اعتارف عليه و قدر العب عليه حتا صدق الوزير معتارف و ذكر مصطفى معاه ..
و حتا هو مجبدش الطرف الثالث كملو معاهم و هبطوهم حتا دوز محاكمتهم و غادي اتحولو للسجن .. و القضية باقة مفتوحة و البحث على الشخص التالت صاحب لقب " توران " مزال مستامر ..
صخر أجل قضية الأب ديالو حتا اكمل قضية بروج لأنو مزال خاصو اتبت بلي تقتلات ماشي انتاحرات .. فمن بين الملفات المحضورة إلي قدرات توصل ليهم اسيل هو وثيقة تشريح جثة بروج ..
إلي كيتبت بلي ماتت مقتولة ماشي انتحار من غير الممكن تضرب يديها بجوج بديك الطريقة و بداك الضغط ..
و فالتشريح مذكور وجود آثار دماء و قشرة من جلد الإنسان تحت اضافر بروج و مكانوش كيخصوها .. إذن كينتاميو للقاتل فاش كانت بروج كتقاوم قدرات تقمشو .. صدر صخر أوامر إيجاد و إلقاء القبض على صاحب الحمض النووي إلي تعرفو على مولاه ..
بعد يوم حافل و متعب رجع صخر لفيلا دخل باللوطو هبط و داز من حدا الجردة كانو الأضواء شاعلين .. شاف جهة الجليسة الي فيها لي فوطوي و هي تبان ليه الأم ديالو و كان معها شخص آخر ..
حقق مزيان حتا قشعها كانت أسيل جالسة مع روقية مجمعين شافو فيه بجوج عنين أسيل لمعو منين لمحوه .. شير بيدو لمو و دخل مع الفيلا طلع ديريكت لبيتو ..
💎 بارت : 91 💎
وقفات سيارة بورش كحلا كتلمع قدام بناية ضخمة تحل الباب و نزلات كتمشى بالكعب العالي فالابيض .. لابسة فستان أزرق قصير و لاصق و هازة جاكيط فيدها دايرة نضارات شمسية و شعرها الاسود كيلعب بيه الريح .. دخلات مع المبنى و كل الأنظار عليها طلعات فالمصعد للطابق الأخير ..
خرجات و توجهات للمكتب شافتها السكرتيرة و اومأت ليها براسها فتحات الباب و دخلات راسها كتطل .. بان ليها جالس فالمكتب ديالو و مركز فشي وراق هز راسو شافها و ترسمات إبتسامة عريضة على شفايفو ..
ركان : مرحبا .. صباح زين هذا
غدير : ( دخلات ) هاااي .. كيجاتك المفاجأة ؟
ركان : أحلى مفاجأة
غدير : كانت عندي جلسة تصوير قريبة من هنا و قلت ندوز نشوفك
ركان : ( غوبش ) سو مجيتيش عندي .. غير حينت جيت فطريقك و صافي !
غدير : ( بابتسامة ) تماماً
ركان : و غير كذبي عليا
غدير : هههه حمق .. مشينا ؟
ركان : فين ؟؟
غدير : عارضاك .. 'Late Breakfast' ( فطور متأخر )
ركان : وايلي .. ( وقف كيلبس لفيست ) هي اللولة
تم خارج ركان و غدير من المكتب حتا وقفات عليهم السكرتيرة و مدات ليه واحد الجوا ..
السكرتيرة : هاد الدعوة عاد جات .. باينة مهمة داكشي علاش قلت نعطيها ليك قبل ما تخرج
شدها من عندها و دورها لقاها دعوة لحفل زفاف فتحها و جبد بطاقة ذهبية .. شاف الأسماء و خرجو عنيه ممتيقش داكشي إلي كيقرا دور وجهو ناحيتها و شاف عنيها على البطاقة .. أكيد قرات الأسماء و لكن مدارت حتا رد فعل حدها هزات راسها فيه و نطقات ..
غدير : مبروك على ولد خالتك
و رجعات كتشوف فالبطاقة إلي مكتوب عليها
《 دعوة حفل زفاف صخر بن يازيد و أسيل لدغم 》
غدير : ( خشات يدها فدراع ركان ) مشينا ؟
ركان : ( خشا الضرف فجيب الفيست ) ( بابتسامة ) يالاه
نزلو فالمصعد و كل ساعة ركان اشوف فغدير الي مدايرة حتا تعبير على وجها .. كونو طبيب نفسي فكيقدر افرز ملامح الشخص او شنو كيضور فراسو لكن غدير مكان باين عليها والو ..
لا حزن و لا فرح وجها خالي من أي تعبير تعجب من كونها مدارت حتا رد فعل .. طلعو للوطو و خدمات غدير الموسيقى و بقات كتغني مع أي أغنية دازت و الابتسامة على وجها .. وصلو للمطعم دخلو خداو طبلة و طلبو فطور متكامل كيف جابو ليهم طلبهم ..
باشرات غدير فالاكل و مجمعة مع ركان و هو غير كيشوف و كيحاول اقرا شنو واقع عندها لداخل حتا صدماتو بداكشي إلي قالت ..
غدير : غادي تحضر للعرس ياك ؟
ركان : معرفتش
غدير : لا خاصك تحضر لعرس ولد خالتك .. حشومة تردها فوجهم و هما سيفطو ليك لانفيت حتال لهنا
ركان : ميمكنش ليا نهبط لمغرب و نخليك
غدير : علاش غادي تخليني .. أنا أصلا غادية معاك
ركان : ( مصدوم ) متأكدة !!
غدير : وي غادي نمشي معاك .. باغي تحضر بلا رفيقة و لا شنو
ركان : غدير .. نتي بخير ؟
غدير : وي بخييير .. علاش كتسول ؟ ااااه هههه متخافش هداك ماضي و سالى شحال هدا
ركان : متأكدة باغة تحضري للعرس ؟
غدير : وي متأكدة .. ياك لعرس من بعد شهر .. غادي نخوي لبروكرام ديالي باش نكون فري و نرجعو للمغرب
ركان : إلي بان ليك
غدير : ( مسحات فمها ) هاني جاية .. نمشي نقاد مكياجي
هزات صاكها و توجهات لجهة الطواليطات تبعها ركان بعنيه حتا غبرات هز الفون و دوز لابيل ..
روقية : عاااش من شافك
ركان : خالتي صافا ؟
روقية : عاد مفكرني .. باينة وصلاتك الدعوة
ركان : آه وصلات هاد الصباح .. واش فعلاً صخر غادي اتزوج ؟
روقية : جاتك عجب يااك هههه .. واخة كان صعيب عليا نقنعو مي و أخيراً صخر غادي ادخل للقفص الذهبي .. و غادي ادي البنت إلي ختاريت ليه
ركان : آه مزيان .. الله اكمل بالخير
روقية : غادي تحضر ضروري
ركان : منواعدكش
روقية : و الله يامك و ماتجي حتا نغضب عليك
ركان : صافي غادي نجي انشاء الله
روقية : اوى هكاك .. آه قول ليا .. نتا امتا غادي نفرحو بيك ؟؟
ركان : ( بابتسامة ) على ما بان ليا قريب
روقية : هي كاينة شي حاجة .. كتخبي عليا ؟
ركان : نهار نجي غادي نعرفك عليها
روقية : متشوقة نتعرف عليها .. نخليك دابة تابعني شلا ما يدار
ركان : باااي العمر ( قطع )
غسلات يديها و جبدات أحمر الشفاه عاوداتو على شفايفها شافت فالمرايا و كتبات بلعكر شي حاجة .. رجعاتو للصاك و خرجات غادة كتمشا بانوثة ضربات بشعرها اللور و رجعات لطبلتها ..
