زلزال ضرب فصدر فاتي !!!! .... تصدمات ومشات بيها الارض وجات ... تلوى ليها اللسان وماقدارتش تجاوب ولا تقول شي كلمة .. طاحت لاباراي من يديها و فشلو عليها رجليها مابقاتش قاظرة توقف .. بدات تفتف بيديها على شي بباصة تجلس فيها ، جلسات فوق كرسي كترعد مقاداش تسد فمها ؛ دخلات مها للدار مهبطة شبكة دالنشير من السطح وهي تلقاها مقوسة وجالسة على كرسي بحال الى شي حاجة وحلات ليها ، مشات معا كتجري عندي شدات ليها فيده وبدات تسولها مخلوعة
الام: ماالك ياك لاباس اش وقع ليك؟ واش شي حاجة وحلات ليك؟ (شافت السماعة فالارض) علاش طيحتها ؟ (رداتها بلاصتها) هضري واش وقفات ليك شي حاجة ؟ ماالكي؟
حطات فاتي يدخا على صدرها حاللة فمها وشارت بيديها كترعد
فاتي: لما .. لما .. عطيني لماء
مشات مها كتجري جابت ليها الماء ورجعات عندها عطاتو ليها حطاتو في فمها عي كتشرب والكاس كيقرقب بين سنانها . قالت وعينيعا حومر كيجريو بالمدوع خارجين
فاتي: واءل خطب امي .. خطب مريم
الام : ويلي على مريم!!!! شكون قالها ليك؟
فاتي: قلبي ...قلبي .. ناري غنخسف .. حاسة . حاسة براسي....
قبل متكمل الكلمة لوات فيدين مها وسخفات قالبة عينيها ، بقات مها تغوت بالجهد وتهز فيها .. سمعات الجارة غواتها ودخلات كترجي وتمسح يديها فالفواطة .
- اللَّهُ لَا إِلَهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ لَهُ مَا فِي السَّمَاوَاتِ وَمَا فِي الْأَرْضِ مَنْ ذَا الَّذِي يَشْفَعُ عِنْدَهُ إِلَّا بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلَا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ وَسِعَ كُرْسِيُّهُ السَّمَاوَاتِ وَالْأَرْضَ وَلَا يَئُودُهُ حِفْظُهُمَا وَهُوَ الْعَلِيُّ الْعَظِيمُ)
كتحل عينيها بزز وتشوف فيهم ناعسة على ضهرها مغطية ومها حازمة ليها راسها .. حداها فقيه كيقرا عليها القرأن ومها جالسة بجنبها شادة ليها فيدها .. الجارة واقفة وباها كيشوف مابيديه مايدير .
مرضات فاطمة الزهراء .. ولات كلمة جوج كطيح بالاعصاب .. متبقات لا كتهضر ولا تجمع .. تبدلات 180 درجة وحتى العراسات ديال اقرب الاقارب مكتمشيش ليهم .. باها ميك عليها مابقاش كاع كيجبد ليها حس الطلاق ولا سمية دواءل . دازت السيمانة وفاطمة الزهراء تقيلة .. كتكتر من النعاس كتر من الفياق . التيلفون مكيبغيش يسكت كل مرة تعيط وحدة من صحاباتها و لاوحدة من عاءلتها تسول على حالها وتدي خبارها .
فاقت امها بحال العادة كتجمع وتوجد الفطور ودور بالدار .. دارت الجفاف فالماء وبدات دوز على الارض ، وصلات حتى لباب يالاه دوزاتو بيديها وهي تشوف جوا ابيض مرمي تحت الباب . مسحات يديها فالفواطة وهزاتو على اساس ورقة ديال الضوء والماء .. حلاتها وهي تلقا تصويرة فيها واءل كيضحك وحداه مريم جالسة دايرة خاتم المارياج فيديها وناقشة الحنة . تفافتات الام فاش الصورة وزادت تخلعات فاش شافت فاتطمة الزهراء خارجة من بيتها مسكينة باينة عليها حالة المرض ، خبات الصورة حتى دازت فاتي وشداتهت شركاتها وهزات سطلها داتو للكوزينة .. لبسات جلابتها وقالت لفاتي
الام : طفي على الغدا هانا جايا دابا
خرجات شدات طاكسي ومشات نيشان لدار واءل .. طلعات وبدات تزدح عليه فالباب ودق بالجهد حتى خرجات ليها واحد الجارة من جيران فاطمة الزهراء . عقلاتها وسلمات عليها
الجارة : لاللة عيشة؟ كي دايرة لاباس ؟ ياك لاباس ؟ مالكي
هزات عيشة يديها فالسماء كتغوت وججها صفر فقلبها حرقة .
