عا.رة ال.بري ( الجزء6 | قصص بالدارجة

كانت متكية فوق السرير و ولادها فجنبها.. من بعد ما تعشاو و رضعاتهم.. كانو ناعسين و هي حاضية براءتهم و كدوز إيديها بشوية على بشرتهم الناعمة.. جا جلس وراها فاش سالا مكالمتو و باسها على عنقها.. دارت شافت فيه و ابتاسمات.. هدرات بصوت خافت باش متفيقش الدراري..

اكرام: انا غنديهم ينعسو..

جوزيف: (بنفس نبرة صوتها) غير جلسي.. انا غنديهم.. 

(هزات اكرام راسها باه و خلاتو هزهم بزوج دقة وحدة و مشا فاتجاه الباب.. بقات حاضياه فكل حركة و الابتسامة مكتفارقش وجهها حتا اختافى من قدامها.. نزلات رسها كتلعب بصبعانها و هي غطير بالفرحة.. أخيرا أمورها تقادات.. حياتها استقرات و سالاو مشاكلها.. ما بقات حتا حاجة شاغلة بالها.. الدنيا كاملة مبقاتش قاداها فرحة.. قفزات فاش حسات بيديه محاوطين خصرها.. 

جوزيف: مالك؟!..

اكرام: والو.. غير كنت ساهية و جيتيني على غفلة..

جوزيف: (زاد زير عليها) كنبغيك..

اكرام: (دارت تقابلات معاه.. شدات وجهو بين إيديها و باستو فحنكو بوسة خفيفة.. خلاتو يتبورش) كنموت فيك.. (عنقها بقوة و خشاها فيه.. شوقو ليها كبييير بزاااف.. حس بروحو رجعات ليه من ورا هاد الهضرة.. و أخيرا هي ليه دبا.. ليه بوحدو.. بقاو مدة طويلة و هما هكاك.. حتا بدات اكرام كتبعد بشوية و كتحيد الشعر لي نازل ليها على وجهها)

اكرام: اجي نتا بعدا.. لاش داير ليا هاد التمثيلية كاملة واخا سلمتي؟!.. (دارت إيديها على جنابها.. مطلعة حاجب و منزلة لاخر و هي كتسنا فجوابو) 

جوزيف: (حط إيدو على حنكها) بغيتك تحسي بشعوري فاش فكرتي تبعدي مني ولادي.. (يللا جات تهدر قاطعها بقبلة طوييلة.. قبلة كتحمل كمية هااائلة من المشاعر و الأحاسيس.. قبلة كل واحد فيهم كان كيعبر فيها لمدى حبو للآخر.. شفايفها كانو بحال المغناطيس كيجبدوه.. لداد بزااف.. عمرو تذوق بحالهم.. مكيسخاش ابعد منهم.. كان كيجر فشفايفها و يمص فيهم.. و لسانو خدام كيلعب و يتحسس ففمها.. بعد بزز.. فاش عرف بللي مغيقدرش يتحكم فراسو كثر.. و باس ليها على راسها..

جوزيف: نعسي دبا..

اكرام: مغترجعنيش؟!..

جوزيف: غدا غنرجعو.. غير رتاحي دبا.. (باسها حدا عينيها و وقف فاتجاه الباب)

اكرام: و نتا فين غادي..

جوزيف: غنعس فالغرفة لاخرة.. تصبحي على خير.. (خرج و سد وراه الباب)

اكرام: و نتا من أهلو.. (شافت مع جنابها و جرات عليها الغطا.. ابتاسمات فاش تفكرات هدرتو و نعسات لأول مرة فراحة تااامة.. معندها حتا حاجة تفكر فيها.. و أخيرا.. هادا هو الإستقرار لي طول حياتها كتحلم بيه.. سرعان ما داتها عينيها و انتاقلات للعالم الآخر.. عالم الأحلام و الخيال..

صبح صباح جديد.. حلات عينيها و هي كتكسل.. دخلات للحمام غسلات و خرجات بشوية و بخطوات ثقيلة.. مزال كتحس بالحريق متقدش تمشا عادي.. بقات ببيجاتها و مشات دخلات عند ولادها.. لقات الخدامة معاهم.. يللا فاقو و بدلات ليهم.. باستهم و جلسات جنب ناموسياتهم.. هزات نور هو لول.. جبدات البزول كترضع فيه و إيديها عند قمر كتلعب معاها.. حل باب الغرفة بشوية كيطل عليهم.. علات راسها فيه.. ابتاسمات فاش شافتو و رجعات كتشوف فولادها..

جوزيف: صباح الخير.. (قرب و باس ولادو..)

اكرام: صباح النور.. (بعدات عليعا نور فاش طلق البزول.. و عطاتو للجوزيف..) شدو و بقا متكيه عليك و هو واقف.. باش ميردش.. 