دخلات واحد البنت للطواليت و وقفات قدام المرايا بغات تقاد حوايجها حتا لمحات الجملة إلي مكتوبة ..
' What doesn't kill you .. makes you stronger '
( إلي مقتلاتك .. كتقويك )
💎 بارت : 92 💎
رجعات جلسات فبلاصتها شاف فيها ركان و إبتاسمات ليه و خدات لكلاص كتاكل فيه ..
ركان : امتا نزلو للمغرب ؟
غدير : ( كتاكل ) إلي بان ليك .. حتا إلى بغتينا نمشيو من غدا معنديش مشكيل
ركان : اوكي .. الأسبوع الجاي نهبطو
غدير : مزيان
كملات غدير الديزيت ديالها و ناضو خرجو ركبو فسيارة ركان حتال لقدام المصحة .. ودعاتو و خدات اللوطو ديالها و رجعات للدار فتحات الباب لقات سوجين جالسة فالصالة و دايرة ماسك لوجها ..
غدير : هاااي
سوجين : ( ناعسة فوق الطابي و دايرة لخيار على عنيها ) حبيبتي جات .. علاش تعطلتي مت بالجوع و أنا كنتسنا فيك
غدير : دزت عند ركان و تغدينا بجوج
سوجين : خائنة .. و أنا إلي جالسة نتسنا فيك باش نتغداو بجوج
غدير : سوري بيب .. نعوضها ليك مرة أخرى
سوجين : غادي نسامح ليك فحالة وحدة
غدير : شنو هي ؟
سوجين : طيبي ليا ديك ر رفيجا
غدير : هههه الرفيسة ؟
سوجين : آه .. هاديك .. بنينة بزاف .. غدا طيبيها ليا اوكي
غدير : إنشاء الله
سوجين : اي لوف يوو
غدير : فراسك السيمانة الجاية غادي نرجع للمغرب ؟
سوجين : ( تكعدات و طاحو ليها الخيارت من عنيها ) وااات .. عاودي شنو قلتي مسمعتكش مزيان
غدير : متخافيش ماشي غادية فخطرة .. راه غادية غير مؤقتاً و غادي نرجع .. غادة مع ركان خاصنا نحضرو لعرس ولد خالتو
سوجين : اوى هكاك .. ( وقفات و جات عندها عنقاتها ) نمشي معاكم .. بغيت نشوف لمغرب و التيتيز المغربي
غدير : أكيد غادي تمشي معنا .. ميمكنش نمشي بلا بيك
سوجين : ياااي .. we gonna have fun ( غادي نشطو من داكشي ) آه شكون غادي اتزوج قلتي ؟
غدير : ولد خالة ركان .. صخر
سوجين : اااه مزيان ( طلعات معها ) شنوووووو ؟؟ بلاتي بلاتي .. عاودي شنو قلتي .. شكون غادي اتزوج ؟
غدير : صخر ولد خالة ركان
سوجين : ( قابلاتها معها ) واش صخر صخر .. داك إلي على بالي و بالك ؟؟
غدير : ( حركات راسها باه ) اممم
سوجين : ( حلات فمها حتال لرض ) لا متقوليش ليااا !!! واش نتي بخير ؟
غدير : هههه علاش كلشي كيسولني نفس السؤال .. عادي أصلا هادشي الي خاصو اكون .. كل واحد اشوف حياتو أنا و صخر ممكتابينش لبعض
سوجين : ( عنقاتها )
غدير : هههه .. نزل عليك الحنان فخطرة .. حيدي عليا خنقتيني
سوجين : Will you marry me ؟ ( تزوجي بيا ؟ )
غدير : Hell yes ( قاااابلة )
سوجين : غير ضحكت معاك و نتي باغة تلصقي .. أنا باغية شي تيتيز مغربي حرش .. ( كتعبر بيديها ) اكون سمر و عندو اللحية و العضلات و..
غدير : ( دفعاتها ) لقيتو حتا أنا .. ( غادة لبيتها )
سوجين : و نتي عندك و قدام عنيك غير مبغتيش
غدير : وا فااااك يووو
سوجين : يو كانت ( متقدريش ) هههه
فهاد الأربعة أشهر غدير رجعات أقوى و انضج كاع داكشي إلي مرات منو خلى شخصيتها تبني مناعة ضد المشاكل و المطبات ..
كيف كيس الملاكمة محدك كضرب فيه بالجهد هو عاد مكيرجع عندك باندفاع أكثر .. أكثر حاجة أثرات فيها هي ذهاب صخر لكن من بعد داك النهار إلي جا زارها فيه مرجعات درفات حتا دمعة ..
تقبلات الوضع و عرفات بلي البكا و النواح معندو فين اوصلها عانات بما فيه الكفاية .. الآن جا وقت تكمل حياتها و تبني مستقبلها و تشوف غير لقدام ..
كملات فمجال الأزياء غير هاد المرة كانت أكثر حدر و كتختار بعناية نوعية جلسات التصوير .. معرفاتش علاش مي كلام صخر إلي عرفاتو كان نابع من الغيرة بقا مرسخ ليها فراسها و كدير بحسابو ..
علاقتها مع ركان زادت قوات و قليل فاش كيتفارقو كيشوفو بعض تقريباً يومياً .. و لكن عمرها عطاتو آمال فانهم اكون أكثر من أصدقاء و كتوصل ليه بطريقة غير مباشرة بلي مكتفكرش فيه بديك الطريقة ..
ركان بدورو كان سعيد أنها فجنبو و عمرو يأس و لا مل من أن غادي اجي شي يوم تشوفو كرجل ماشي كمجرد صديق ..
اما صداقة غدير و سوجين توطدات أكثر و لاو بحال الخواتات غدير لقات فيها داك الحنان إلي افتاقداتو من بعد موت بروج ..
💎 بارت : 93 💎
... سوجين كونها حتا هي وحيدة رجعات غدير عائلتها و توأمها واخة بجوج من بلدين و ثقافتين مختالفين و لكن صداقتهم تجاوزات هادشي .. بمساعدة سوجين غدير ولاو عندها عقود عمل لا تعد و لا تحصى من شركات مختلفة و ولى عندها مدخول هائل ..
الفلوس مهموهاش قدما همها الإحساس إلي حساتو فاش رجعات تعتامد على راسها و تهز راسها بدون تفكير فالمصاريف ..
أول حاجة شرات هي سيارة بورش سوداء من ديما كتعجبها و كانت تشوفها غير فالتصاور .. و كانت تاخد قدر من المال كل شهر و تسيفطو للمغرب و بالظبط لجمعية خاصة بمرضى السرطان ..
عمرها نسات المعاناة إلي مرو منها فاش كانت الأم ديالها مريضة بالسرطان و قلة الشيء و المصاريف الغير متناهية ..
و منين ولات تدخل الفلوس بغات تساهم و لو بشوية و تعطي للناس الي كيمرو من نفس الضروف إلي مرات منهم .. فكلما عطيتي ربي كيرزقك بأكثر و ازيد و ابارك ليك فأي حاجة درتيها ..
★★ بعد أسبوع
هابط من الطائرة كل من ركان غدير و سوجين دخلو للمطار دازو من الإجراءات و خرجو توجه ركان لعند واحد الراجل ..
خدا من عندو الكونطاكت ديال اللوطو حط الشانطات ديالهم كاملين فالكوفر و طلع ركبات جنبو غدير و سوجين طلعات اللور ديمارا اللوطو ..
غدير : دينا لشي أوطيل
ركان : حماقيتي و لا مالك .. و داري لاش صالحة ؟
غدير : اوكي .. الي بان ليك
ركان : و الله الى قالت ليك دينا للأوطيل !!