لاللة عيشة : اااختي ماعرفت هاااد الناس اش بغاااو عندنا ... اش كيتسااالونا .. مالهم مابغاو يتفرقو علينا يخليونا نعيشو حيااتنا .. الله ياخد فيهم الحق .. الله ياااااربي تاخد فيهم الحق
تحلات باب الدار وخرجات عندها مرى طويلة اول مرة تشوفها لاللة عيشة .. الشعر مطلوق والحالة والزين ..
- مالنا الاللة فارعة علينا الباب؟ اش هاد قلة الترابي ؟
لاللة عيشة : شكون نتي بعدا عيطي ليا على داك ولد الحرااااام ... اللي بارك يسيفط لينا فالتصاور بغيت ربي يسلط عليه شي كسيدة مايلقاو مايجمعو فيه
جراتها الجارة : ااالاللة عيشة نعلي الشيطان اش كتقولي هدي النفوس
[23/1 19:14] بارت: الجارة : هي النفوس راه هادو جيران جداااد ... نسيبك راه بااااع الدار ورحل هادي شهراين والزيادة ... مابقاش ساكن هنا وشحااااال هادي مشنااه.
ستات لاللة عيشة ويديها كيرجفو بالفقصة وقالت : سمحي ليا بنيتي .. سمحي ليا .. يحساب ليا واحد الكافر بالله هوا اللي ساكن هنا ... متيسحابش ليا سكنتو جداد
حنات راسها وهبطات كتغلي بالفقصة . شدات طاكسي ومشات نيشان لدار مريم ، مزلات من الطاكسي غادية جيهت دارهم وهي تلاقت بيها فالحومة دايزة بالجلابة . شداتها لاللة عيشة من شعرها هبطاتها ضربات ليها نتفة فكوهم غير الناس اللي فكهوم .. وقفات مريم كتلهت كاملة مقموشة كتجمه فشعرها .. اما لاللة عيشة كضرب فخادها وتندب
لاللة عيشة : يااااك امريم يااااك .. ياااك صاحبتك فاطمة الزهرااااء .. ماحشووماش عليييك ... ياااك كانت بحاااال ختك .. متعزش فيك حتى حاااجة ... ياك كنتي صاااحبتها وكنتي وزيرة فعرسها ... ياك شحال نعستي معاها ففراش وااااحد .. شحال سافرتي نتي وياااها .. كنتي تاكلي وتشربي عندنا .. سيري يااااا مريم .. بغيت خبزي يوقف ليك فالركاااابي ... بغيت ربي يااااخد فيك الحق... بغيت طعااااامي يخرج فييييك ... سيري لهلا يسهل عليييك ... الله ياااخد فيك الحق
مريم: بالغوات) بغيت دعواااايك يتقلبو عليييك ... مالكي اش باغا مني نتي وبنتك .. مالكم كنتو تصرفو عليا؟ الى مريضة ديها لسبيطار ماجيبيش مسبتك علياااا
لاللة عيشة : تحل ليك الفم .. هادي هي مريم!!!!!! الى بغيتي تزوجي تزوجي علاااش مزااااة تابعة ليا بنتي ... ايوا شغانقول ليك .. انا بغيت ربي يدوقك من هادشي اللي دوقتينا منو نتي وداك ولد لحرام (مشات كتسب) الله ياخد فيك الحق ... الله ياربي تاخد فيهم الحق ... الله يا ربي عمرهم يشوفو النهار الزوين .