جوزيف: خاص تفطري بعدا لا.. (شاف فالخادمة و فهمات راسها.. حدرات راسها و مشات و اكرام هزات قمر كترضعها) غتسخفي راسك.. خاص تاكلي شي حاجة..

اكرام: ماشي مشكل.. المهم ارضعو دبا را بان ليا صابحين فيهم الجوع..

جوزيف: (سمع شي صوت من ولدو.. دار لقاه تجشأ و رد عليه شوية ديال الحليب) بفف شهادشي تاني.. مالو..

اكرام: ههه عادي.. راه عاد راضع و الدراري الصغار كيردو مرة مرة..

جوزيف: (هز ولدو حط إيد تحت من الكوش و الإيد التانية ورا ضهرو و هو مقابلو معاه) يااك ا ولدي.. وسختي ليا حوايجي دبا.. فعايل هادو ا صاحبي..

اكرام: ههه تا حط الولد لرض و سير شوف اش دير.. كالا صاحبي..

جوزيف: (حطو فسريرو و هز كلينيكس مسح ليه فمو شوية..) هانا غنمشي نبدل.. اجي نتي.. شفتك كتفهمي مزيااان فدراري و ملقيتي حتا مشكيل.. ياكما عندك شي زوج قبل😉..

اكرام: لواه 6😒.. را غير ختي غيثة عندها زوج ولاد و كنت معاها فاش كبراتهم.. توحشتها حتا هي مسكينة.. من نهار داني لؤي مابقيت شفتها و اا شفت ماما..

جوزيف: المرة جايا غنمشي انا و ياك تشوفيهم.. (هزات اكرام راسها باه و هو خرج مشا لغرفتو بدل غير جيلي لي كان لابس من الفوق بواحد آخر فنفس اللون.. حيت بوحدو لي عمر.. رجع لغرفة الدراري لقا الخدامة كتوجد فالطبلة و اكرام واقفة عند ولادها كتلعب معاهم.. مشا عنقعا من لور و هو خاشي راسو فعنقها)

جوزيف: غنغير انا الى بديتي كتهتمي بيهم بزااف..

اكرام: ويلي حي كالا تغير.. 

جوزيف: (باسها و را عنقها و جرها للطبلة) زيدي تاكلي.. (جلس و جلسها فوقو و هي كتقاد فبيجامتها من الفوق.. النص فصدرها خارج.. بداو كياكلو و أكيد عمرها تسلم من مداعبات جوزيف.. كملو أكلهم و مشات تبدل حوايجها لبسات كسوة بيضة طالعة على الركبة شوية و جات لاصقة عليها.. طايحة من الكتاف بخيوطة ساداهم من جيهة الصدر.. جا صدرها بارز و مع الحليب و الرضاعة زاد برز.. اما الكرش مولاتش عندها بزاف.. مع كانت متبعة السبور فالحبالة ديالها أكيد الخاص بالحوامل ماشي اي سبور.. اولا باش متلقاش مشاكل فالولادة و تولد طبيعية و متبانش كرشها ورا الولادة..

خلات شعرها على راحتو وهزات المونطو ديالها فيديها.. مشات عند ولادها لقات الخادمة لبساتهم و جمعات ليهم حوايجهم فالساك ديالهم.. هزات اكرام قمر و خادمة خرى نور.. عاد خادمة تالثة هازة الساك.. نزلات بخطوات بطيئة كتحاول على راسها.. بان ليها جوزيف خارج شوية كيهدر مع فتيلي و ميساء واقفة و هازة مونطوها فيديها.. مشات عندها مباشرة..

اكرام: متقوليييش ليا حتا نتي غادة معانا..

ميساء: (هزات راسها باه و مشات خدات نور من عند الخادمة) علاش مبغيتينيش نمشي؟!..

اكرام: ا ويلي لا.. حاشا.. بالعكس مزيااان اجي ونسيني..

ميساء: اقتارحها عليا جوزيف و مقدرتش نرفض..

اكرام: اجي يا الصكعة.. كنتي عارفة بللي جوزيف سلم ياك..

ميساء: هه و الى عرفت مالو غيخليني ندوي.. حكم علينا كاملين منقدش هه.. (يللا جات تجاوبها سمعات صوت جوزيف وراها)

جوزيف: صافي مشينا.. (هز راسو من تيلي شاف فيها.. طلعها و هبطها مزيااان و هو مخنزر) اش هاد اللبس؟!..

اكرام: كيفاش؟!.. مالو لبسي؟!!

جوزيف: طلعي لبسي شي حاجة مقادة..

اكرام: ا ويلي و علاه مال هاد الحوايج؟!..