غدير : ( ميقات فيه ) اوى صافي
ركان : باش مباقيش تعاوديها مرة أخرى
غدير : Okey I get it .. ( صافي فهمنا )
سوجين : ( خرجات راسها بينهم ) واخة مفهمتش شنو كتقولو .. مي كتناكرو بحال شي كوبل مزوج ههه
غدير : ( ضرباتها على فمها ) رجعي بلاصتك باركة من الهضرة الخاوية
ركان : ( مبتاسم ) خليها تقول إلي بغات
غدير : عجبك داكشي إلي قالت ياك ؟
ركان : آه علاش حتا ميعجبنيش .. و مكرهتوش اكون بصح
غدير : الله انجيني .. نتزوج بواحد معكس بحالك .. أنا نشرق و نتا تغرب
ركان : و غير تزوجي بيا و جربي .. إلي قلتيها هي إلي تكون
غدير : ( قلبات الموضوع ) واش قربنا .. فراسك عمرني جيت لدارك إلي فالمغرب ؟
ركان : آه .. مي اليوم تشوفيها غادي تعجبك
سوجين : ( مخرجة راسها من النافذة ) واااو المغرب شحال زوييين .. عندو جو فشكل ماشي بحال كوريا
غدير : دوزي فيه الصيف و ديك الساع هضري
سوجين : علاش ؟؟
غدير : العااااافية .. نتوما فكوريا كتكون الحرارة 30 درجة و كتموتو بالصهد .. اوى الالة هنا مكاين غير 40 لفوق .. الشوااااية
سوجين : No way !! ( ميمكنش )
غدير : امكن احبيبتي
سوجين : زعما قلت نجيو شي صيف ندوزوه هنا ساع خلعتيني
غدير : نجيو علاش لا .. الشمال كيكون مبرد شوية و الجو ديال البحر مغاديش تحسي بالصهد .. غير مراكش و فاس فوتيهم فالصيف ههه
ركان : تليقي Guide هههه
غدير : ( ضرباتو على كتفو ) نتا ديها فسوقانك
بعد لحظات وصلو أمام فيلا متوسطة الحجم مي زوينة جات فمنطقة معزولة و مافيهاش السكان بزاف جنبها فيلات قلال و بيناتهم مساافة ..
حل ليهم العساس الباب و دخل ركان للداخل جا العساس لقا التحية على ركان و هز الحقائب هو و الجارديني دخلوهم للفيلا .. غدير و سوجين تبعو ركان و دخلو للفيلا إلي كانت مفرشة على حقها و طريقها ..
غدير : دارك زوينة
ركان : مزيان منين عجباتك ههه
سوجين : فين هو بيتي .. بغيت نرتاح كنموت بالنعاس
ركان : ( عيط على الخدامة ) وجدتي البيوت إلي قلت ليك
الخدامة : وي ميستر ركان
ركان : طلعي وري للبنات بيوتهم .. ( شاف فالبنات ) دوشو و ارتاحو .. منين اوجد العشا هبطو
داكشي إلي دارو طلعو و كل وحدة دخلات لبيت لقاو كلشي مقاد و الغرف نضيفة و مجهزة حتا الحمام .. خدات غدير دوش دافي و لبسات بيجامة صوفية و تكات فوق الناموسية خدات نمرة ديالها لقديمة ركباتها فالفون ..
دخلات لكونطاكت و بقات كتشوف فاسم صخر شحال طفات الفون و دارت على جنبها غمضات عنيها و نعسات ..
💎 بارت : 94 💎
☆☆ أصبحنا و أصبح الملك لله
فاقت كتعكز دخلات للطواليت قضات حاجتها و غسلات وجها و سنانها .. خارجة من الحمام حتا سمعات الباب تحل و دخلات سوجين كتجري تلاحت عليها ..
سوجين : ( عنقاتها ) Good morning babe
غدير : Good morning .. هههه مالك جاية بعجاجتك ؟
سوجين : ناري عرفتي شنو شفت
غدير : اش شفتي ؟؟
سوجين : كنت واقفة فالبالكون و بانت ليا واحد اللوطو داخلة .. نزل منها واحد التيتيز منقولش ليك .. ( كتجر فيها ) يالاه نهبطو لتحت
غدير : شكون هاد التيتيز تاني ؟
سوجين : معرفتش .. و لكن طحت أنا غرقت .. تحركي دغيا قبل ما يمشي
غدير : هبيلة .. إلي شافك ميقولش مهاوشة على التيتيز
سوجين : ( كتقاد فشعرها ) كيف كنبان .. جيت زوينة ياك ؟؟
كانت لابسة تيشورت بلو و شورط جينز قصير و سبرديلة بيضة ..
غدير : كتحمقي .. غير لعقل والو
سوجين : خليك غير نتي مولات لعقل .. أما أنا داه البوكوص إلي لتحت .. ناري حب من أول نضرة
غدير : باينة غادي اكون شي واحد من صحاب ركان .. عنداك اكون ضربك على الشعا و نتي دغيا طحتي على زنافرك
سوجين : ( هابطين مع الدروج ) لا لا .. شفت مزيان اححح عليه .. just my type ( نوعي المفضل )
وقفات غدير فالدرجة لخرة منين لمحاتو جالس فالطبلة مع ركان عنيها دغيا تغرغرو بدموع الفرحة و نادات على اسمو ..
غدير : سييييييف
سمع صوتها و تلفت شافها و ترسمات على وجهو ابتسامة مشرقة وقف و فتح ليها دراعو .. مشات كتجري عندو و ترمات فحضنو ضمها بقوة و كيبوس على راسها ..
سيف : ( باقي معنقها ) توحشتك الخايبة ديالي
غدير : حتا أنا توحشتك .. ( ضرباتو على صدرو ) آه بعد عليا مخاصمة معاك .. وليتي تغيب بالشهورا .. متبقاش تهضر معيا
سيف : ( خربق ليها شعرها ) وينو حبيبتي تعصبات .. ( ضمها بيدو ) و الله إلى تشطنت مع الواليدة .. من نهار مرضات مبقيت قدرت نمشي فين .. و ياك كنعيط ليك فالفون و نهضر معاك بالساعات
غدير : ( مخنزرة ) ماشي بحال بحال
سيف : غير سمحي ليا اغديرتي .. هاني قدامك عاقبيني كيفما بغيتي
غدير : ( كتفكر ) اممم .. صافي حتا نفكر ليك فشي عقاب هو هداك و تنفدو .. و ديك الساع نسامحك
سيف : ( باسها فخدها ) اخليك ليا الحنينة إلي قلبها بيض هههه
ركان : ( عاقد حجبانو ) جلسو فطرو و كملو هضرتكم
جلس سيف و جبد لغدير الكرسي إلي فجنبو جلسات حداه تفكرات سوجين و هي تلفت لقاتها باقو واقفة حدا الدروج ..
غدير : سوجين اجي تفطري .. مالك واقفة تم
تمات سوجين جاية وقفات حدا غدير و كتشوف فيها معبسة ..
غدير : ( نعتات لسيف ) آه نقدم ليك سيف .. my best friend ( صديقي المقرب ) .. ( شافت فسيف ) سيف هادي صاحبتي و حبيبتي سوجين
وقف سيف و مد يدو لسوجين بابتسامتو المعهودة .. سوجين دوخاتها الضحيكة مدات يدها و سلمات عليه و عنيها سارحين فوجهو البشوش ..
سيف : Nice to meet you miss Soujin ( تشرفت بمعرفتك آنسة سوجين )
سوجين : Same here ( حتا أنا )
جر سيف يدو و جلس أما سوجين بقات مادها للهوا شافتها غدير متحركاتش و هي تنغزها عرفات شنو بيها .. عاد فاقت سوجين من القلبة و جلسات جنب غدير قربات عندها و وشوشات ليها حدا وذنها ..