شوهاتها ورجعات بحالها كتنهج ووجها حمر ... مشات نيشان عند فاطمة الزهراء نوضاتها من النعاس
لاللة عيشة : نوضي .. نوضي جمعي حوايجك تمشي لأكادير عند خالتك سميرة ... ماعندك ماتبقاي ديري هنا غير غتزيدي تمرضي... الصيف هادا وكلشي مسافر وكلشي خارج ونتي باغا تموتي ليا ... نوضي جمعي حوايجك انا نعيط لخالتك نقوليها راه جايا عندك .. راه ديما تقول ليا سيفطيها ليا قنطات بوحدها ... تما بعدا مكاينش وجوه الويل ومكاين اللي يوصلك ولا يندكها عليك ... برااكة عليك من النكد بغيتيني نبقا مربعة يدي حتى تموتي ليا ونبرك نندب ... نوضي خرجي من هاد الدار الى بقيتي هنا غير غتزيدي تمرضي اللهم تمشي عند خالتك سميرة بعدا هي بوحدها والدار كبيرة عندها رجالها فالسعودية مكيجي من لعام لعام .. تفوجي نتي وياها متنكر عليك ما تقوليك حتى كلمة .
نوضاتها بزز منها بدات تجمع بيها فحوايجها بالفقصة والغدايد ومشات هزات تيليفون عيطات على ختها علماتها باللي غتسيفط ليها فاطمة الزهراء عندها ، دخل الاب لقاها كتهضؤ على السفر وهوا يخرج عينيه
عبد الله : تجلس فدار باها ماعندها فين تمشي .. تنشي لتما يقولو الناس صاافي طلقاااات وراه دايرة مابغات ... اللي كطلق كترجع للدار باها يسترها حتى يجيب الله اللي يسترها .
[23/1 19:15] بارت: قطعات مها التيليفون ومشات جرات راجلها لبيت النعاس وقفاتو وبدات تعاود ليه شنو وقع وشنو جرى وقضية الخطبة اللي مافراسوش وماعارفش على طاحت فاطمة الزهراء المرة الفايتة .. عادوات ليه قضية التصاور وضريب الصداق والحالة اللي صارت .
عيشة : البنت مريضة خليها تصافر عند خالتها .. الى بقات محبوسة هنا غاتمشي توقع ليها شي موصيبة وحنا اللي غتجي فينا الدقة ... غتمشي سيمانة وتجي مكابنش اللي غيسيق ليها لخبار سافرات
الاب: سيمااااانة ماتزيدش عليها نهار
عيشة : سيماانة متزيدش عليها
الاب : يالاه قول ليها تجمع حوايجها نوصلها غدا للكار .
مشات عيشة جمعات مع فاتي لحوايج ودخلات عندها للدوش حكات ليها ضهرها . جمعات فاتي حوايجها وهزات صنيديقة ديالها ديال الذهب اللي شرا ليها واءل .. هزات سنسلة دارتها فعنقها وساعة فيديها وهي تشوف خاتم زواجها .. هزاتو بقات تشووف فيها وعينيها كيبكيو . تذكرات نهار خطوبتها الكبيرة .. النهار لكبير فاش جا واءل هوا واعاءلتو خطبوها .. كانت فرحانة غطير بالفرحة لابسة تكشيطة ديال الفريع وطالقة الشعر ودايرة التاج وناقشة لحناني . . . جالسة حداه حشمانة وهوا شاد ليها فيديها فرحان وغير كيضحك وكل شوية يدور عندها ويبقا يشوووف فيها . هز لخاتم لبسو ليها فيديها وباسها وهمس فودنيها وهي كضحك حشمانة
واءل : كنواعد ندير فعينيا لحبيبة ديالي .
شهقات وبدات تبكي تبكي تبكي وتشد فصدرها .. الهضرة دواءل كتعاود فودنيها و كتفكر نضراتو بيها وشحال كان فرحان وكيتسنى امتى يديها لدارو . شبعات بكا محنية على الخاتم شاداع فيديها حتى سخفات ونشفو عينيها وهي ترجعو لبلاصتو مع ذهبها وخباتو فالمرايو دمها و مشات حطات راسها على لمخدة نعسات كتنخصص .