سوجين : هادا كولو سيف .. واخة على مك عاودتي ليا عليه كلشي إلا داكشي المهم .. ناري طير ليا لعقل
غدير : ههههه .. سكتي دابا اسمعك
سوجين : خليه اسمع و اعرف .. أنا بغيت نتفرش باش اشوف من حالي .. ( مدات يدها و قرصات غدير ف فخضها ) اجي لمك شي اتعنق و اتباس و شي اتسالم باليد .. فيناهيا الديموقراطية فين ؟؟
غدير : ااااي
سيف : ( باهتمام ) مالك ؟؟
غدير : ( تلفتات عندو ) آا .. لا والو ههه
سوجين : ( تحت سنانها ) ناري على الإهتمام و الحنية .. حتا أنا بغيت
غدير مقدراتش تجمع الضحكة كل ساعة تنطق سوجين بشي حاجة بصوت خافت و تنكر .. سيف مجمع مع غدير و كيتعاودو على شنو وقع فحياة بعض من آخر مرة تفارقو ..
أما واحد ركان جالس معاجبو حال منين جا سيف حس براسو خفي مكيبانش لغدير و مكرهش امتا انوض سيف فحالو .. حس بالفون كيفيبري هزو و ناض خرج للجردة اجاوب ..
ركان : صباح النور لأحلى خالة
💎 بارت : 95 💎
ركان : صباح النور لأحلى خالة
روقية : جيتي وصلتي على سلامتك .. اوى جي وريني خنشوشك
ركان : هههه ايه نجي نشوف حبيبتي .. هي اللولة
روقية : غدا دايرين حفلة بحال إعلان على زواح صخر و أسيل .. حينت سي صخر مخلاناش نديرو خطوبة .. و العرس بقا ليه تلاتة الأسابيع و شحال من واحد مازال مفخبارو .. بحرا مقنعت داك رأس الحجرة نديرو حفلة صغيرة و نعيطو على لعائلة
ركان : ههههه و منين خلاك حمدي الله .. صافي غدا نكون عندكم
روقية : اشمن غدا .. و جي اليوم يا هاد الولد .. قالك غدا
ركان : راه معيا الناس اخالتي !
روقية : و جي و جيبهم معاك
ركان : ( بعد تفكير ) اوكي .. لعشية نكونو عندكم
روقية : جيو بكري باش نتعشاو مجموعين
ركان : هههه حاضر
روقية : ارضي على ولدي
قطع ركان و خشا الفون فجيبو دخل شاف فيهم لقاهم باقين كيفما هما مجمعين و الضحكة ممفارقاش وجهم .. دار جهة سوجين لقاها مربعة يديها و مخنزرة و كل ساعة تسوط جابت ليه الضحك كتجيه هاد البنت حال و عقل ..
ركان : باركة عليكم .. خليو شويا للأيام الجاية
سيف : مالنا اخويا منخافوش .. غديرتي و انا حر فيها .. عرفتي شناهيا مكناش نتفارقو .. و منشوفهاش لشهورة راه إلى منعست حداها باليل متقولها لحد
ركان : ( ضربو على كتفو بقبضة يدو ) لاواه تنمي .. باغي نعطب مك فشي قنت واقيلة
غدير : ( كضحك ) بعد منو .. راه حتا أنا توحشتو و بقيت بحال الراس المقطوع
ركان : عيقتو علينا بهاد المحبة الزايدة
سيف : و ديها فمك .. بنادم شحال محساد
ركان : من بعد و نتفاهمو .. ماعلينا اليوم راه معروضين لواحد الحفلة ( شاف فسوجين ) we're going to a party ( غاديين لحفلة )
سوجين : وااو حفلة .. يعني غادي تكون فيها الحلوة المغربية و البشطيلة و
كلشي تفرشخ عليها بالضحك خنزات فيهم و لكن غير شافت فسيف كيضحك من قلبو و هي تبتاسم ..
غدير : بسطيلة بسطيييلة ماشي بشطيلة افف هههههه
سيف : هاد البنت شحال كيوت ههههه
طرطقات فيه عنيها الي كيخرجو منهم القلوبة واقلة قال عليها كيوت تحلات السيدة و تزاد فيها كراد ..
سيف : آه بعدا ديالمن هاد الحفلة ؟
ركان : احم .. حفلة لإعلان خطوبة صخر
سيف : ( بصدمة ) شنوووو .. خطوبة صخر .. علاه صخر غادي اتزوج ؟!!!!
تلفت سيف مباشرة عند غدير شافها باقة الابتسامة على وجها و كأنهم مكيهضروش على صخر .. تعجب من الخبر هو عارف صخر كان كيبغي غدير لدرجة كبيرة زعما اكون نساها و كمل حياتو ..
معارفش شنو وقع بيناتهم حتا وصلو لهاد المرحلة و رد فعل غدير بين ليه بحال إلى حتا هي رمات الماضي من وراها منين مأثرش فيها الخبر ..
ركان : الحفلة غدا مي حنا معروضين حتا للعشا اليوم .. و الحضور إجباري
غدير : نخرجو نتساراو و نتغداو فالخارج .. و من بعد ندوزو نتعشاو عند دار خالتك
سوجين : نااايس
سيف : أنا ميمكنش ليا نبقا معاكم للعشا .. مي الحفلة غادي نحضر ليها بالتأكيد .. حدث لا يوفت
ركان : صافي اتفقنا
غدير : ( جرات سوجين ) نطلعو نوجدو ريوسنا .. اليوم مكاين غير الضوران
طلعو البنات و كل وحدة دخلات لبيتها توجد راسها لهاد اليوم الحافل إلي غادي اختموه بعشاء فدار بن يازيد .. غدير دخلات دوشات و خرجات نشفات جسمها و شعرها و جبدات شنو تلبس ..
خدات فستان كحل بسميطات فوق الركبة لبساتو مع كعب عالي أسود و دارت تشوكر فعنقها حتا هو فلكحل .. قادات شعرها بالبلاك و طلقاتو و دارت مايكاب خفيف ديال النهار و رشات عطرها ..
هزات صاكادو صغير و دارت نضاراتها الشمسية و خرجات دقات على سوجين لحظات و خرجات عندها حتا هي لابسة و جاهزة ..
كانت لابسة جيب قصيرة بيضة و تريكو بيبي بينك مع صندالة عالية سميطات و دارت مايكاب مناسب للوك ديالها .. هبطو بجوج و خرجو للجردة لقاو الداري كيتسناو فيهم ركان جر غدير قبل لا اسبقو سيف و طلعها فاللوطو ..
قال لسوجين تركب مع سيف فسيارتو مشات كتجري بالفرحات عليها طلعات حداه .. ركب سيف ابتاسم ليها و ديمارا اللوطو خارج من الفيلا و من وراهم سيارة ركان ..
دوزو يوم ممتع تساراو نشطو سوجين فرحات حينت سيف تطلق معها و تعرفو على بعض شوية .. تغداو فريسطو و خداو أطباق مغربية كانو موحشين الأكل المغربي بتلاتة و سوجين مسكتاتش و هي كتوصف لذة كل طبق ..
كانو جالسين فكافي فلاطيراس مستمتعين بغروب الشمس و كيضور بيناتهم حديث فمواضيع مختلفة .. ناض سيف استأذن منهم كان خاصو ارجع حينت خلى الأم ديالو مقبلاها غير الممرضة ..
و واعد غدير غادي اجي في الغد باش امشي معاهم للحفلة .. دار هاد الخطوة ماشي حينت مهتم بشنو واقع فحياة صخر ..
مي باغي اكون فجنب غدير تحسباً لأي شيء ممكن اوقع فالحفلة .. بعد مدة ماشي طويلة ناضو حتا هما داز ركان خلص و هبطو ركبو فاللوطو و الوجهة كانت منزل صخر ..
💎 بارت : 96 💎
وقف أمام الفيلا فتح ليهم العساس الباب دخل و حط اللوطو نزل بسرعة و دار جهة غدير حل ليها الباب .. هبطات و هزات عنيها فالفيلا كتذكر آخر مرة كانت هنا و شنو وقع بسرعة ساست دوك الذكريات .. حسات بركان شد ليها فيدها و جرها معاه و سوجين تابعاهم من اللور كتبركك ..
لاح السيجارة و عفط عليها دوز الريدو و دخل من بعدما كان واقف من ورا الزاج ديال البالكون و شاف داك المنضر ..
دخلو للفيلا ركان مطلقش من يد غدير غادي جارها حتا وقفو عليهم كان كل من سراج زوجتو إيلاف روقية و أسيل جالسين على طبلة العشاء ..
جوج أشخاص بانت الصدمة العظمى على ملامحهم ممتيقينش بلي كيشوفوها واقفة قدامهم .. أسيل تخلطو فيها الألوان منها مصدومة و خايفة وجود غدير زرع فيها الرعب من جميع النواحي ..
التخوف من أنها تفقد صخر لعب عليها و خربق ليها دماغها حسات بيديها بردو عليها .. قالت من بعد داكشي إلي وقع آخر مرة محال ترجع توقف قدامهم من جديد كأن شيئا لم يكن ..
و واحد روقية كتندب فالداخل ديالها على ظهور غدير و متخوفة من إلي جاي .. و شنو ممكن اوقع و هي الي قالت تهنات من شبحها و قدرات تخلي صخر انساها ..
غدير لاحظات نضراتهم ليها و حسات بلي غير مرغوب فيها فهاد المكان بغات تجر يدها من بين يدين ركان و هي تحس بيه زير عليها أكثر ..
ركان : مالكم مصدومين .. عارف راسي غبرت عليكم حتا زيانيت هههه .. ( تحدر باس خالتو من راسها ) توحشتك العمر .. نتوما بلاش عليكم راه لا سلام على طعام .. آه جبت ليكم معيا الضياف .. ( حاوط غدير بدراعو من كتفها ) هادي غدير اقدر فايت ليكم شفتوها ( ونعت فسوجين ) و هادي سوجين صاحبتها جات معنا من كوريا
سراج : مرحباً .. مرحباااا بلي جا و جاب
إيلاف : ( قرصاتو فدراعو ) العما
سراح : احح مال مك .. راه كنديرو غير الصواب
إيلاف : احيانة عليك .. داك التنوعير إلي فيك أنا الي عارفاه
جلس ركان و جر كرسي الي جنبو لغدير و دار نفس الشيء مع سوجين إلي جلسات جنب غدير .. كانت الأجواء غريبة شوية خاصة روقية منطقات بحتا حاجة .. مكانتش متوقعة ركان غادي اجيب معاه غدير و هي آخر شخص باغا تشوفو حالياً ..
ولات كتقول علاه ميهبطش صخر متخوفة من رد فعلو إلى شافها .. لاحظات غدير نضرات الحقد و الكراهية إلي متوجهين ليها و كانت متوقعاها لكن مجيئها مكانش من فراغ ..
جاية و عازمة تحط النقط على الحروف و تحط الأمور فمحلها خاصة مع أم صخر إلي عارفها محاملاش فيها الشعرة ..
هابط مع الدروج بخطوات تابتة ريحتو سابقاه لابس سروال كري مع فيست مخططة و حذاء أسود .. شعرو ماشطو اللور رجع طوال كيف قبل و مخلي لحيتو كثيفة شوية و ملامحو جدية كيف ديما .. وصل عندهم لاح السلام و جلس فمكانو المعتاد ..
صخر : السلام عليكم
كيف سمعات صوتو لحمها تبورش عليها مقدراتش تهز عنيها و تشوف فيه اكتفت فقط بسماع صوتو و هو كيهضر مع ركان ..
صخر : ( ببرود ) امتا رجعتي ؟
ركان : لبارح جينا .. كيف عرفت بلي غادي ت..ز..و..ج ( ضغط على كل حرف ) جيت باش نحضر لعرسك أولد خالتي لعزيز
صخر : مزيان
ساد الصمت و الكل باشر فالأكل غدير هزات المعلقة و حطات الأكل فمها مقدراتش تبلعو الغصة واحلة ليها .. حسات بحال الى صرفقتيها باعنف صفعة فاش تجاهل وجودها تماماً كأنها مجلساش معاهم ..
الدغمة كتسرطها بالسيف و تبع ليها الماء حطات الكاس من بعدما شربات و هزات عنيها جهتو بدون شعور ..
و تلتقي الأعين مكانتش متوقعة تلقاه كيشوف فيها و مركز الشوفة عليها .. محيدش عنيه و بقا كيتأمل فيها بطريقة خلات توازنها الداخلي اتخلخل نضرتو اختارقاتها و فيقات عليها الجروح ..
كان عاقد حجبانو كيف العادة لكن شوفاتو كانو غير مفهومين لغدير بغات تبعد عنيها عليه و مقدراتش .. بحال الى شي مغناطيس كيجرها ليه و خلات الوقت اوقف بالنسبة ليهم بجوج و كأن هما فقط الي كاينين تماك ..
مزيرة على الفورشيط بيدها و عنيها مراقبين النضرات المتبادلة بيناتهم بغات تاكل راسها .. مراقباه منين جلس او محيدش عنيه عليها حتا فاش كان كيهضر مع ركان كان كيشوف فجهتها ..
تلفتات عند روقية لقاتها حتا هي كتشوف دارت عندها روقية و حطات يدها على يد أسيل كتطمنها زعما معندك علاش تخافي ..
أخيراً قدرات تبعد نضرها عليه و رجات شافت فطبسيلها كتلعب فالاكل و دماغها مخربق ..
صخر : ( وقف ) بصحتكم
روقية : ( تالفة ) ف فين غادي .. كمل عشاك
صخر : عندي شي خدمة ضرورية
خرج من الفيلا ركب فاللوطو و زاد طاير ماوقف حتال جنب الجرف إلي كيجي ليه فهاد الأواخر تقريباً يومياً ..
💎 بارت : 97 💎
مسحات فمها و ناضت استأذنات منهم و مشات للطواليت دخلات سدات عليها الباب و وقفات قدام المرايا مسندة على لافابو ..
بقات كتشوف فإنعكاسها فالمرايا مدة حتا نزلات دمعة وحيدة على خدها مسحاتها بصباعها و فتحات الما .. دوزاتو على عنقها و وراء شعرها رسمات ابتسامة على وجها و حلات الباب بغات تخرج ..
حتا كتلقا أسيل واقفة أمام الباب شافت فيها غدير بمعنى شنو كاين و هي تهضر لاخرى بدون مقدمات ..
أسيل : لاش جاية ؟؟
غدير : نعااام !!!
أسيل : من بعد الجريمة إلي درتي جاية بوجهك حمر كأن شيئا لم يكن
غدير : آش كتقصدي .. اشمن جريمة علاش كتهضري ؟؟
أسيل : ههههه واااو .. كتعرفي تمتلي البرائة من داكشي .. ( بعصبية ) ماشي سيادتك إلي دفعات ماما روقية من الدروج و كنتي باغة تقتليها !