فاقت الصباح بكري لبسات جلابتها وجمعات شعرها .. ماحطات حنى نقطة دالمكياج فوجهها .. جرات باليزتها وخرجات مع باها غادي وكيوصي فيها وخايف دير ليه شي فضيحة وتشوهو قدام العادي والبادي. ركبها فالكار ومشات متكية على الزاج ساعية وتخمم و واءل مكيتحيدش من بالها حتى دقيقة .
من ساعات ديال الطريق طويلة وصلات لاكادير ونزلات لقات لقات لقات خالتها سميرة واقغة كتسناها .. طويلة وشعرها كحل كبير تكون فسن الثلاتينات . مهلية فراسها وباينة عليها من حوايجها والبارفان اللي دايرة . عنقاتها وسلمات عليها ومشات جارة معاه الباليزة . وصلات لكاط كاط حكلة وحلات الكوفر حطات فيها البليزة وطلعو فالطوموبيل غادين طالقين خاليجي
سميرة : درتيها زوييينة جيتي .. حسن ليك خرجي من ديك القنطة وداك المرض ... حتى نتوما حرام واش عندكم حس الضحك والتقشاب فديك الدار بالسيف ما تمرضي .... طلقيها تسرح ماشي نتي اللولة ولا للخرى راه من عداااااد دااابا يجي اللي ينسيك فيه ويولي فخبر كان
دارت فاتي والدموع فعينيها وقالت : تزوج بصاحبتي تصوري !!!
[23/1 19:16] بارت: سميرة : سدرةها ويفوتوها .. عمرك تربي الكبدة على الرجال ... شحاال من وحدة كانت مزوجة وجات صاحبتها خدات ليها الراجل وسكنات فدارها ونعسات ففراشها ... شحال من واحد واعد وعدة بالزواج فاللخر تزوج صاحبتها وهي فدرا غفلون ماتجيب خبار حتى لهنار لعرس ... اودي اللي خلاتك خليها .
فاطمة الزهراء : كتشهق وفمها كيترعد) عمرني كان يحساب لي يخوني ... ولا يتزوج بصاحبتي ... عمرني تصورتها فحياتي
سميرة: كوووولشي ممكن الحبيبة .. هادي دير ليك الراس عمرك تيقي فشي ولد لمرى ... انا براسي دابا شكون قال ليا طحنون راه شاد الطريق غير معايا انا ... متوقعة منو اي حاجة ورادة بالي معاه باش نهار نخصل عليه شي حاجة منتصدمش... مهم درت من وعلاش نرجع حتى الى جا الطلاق يمشي هوا ويجي غيرو ... عمرك تربي الكبدة هانا نوصيك
وصلو لعمارة عالية بالاسانسور وطلعو لشقة كبيرة مفوهة بالسراجم والبالكونات والاتات عصري .. فكرات فاطمة الزهراء فدارها والجو اللي كانت عايشة فيه .. ماشي بحال دار باها بلدية وفيها النكير .
حجو البالز وجلسات كترتاح من السفر وخالتها غاظية جاية . بدلات لبسات كولون مزير وديباردور وطلقات الشعر وبدات تحرك
سميرة : حيدي عليك ديك الجلاة تنفسي راه الصهد .. نشعل لا كليم ؟ بلاتي نشعلها ... بدلي عليك وسيري راه الدوش الى بغيتي دوشي ... الدار دارك بلا منعرض عليك .. راه شريت كينتاكي للعشا قبل ما نجي نتعرض ليك .. ندير غير شي سلاد خفيفة ونخرجو نجلسو فالبالكون ...كيبان المنضر واعر منو بالليل .. ها الضواو بداو يشعلو والضلام بدا يطيح وتشوفي الشارع كيفاش كيعمر ماتقنطيش كاع
تنهدات فاتي ومشات دوشات وخرجات لابسة شورط قصير وديباردور لقات الطبلة فالبالكون عامرة بكينتاكي والموناظا وشلادة وجلسات هي وسميرة كيطلو على الشارع الكبير والبحر مقابل معاهم .. منضر راءع كيفوج على القلب . بدات فاتي تتعشى وتعاود القصة من اللول حتى لاخر على سميرة وتبكي عليها . قصرو الليلة كيتجمعو ويتعاوظو وبزز منها كضحكها سميرة بهضرتها .. ضاربة الدنيا بركلة وشاداها منين رخافت . بقاو قولها وضحك عليها مع سميرة سبيطار قتقتل بالضحك وتعاود على راجلها وزبايلهم حتى قرب الفرج وناضو دخلات معاها لبيت النعاس تخشاو بجوج فناموسية وحدة كيتجمعو حتى نعسو .