غدير : راك مفاهمة والو .. سو خليك خارج الموضوع
أسيل : فاهمة كلشي و عارفة لاش راجهة .. مي مغاديش توصلي لداكشي إلي بغيتي كوني متأكدة .. أحسن ليك رجعي منين جيتي و لا غادي نقول لماما بلي نتي إلي دفعتيها من الدروج .. سكت و مقلت والو فاش عرفت بلي متذكراتش كيف وقع ليها حتا طاحت .. مي إلى جابتها الضرورة غادي نقولها لكلشي .. و تخايلي معيا رد فعل ماما و لا صخر فاش اعرف كنتي باغة تقتلي ليه مو
غدير : ( قربات ليها أكثر ) زعما باغة تهدديني .. أعلى ما فخيلك ركبيه معنديش علاش نخاف .. أصلا جيت باش نوضح هادشي .. سو خرجي سوقو و خليك فهمك
أسيل : حاجة وحدة إلي غادي نقولها ليك .. بعدي على صخر .. هو نساك و بغا اكمل حياتو معايا .. إلى قربتي ليه مغاديش إحصل خير
غدير : و مالك كترعدي .. ياك هو بغاك و باغي اتزوج بيك و علاش خايفة .. واش متايقاش فراسك و لا كيفاش !؟
أسيل : فهميها .. صخر مغاديش ارجع ليك غير كوني هانية
غدير : حيدي من طريقي كنظن الهضرة بيناتنا سالات
دازت فيها غدير و رجعات للطبلة لقاتهم سالاو و وقفو غاديين للصالة اشربو قهوة استجمعات قوتها و وجهات هضرتها لروقية ..
غدير : مدام روقية .. ممكن نهضر معاك على انفراد ؟
روقية : اوكي .. تبعيني
توجهات روقية للمكتب و تبعاتها غدير سدات الباب و وقفات جامعة يديها و كتحك فيهم .. هزات عنيها فروقية الي جالسة فوق الفوطوي و كتسناها شنو غادي تقول ..
غدير : عارفة بلي محملاش وجودي هنا .. مي بغيت نهضر معاك قبل ما نمشي .. فاش تلاقينا أول مرة كنت كنمر من ضروف صعيبة و
روقية : ( قاطعاتها ) ما عندي ماندير بهاد الهضرة .. إلى عندك شي حاجة من غير هادشي باغة تقوليها تفضلي .. بلاما نضيعو وقت بعضياتنا
غدير : أنا بغيت نعتاذر على الي وقع داك النها..
روقية : ( وقفات ) متعتاذري ليا منعتاذر ليك .. ماعندي حتا علاقة بيك و مباغاش تكون .. إلي نبغي نقول ليك هو بعدي على ولدي و خليه اعيش حياتو هاني
خرجات روقية و خلات من وراها غدير محطمة مخلاتش ليها حتا الفرصة تهضر و تشرح ليها شنو كان واقع معها داك الساع و لا عطات ليها الفرصة تعتاذر ..
دارت غدير خارجة و هي تلمح صورة فوق المكتب بالكادر هزاتها كتشوف رجل و جنبو جوج دراري معنقهم بيديه ..
دوزات صبعها على وجه صخر إلي مرسومة على وجهو ابتسامة عريضة و باينة عليه فرحان .. رجعات حطاتها و خرجات لقات ركان كان جاي عندها ..
غدير : يالاه نمشيو من هنا
ركان : يالاه .. راه سوجين سبقات للوطو
شد فيها و خرجو تحت نضرات روقية و أسيل إلي جالسين فالصالة ..
ركب ركان و غدير طلعات حدا سوجين اللور ديمارا اللوطو و تحرك غادي فالطريق و كل ساعة اشوف فغدير من المرايا ..
كانت متكيا على كتف سوجين و سادة عنيها .. ضرو راسو معرفش علاش طلبات من روقية اهضرو على انفراد و شنو ضار بيناتهم .. وصلو للدار دخلو كانت طالعة هي و سوجين لبيتها حتا وقفها ركان ..
ركان : غدير ممكن نهضرو !
غدير : ركان بليز حتال غداً .. عيانة و باغة نعس
ركان : اوكي تصبحي على خير
غدير : تصبح على خير
سوجين : ( طالعين فالدروج ) اليوم غادي نعس حداك .. توحشت نتمخشش فيك
غدير : مسكينة ناقصة حنان .. حالك صعيب
سوجين : ( عنقاتها بيدها ) هاد المرة نتي الي محتاجة للحنان و شي حد اكون بجنبك .. واخة معرفاش شنو وقع فاش مشينا لديك الدار .. مي باينة شي حاجة واقعة هنا ( حطات يدها على صدر غدير جهة القلب )
غدير : عادي ولفت .. بلاما تشغلي بالك .. هادي هي الحياة
دخلو لبيت غدير بدلو عليهم و لبسو بيجامات نعسو حدا بعض فالناموسية .. حاولات سوجين تخلي غدير تعاود ليها كيف كتحس و شنو واقع معها ..
لكن غدير اكتفت تراوغ و تبدل الموضوع بقاو مجمعين فأمور أخرى حتا نعسو او سوجين إلي نعسات .. أما غدير فمقدراتش تغمض عنيها و كل بالها مع الغد ليه إلي غادي اتعلن فيه أمام الناس أن صخر ولى لأسيل ..
💎 بارت : 98 💎
بقا واقف مدة متكي على اللوطو و مقابل مع البحر هاز سيجارة كيكمي حتا وصلات ديك الجوج ديال اليل .. طلع فسيارتو و رجع لدار دخل مكانش الحس كلشي ناعس طلع لبيتو و دخل للدوش ..
☆☆ أصبحنا و أصبح الملك لله
فاق صخر بكري لبس حوايج الرياضة و خرج قبل مايفيق حتا واحد كان كيتجنب اشوف شي واحد .. هبط لتحت لكوزينة خدا مشروب طاقة من الثلاجة و توجه لاصال الي جا فالجانب الاخر من الفيلا سد عليه و طلق ميوزيك ميتال و بدا اتريني لحديد ..
كيف بدا اطلع النهار بدات روقية توجد هي و الخدم للحفلة سيفطات أسيل لبيوتي سونتر مع إيلاف .. وقفات على كلشي و كانت دقيقة فأي حاجة كدير متحمسة و مقداها فرحة حينت امنيتها قربات تحقق ..
واخة عندها شوية ديال التخوف من أن صخر اتراجع فقرارو خاصة بعد رجوع غدير .. و لكن منين مدار والو فاش شافها ليلة لبارح و تصرف عادي ارتاحت شوية خاص غير اليوم ادوز بخير ..
صخر من بعد ما سالى لونطريما ديالو طلع دوش لبس حوايجو و خرج مشا عند سراج للشركة محملش اجلس فالدار نهائياً ..
كان جالس سراج فالمكتب و خدام فشي وراق و صخر مقابل معاه جالس فوق الفوطوي .. شاد البيسي و حتا هو مشغول مع شي حاجة هز سراج راسو شاف فصخر و حط داكشي الي فيديه ..
سراج : ( كيلعب بالستيلو فيدو ) واش متيقن من هادشي إلي كادير .. أنا راه مزال ممتيق بلي غادي تزوج بهاديك !
صخر : واش كنبان ليك أنا كنلعب هنا .. كن مكنتش متأكد مغاديش نبقا ساكت و مخلي لواليدة معذبة راسها و توجد
سراج : اوى مالك ماشي هو هداك .. ديما ساهي و مخنزر بحال إلى مخاصم مع راسك
صخر : من نيتك .. موالف كتشوفني غادي و كنفرنس .. كمل خدمتك و عطينا شوية ديال السكات
سراج : و نتا لاش جاي عندي .. سير وجد راسك واقيلة عندك حفلة إعلان خطوبتك هاد الليلة !
صخر : ( على حاجبو ) نوجد راسي .. بنت ليك سميتي آمال !!
سراج : ههههه .. ( كيتسرهط ) راه حتا الرجال ولاو اطراسيو اللحية و اقادو الحجبان و اديرو لي ماسك .. مفخباركش ؟
صخر : هادوك فنظرك رجال .. الى كانت هاكاك .. انعل بوها رجلة
سراج : غا ضاحكين أولد ميمتي .. بغيتك غير طلق البشرة ساع والوووو .. بحال إلى كنكب الما على الرملة
صخر : خدم إلى بغيتي تخدم و هني الوقت
سراج : ( بعد صمت ) هضرتي مع غدير ؟
صخر : ( خبط البيسي سدو بجهد و جمع الوقفة ) انعل بويا انا الي جاي عندك
خرج صخر من المكتب هبط فالمصعد ركب فسيارتو و تحرك توجه للشقة فين كان ساكن .. طلع و دخل للمكتب ديالو جبد شي وراق و قضايا قدام خدام فيهم واخة موقف على الخدمة من بعد إلي وقع بعد إعتقال الوزير و مصطفى أب سيف ..
باغي اشغل راسو بأي حاجة و ميفكرش فلي كيوقع حاليا و شنو تابعو حينت اقدر ضور ليه فالخوا و اقلب على كلشي ..
وصلات العشية و فيلا بن يازيد بدات تعمر بأفراد العائلة من عائلة روقية و عائلة راجلها و الأصدقاء المقربين .. واقفة لابسة قفطان بيج و طالقة شعرها القصير إلي كتخللو شعيرات رمادية الفرحة ظاهرة على وجها و هي كترحب بالضياف ..
الخدم و السربايا شي غادي شي جاي كيفرقو المشروبات و الحلويات على الضيوف .. الناس مفرقين مابين الصالة إلي مفتوحة على الجردة إلي فالفناء الخلفي الي بدورها مزينة و فيها جليسات و طبالي دايرين بلابسين ..
كلشي مقاد و متول و الإضاءة و الورود فكل مكان كانت حفلة على حقها و طريقها و روقية وقفات على كلشي بمساعدة أسيل ..
هاد الأخيرة إلي واقفة فبيت فالطابق الثاني مقابلة مع المرآة و كتقاد اللمسات الأخيرة .. لابسة فستان أسود واصل لفوق الركبة و طايحين ليه الكتاف ' أوف شولدر ' مع حذاء ذهبي ..
جامعة شعرها على شكل بان و دايرة مايكاب فونسي عنيها مجبداهم مع رموش اصطناعية و كونتورين لتحديد الوجه و لبستيك غامق ..
هزات الحلقات كديرهم لوذنيها سمعات الباب تفتح و هي دور لقاتها الخادمة ..
الخادمة : لالة .. قالت ليك المدام روقية هبطي
أسيل : مزال مجا صخر ؟؟
الخادمة : لا مزال
أسيل : اوكي .. قولي ليها هاني نازلة
خرجات الخدامة و خلات أسيل كترعد خايفة لا اتخلى عليها فاخر لحظة و تولي ضحكة قدام الناس .. صخر توقع منو أي حاجة واخة مبينش على انو ممكن اتراجع على كلامو مي مغادي تهنا حتا اسنيو على العقد .. هدآت راسها و قالت بلي كلشي غادي ادوز مزيان توجهات للباب و خرجات ..
نزلات مع الدروج و رسمات ابتسامة متوترة على شفايفها بانو ليها الناس بدات كتشق طريقها بينهم حتا وقفات جنب روقية ..
💎 بارت : 99 💎
روقية : تبارك الله مشاء الله .. ( سلمات عليها بالحناك ) منورة ابنتي الله احفضك من العين
أسيل : شكراً اماما .. واش مزال مجا صخر ؟
روقية : متخافيش .. راه عاد هضرت معاه فالفون .. كان فدارو كمل شي خدمة و راه جاي فالطريق
أسيل : ( تنفسات الصعداء ) اوكي
روقية : ( جراتها معها ) اجي نعرفك على لفاميلة .. راه متشوقين اتعرفو على خطيبة صخر
دخل باللوطو إلي كانت فنتيج من نوع كاديلاك ديال الأب ديالو مرة مرة كيهزها و عندها معزة خاصة عندو .. نزل لابس بدلة زرقاء مع قاميجة فالشيبي بلا كرافاط و لابس حداء كلاص فالاسود كيلمع شعرو ماشطو اللور و اللحية نقصها شوية ..
عطرو الرجولي سابقو كيف ديما كتشميه على بعد مترات .. غير شاف بنادم كتير و هو ازيد عقد دوك الحجبان و ضرب تخنزيرة على حقها ..
زعما وصى مو على هادشي ساع دارت إلي فراسها فقط ..
شاف مجموعة من الرجال و توجه عندهم تحت نضرات العيالات و بنات العائلة إلي كلاوه بعنيهم .. و بغاو ياكلو ريتهم حينت خطب وحدة ماشي منهم و هما كل وحدة بانية أحلامها عليه من صغرها ..
و تقول صخر من نصيبي أنا ساع ملقاو منين ادوزو ليه من بعد موت الأب ديالو سافر لأمريكا و منين رجع هادي عامين ..
مكيشوفوهش عمرو حط رجلو عند شي واحد فالعائلة و فاش كيجيو هما عندهم مكيلقاوهش ..
بدون ميعير اي انتباه لمجموعة الفتيات الي كانو لابسين و مقادين الحالة و عنيهم عليه ..
داز من حداهم و وقف مع خوالو و عمامو سلم عليهم داز من حداه سرباي خدا من عندو مشروب غير كحولي ..
رشف منو و فقط كيسمع ليهم مجمعين و الى سولو شي حد كيجاوب على قد السؤال ..
مر بعض الوقت و بدات الشمس تغرب الأضواء شعلو فأنحاء الفيلا و فالجردة و الديدجي طالق موسيقى منشط الجو ..
★★ دخلو جوج سيارات مع الفيلا نزل ركان لابس سروال توب كري مع قاميجة بيضة و شعرو ماشطو اللور ..
حل الباب و نزلات غدير بفستانها القصير بسميطات رقاق و كعب أسود مقمقم كلاسيكي و شعرها الأسود مطلوق سامبل ..
دايرة مايكاب خفيف برز ملامحها الجميلة مركزة فقط على شفايفها بعكر ماط فالبوردو .. تأبطات دراع ركان و توجهو لجردة فين كاينين المدعوين و من وراهم سيف و سوجين الي كانو فاللوطو لاخرى ..
سيف لابس سروال توب أسود مع قاميجة بيج و شعرو الأسود مطلعو للفوق لحيتو مخليها خفيفة كيف ديما .. و جنبو سوجين لابسة غوب كحلا فوقها فيست فنفس اللون مع سندالة بيضة بالسميطات ..
عاملة مكياج خفيف حتا هي و دايرة لي لونتي لعنيها كل مرة كديروهم فلون و طالقة شعرها القصير ..
تجمعو فطبلة وحدة بربعة و جلسو جابو ليهم مشروبات و العاصير مع مقبلات و حلويات فالانواع .. خدات غدير عاصير السيترون و حلوى اما سوجين عمرات طبسيلها بكاع الأشكال ديال الحلوى باغة دوق كلشي ..
الدراري اكتفاو خداو مشروبات غير كحولية حينت روقية حلفات مدير الكحول فالحفلة واخة عارفة ولادها و أغلب الرجال كيشربو ..
فجأة توقفات الموسيقى و الكل دار جهة الديدجي بانت ليهم روقية خدات المايك و وجهات هضرتها للحاضرين ..