الجو مع سميرة رخف الازمة على فاطمة الزهراء ، الصباح مع حليو عينيهم خرجاتها سميرة بزز منها يتسراو والزدوح فالطموبيل و سميرة اصلا خاصها غا معامن وجاب ليها ربي معامن ضل دور وتخيط الشوارع بالطوموبيل . بالنهار مبحريين كيتبرونزاو وبالليل فالقهاوي عاصرين .. ها هما فالصالون هامهما فليبوتيك دالحوايج . كل مرة فين كيرجعو معطلين للدار ويطيحو ينعسو حتى لجوج عاد يفيقو .
دازت سيمانة وبدا الاب كل شوية يصوني عليهم فالتيليفونات . جاوباتو سميرة كتنفخ وقالت كضحك بزز
سميرة : الووو . لاباس بخير ....
عبد الله : دوزي ليا فاطمة الزهراء تجي بحالها .. قالت سيمانة وترجع وشي سيمانة مارجعات
سميرة : علاه مقالو ليك والو ؟
عبد الله : اااااش عندهم مايقولو ااااش ؟ اش كاااين؟
سميرة : فاطمة الزهراء راه خدمات ماعندها كي دير ترجع دابا
[23/1 19:17] بارت: عبد الله: بالغوات : ااااشمن خدمة ولا باكور معامن تشاورات تخدم قوليها يا تجي بحالها تجلس للرض قدامي ولا نجي نوريها الخدمة ... واش بغات تحمقني هادي ولا شنو ؟ واش واحد تفك منها وجابها ليا انا تحشم بيا
سميرة بعصبية: راك واااقيلا خرج ليك لعقل ولا ماعرفت مالك ! لبنت مسؤولة على راسها متبقاتش صغيرة واللي بغا يقول شي حاجة خليه يقولها
عبد الله : واش بغيتي ترجعي سلكوطة بحالك ولااا!
سميرة: حاشااااك !!!! ويييلي هادشي نيت اللي بقا مالي كي جيتك انا واش غير اللي شفتوها عايشة حياتها لابسة زوين ومفطحة ومبرعة وقالبة على كمامركم المنكدة كتردوها سلكوطة !!!! خاصكم المرى تبقا ديما مريضة ومقابلة السبيطارات والدوايات وحالتها حالة عاد ديك الساعة تقولو عليها مسكيييينة بنت الناس ! اسيدي انا مامسكيناااش ومابغيتش اللي يقول عليا مسكينة واللي ماحملني راه واخلة ليه فحلقو شكون قالكم انا صلا منكم ولانتوما مني باش نحشم بيكم هه! ايوا صااافي .. شوف عيط ليها والى بغات تجي تجي وعمرك تعيط ليا فهاظ النمرة ولا توصلي داري ... منك لبنتك الى بغات تجي تجي وسد عليا فمك شكون نتونا اصلا باس تحاسبوني يخخ
قطعات ليه فوجهو مخيخة وماحات فين دور حتى صونا التيليفون تلني وهزات تجاوب لقات عيشة ختها
عيشة: الو سميرة
سميرة : يا ختي واش هاداك راجل عند ولا واد الحار! مالو هاز عليا هاد الحقد كامل وبارك يسب فيا واقفة عليه انا ولا كيصرف عليا!