روقية : مرحبا بالحباب .. شكراً لأنكم حضرتو لهاد النهار المميز بالنسبة ليا .. بسبب شي ضروف دازت خطبة ولدي صخر بالزربة و مقدرناش نحتافلو بيها .. و اليوم سنحات ليا الفرصة نظم هاد الحفلة الصغيرة باش نحتافلو بخطوبة ولدي صخر و بنتي أسيل .. و نتشارك معاكم هاد الفرحة و انشاء الله تكمل نهار عرسهم إلي مابقى ليه والو .. كنطلب من صخر و أسيل اقربو عندي لهنا
صخر كان واقف بعيد سمعها كتعيط عليه و هو اصعر .. علم الله علاش ناوية ثاني شحال قدو اسايرها و هو محاملش راسو وسط هاد الأجواء ..
بانت ليه أسيل وقفات جنب روقية تمشا على مهلو حتا وصل عندهم وقف جنب مو مكره .. كانت كاع الأنظار عليهم حتا بان ليهم جوج سربايا جارين طبلة عالية حطوها قدامهم ..
هبط صخر عنيه غير شاف البواطة الحمرة محلولة و وسطها جوج خواتم و جنبها الحليب و التمر .. زير على يدو بقوة و عروقو بداو اتنفخو و الأعصاب كيلعبو عليه بقا ليه شوية و انفاجر عليهم و اجمع كلشي ..
روقية : الحمد لله مزال مدرنا لبس الخواتم .. و جات الفرصة منين عائلاتنا حاضرين
رجعات جوج خطوات اللور و دفعات أسيل جنب صخر و مدات ليه الخاتم باش البسو لأسيل ..
💎 بارت : 100 💎
شاف فمو إلي مادة الخاتم و هز عنيه كيشوف فالمدعوين حتا لمحها جالسة جنب ركان و سيف .. كانت كيف الكل كتشوف فجهتهم و متبعة كلشي خطف الخاتم من يد مو و زير عليه بيدو بحال إلى بغا افرتو ..
عنيه مزال كيشوفو فجهتها لمحها حدرات عنيها متجنبة نضراتو و بدورو تلفت و شاف جهة أسيل .. إلي مادة يدها ليه لبس ليها الخاتم و حتا هي هزات خاتم مدور و شدات فيدو ..
شاف فيها بحدة و كيصبر فراسو على هاد الموقف إلي لا يحسد عليه لبسات ليه الخاتم و تعالات زغاريت روقية و عيالات آخرين ..
جات روقية تمد ليه طاس لحليب باش اشربو بعض على حساب التقاليد .. خلاها بلاكة و زاد بلا ميضور عندهم شاف فسراج إلي واقف جنب مرتو و هاز ولدو ..
و وصل ليه بعنيه بلي صافي طفح الكيل و هادا جهدو عليهم عنيه مشاو عاوتاني للجهة فين كانت جالسة مبانتش ليه ..
كمل طريقو و توجه للجهة لأخرى فين كاين لاصال و بيسين صغير حداه جاكوزي مدور خارجي .. وقف خشا يدو و جبد سيجارة شعلها كيكمي بيد و يد خاشيها فالجيب ..
رجع جبد يدو من الجيب و قابلها معاه كيشوف فالخاتم لاح الكارو عفط عليه و حيد الخاتم من يدو بالنطير و لاحو فوسط البيسين ..
من بعد الفرشة الي دار ليها صخر طمرات و وجهات كلامها للضياف تمنات ليهم أمسية سعيدة و استمتعو بوقتهم .. جرات معها أسيل إلي بقات مصدومة من فعل صخر حتا انه مباركش ليها و لا باسها من جبهتها كيف الناس ..
زعما لهاد الدرجة بارد من جهتها و محاولش حتا اتقبلها و لا يعطي فرصة ليهم .. دخلو بجوج للفيلا و طلعو لبيت أسيل إلي بداو الدموع اديرو طريق على خدودها ..
منين شافتهم غدير غادي البسو لخواتم مقدراتش تتحمل واخة تقصحي قلبك قداش مابغيتي لكن أي أنثى كيفما كانت قوية ..
متقدرش تشوف الرجل إلي كتبغي او حتا كانت كتبغي واحد الوقت ولى لوحدة أخرى و قلب صفحتها ..
وقفات و خرجات من تماك مسرعة سيف ناض بغا اتبعها و هو امنعو ركان و قاليه بلي غادي امشي هو .. تبعها ركان بانت ليه واقفة وسط الجردة و كتشوف قدامها و ساهية ..
حط يدو على دراعها و دورها عندو بانو ليهم الدموع هابطين بوحدهم و مكتصدر حتا صوت .. مد يدو و هز ليها راسها شاف عنيها إلي عامرين دموع و تقبط عليه قلبو إذن مزال كتبغيه و مقدراش تنساه ..
حتا أنها مستحملاتش تشوفو مع وحدة أخرى و هو شكون احس بيه إلي البنت الوحيدة إلي كيعشقها كتشوف واحد فقط لا غيرو ..
ركان : علاش ا غدير .. علاش كتعذبي فراسك و كتعذبيني معاك .. هو نساك و باغي اكمل حياتو مع وحدة أخرى و نتي جالسة تبكي عليه
غدير : ( الصمت و دموعها دايزين )
ركان : خليتك على راحتك و محكرتش عليك .. واخة عارفة باش كنحس من جهتك و كل يوم كنتعذب .. قريب ليك و مقادرش نقيسك كيف بغيت و لا نملكك .. صبرت و صبرت و لا بغيتي تحسي بيا حتا أنا باشار كيحس و كيغير .. ( شد ليها فيديها بجوج ) حسي بيا شوية و عطيني فرصة نتبت ليك بأني أنا أكثر واحد استاحقك
مد يدو كيمسح ليها فدموعها و عنيه كيتأملو كل انش فوجها تائه مابين عنيها و شفايفها .. كيقرب أكثر و أكثر حتا بقات بيناتهم مسافة صغيرة و انفاسو ولاو كيضربو فوجها ..
دوز يدو من ورا خصرها و قربها ليه أكثر حط اليد الأخرى على خدها و كيمرر صبعو بحنان .. غدير مكانت حاسة بحتا حاجة باقي منضر صخر و أسيل واقفة جنبو و قدامهم الخواتم باقي بين عنيها ..
حتا فيقها من سهوتها شفايف ركان إلي تحطو على شفايفها و بدا كيقبل فيها ..
واقف كيف الديفيل كولو حمر و النار كتنهش فيه فالداخل ديالو كان أسوء منضر ممكن اشوفو فحياتو ..
رجل آخر حينت هاد الساعة ناسي واش كيجي لطاسيلتو شي حاجة شاد حبيبتو كيقبل فيها .. آاااه هي حبيبتو و ديالو و ما منحق حتا واحد اقرب ليها و لا اقيسها و هادا وصل لسطاج لخر باغي اليوم الوحو عليه التراب ..
تحرك بسرعة البرق جبدها من دراعها و دفعها بعيد و نزل على ركان بلكمة ديال لغدايد .. فرشو فوق الكازو و نزل عليه باللكمات وحدة من ورا الأخرى ركان كيطاكي وحدة و اجيو فيه جوج ..
وقفات غدير من الأرض حينت الدفعة إلي دار ليها صخر جابتها لأرض .. مزال مستوعبات داكشي إلي دار ركان و كانت على وشك دفعو حتا حسات بقبضة حديدية جبداتها من دراعها و لاحتها ..
شافتهم مشابكين و صخر تجنن كيسب و اغرق و عاطي الدق لركان قربات ليهم بغات تفرقهم .. كيف حطات يدها على ظهر صخر ضار عندها خنزر فيها و دفعها عليه حتا فقدات توازنها و كانت غادي طيح عاود ..
صخر : ( رجع كيبوني فركان بكل قوتو ) يااااك أولد القحبةةةةةة .. مااااد شوااااربك كتبووووس فيهاااا فوسط دااااري .. الله انعل الحمااااار إلي ولدكككك .. اليوم نقتل جد بووووك و نرتااااح من خليقتك