عيشة : اختي راه محررها فينا قهرنا ماعرفنا فين نصدو معاه ... فاطمة الزهراء لاباس عليها ؟
سميرة : لاااباس وبيييخيرررر رتاحت شوية هاد السيمانة وراها ناعسة .. اويييلي البنت حات صفرا قطرة ديال الدم مافيها مالها على خالتها على قلة جد باباهم الكلب الله يقطعهم الكلاب فين ما كانو
عيشة : شوفي راه بارك ينوض ويجلس باغيها ترجع ... جات مو بركت عليه بالهضرة . سايبا ماسايبا وراها دايرة الزبايل و جابو ليها واحد الشارف مزوج بولادو كبار فيه الزهيمر باغي اللي تهزو .. ولادو مزوجين ومالقا اللي يهزو ومابانت ليهم غا فاطمة الزهراء جابوه بيها عماتها باش يسترها قالك ... وراه باغيها تجي باش يزوجها
سميرة: اااويييييلي مالو هادا تسطا ولا شنو غير كيرمي فولادو ولا !!! اصلا قلت ليه خدمات غا باش تلقا السبة تبقا هنا....اوييييلي على يزوجها لواحد كبر من باها راه والله تا تشعل فيه العافية تسحابيها فاطمة الزهراء ساهلة ولا ! راه غا مصدومة والله تا تنوض تحرق الخرا كامل
عيشة: واااا ناااري هضرنا معاااه ... قالك الراجل مكيتعابش .. هوا خاصو يشوفها مزوجة وربي كبير .. شوفي ماتخليهاش تجي وياااك
سميرة : يا الله لا جات تي مالك حمقة والله لا زوجها .. هي تا العدة مزال مكملتها بقا ليه غا يزوجها ! والل لا كانت ليه لا نسميع راجل يجي عتب عندي تي نالم متعرفينش ولا ! خليها ترتاح تاااا تسالي عدتها وتقلب ليها على خدمة ولا سونطر دابيل فين كانت تخدم وراه ماخاصها تا خير هنايا ولامشيت للسعودية ها الدار تبرك فيها مكااااينش اللي يخرجها ولا يهضر معاه ... شدي اختي راجلك عندك راه والله و وصلني ولا عتب عندي تا رميه من هنا نجيبو لك تما .
عيشة : المهم هانا وصيتك .. راه نوضتها صباط مع عماتها و باركين يدفعو فيه ... شايفين هما غا الزواج مشايفينش بيمن يزوجوها .. خايفين لا متزوج وتبقا هوكاك شدو هاد الشارف ولسقو عليه وهوا تا سميتو مامسكدها . مهم غا تهناي يطير ولا ينزل مغترجعش .
قطعات معاه ومشات دخلات لبيت النعاس جلسات حدا فاطمة الزهراء ووبدات تفيقها
سميرة : نوضي نوضي سمعي اخر الاخبار .. نوضي توكضي
ناضت فاطمة الزهراء كتحل عينيها بزز والديباردو مجبد صدرها كامل كيبان وشعرها محلول قالت
فاتي : اش وقع ؟
سميرة : باك جاب ليك واحد الشارف فيه الزنر دالزهايمر وقالك تزوجيه وباغي يجي يديك باش تزوجي بيه ... عصبني قالي سلكوطة .. مالي اختي شافني هازة رجلي فالزنقا ودايرة الريكلام !!!
فاتي: اويييلي !!! وييييلي على يزوجني .. والله تا نرمي راسي من السطح
سميرة : فاش يجي خليني مني ليه ... والله تا نتعرا عليه . قلت ليه خدمتي والى جا وسولك قولي ليه اه خدمتي ... انا نهضر مع السيد صاحب راجلي عندو ريسطو يجلسك فلاكيس غير باش باك يشوفك خدامة ونديوه حتى لتما يشوف بعينيه باش يسكت ... ربع عقل اللي عندي بغا يطير يجد باباه ويخليني نضرب بالحجر بقا ليا غا هوا فالحساب
فاتي : ياختي بغا يقتلني بالفقصة ..بغا يطرطق ليا مرارتي ... كن غير يفوتني بغا يخرج عليا بيديه باش يرتاح .
خليه يجي باش نيييت نخرج ليها معاه كوود يعطيني التيساع ... متبغاش يحتارمني ويوقرني حتى انا غنخرج ليها معاه ..