جوزيف: واش انا مونيكة قدامك.. طلعي بدلي عليا هاد الحالة و جمعي عليا داك الشعر.. و لا جلسي لرض حسن ليك نيت..

اكرام: اووف.. نرجع نبدل تاني..

جوزيف: آري البنت و طلعي قبل مانوريك اوف اش كتسوا.. (عطاتو قمر و طلعات و هي كتخبط فرجليها و تأفأف.. مقدراتش تزيد معاه الهدرة مزال.. دخلات للغرفة بقات كتقلب على شي حاجة خرى مستورة.. جبدات سروال بيض مقطع من الركبة و لكن ممبينش اللحم و ملاصقش بزاف مع تريكو فالباج داكن مفضفض شوية و طايح من جيهة الكتف و بوط بيض طالع.. جمعات شعرها كوب شفال و نزلات لقاتهم مشاو للسيارة.. ركب الكوسان ديال لوطو حطو فيهم الدراري و جلسات جنبهم ميساء.. اما اكرام جلسات القدام حدا جوزيف و لي كارد كورد تابعينهم من لور.. بقاو غادين و هما كيهدرو فمختلف المواضيع.. ميساء و اكرام مبقاوش بغاو اسكتو اما جوزيف قليل فين كيهدر.. عينو غير على الطريق و على اكرام.. وصلو للمطار و طلعو فطائرة جوزيف الخاصة... 

وصلو لفاس و ضرب فيهم البرد ديالها.. توحشات اكرام الجو ديالها.. لاحت المونطو فوق كتفها و هي خاشية فيها بنتها بيما وصلو للسيارات لي كانو كيتسناوهم..

وصلو للرياض.. نزلو من السيارة و ميساء غير كدور فعينيها عجبها بزااف.. دخلو و اكرام كتقلب بعينيها.. حتا بانت ليها نازلة من الدرج.. لابسة قفطانها و كيف عادتها مزينة بالحلي.. شادة جنب ديال القفطان بيديها.. نزلات و البسمة على وجهها..

فاطمة: مرحبااا مرحبا ببنتي اكرام.. (قربات ليها و سلمات عليها) على سلامتك ا بنتي.. و الحمد لله مللي رجعتي لنا بيخير و على خير..

اكرام: شكرا ا دادا.. و نتي كيبقيتي دبا..

فاطمة: لاباس لاباس.. عطيني البنت نشوفها.. (خداتها من عندها و هي كتلعب معاها و كدوز إيديها على وجهها الصغيور) ما شاء الله.. عيناتها فنين.. بحال عينيك.. (باستها على راسها) ياربي تحفضها.. (هزات راسها شافت فجوزيف) اييه و نتينا عاد بنتي.. محشمتيشي حرءتي لي ءلبي على بنتي..

لؤي: و اخييرا وصلتو.. (كان نازل هو و آلاء داز سلم عليهم و خدا نور كيلعب معاه.. بقاو كيتسالمو و كيعاودو على أحوال بعضهم.. طلعو البنات للغرفة ديال اكرام كيتعاودو و آلاء و ميساء كيتعارفو أما اكرام مقابلة غا ولادها.. جوزيف و لؤي فالصالون كيهدرو أيضا.. أغلب مواضيعهم على الخدمة.. اما فاطمة واقفة على الخدامات فالغدا..

داز الوقت.. كانو مجموعين فالصالون كيديرو العصرونية.. 

فاطمة: بنتي اكرام كون غير بءيتي فبيتك.. و نجيب ليك أتاي تا لعندك.. راك مزال نافسة و راك كتحرك بزاف.. شد لرض شوية..

اكرام: لا ا دادا مليت.. مكنحملش نبقا فالبيت..

فاطمة: شغنءول ليك.. على خاطرك ا بنتي.. نتينا تعرف.. 

لؤي: (كيشوف فاكرام و جوزيف) احم.. نتوما غتبقاو هاكا..

اكرام: كيفاش؟!..

جوزيف: الى بغيتي من غدا معنديش مشكل😉..

اكرام: ناري شحال كنكره هاد الهدرة عندكم.. 

آلاء: اش كاين هه..

لؤي: صافي جا الوقت باش ضربو لاكط.. راكم تعطلتو بزاف.. و تافقت انا و جوزيف غدا نجيبو العدول باش ديرو العقد..

اكرام: (سكتات حدرات راسها و هي كدور فعينيها.. بقات غير كتلعب فصباعها بتوثر.. ميساء و آلاء غير كيشوفو فيها و كيضحكو.. كملو هدرتهم عادي و اكرام غير كتشوف طاح عليها السر مبقاش تسمع حتا صوتها) ..

داز هاد النهار على خير و جا نهار جديد.. نهار غيكتب قدر جديد لأبطالنا.. و غيبداو فخطوة جديدة فحياتهم.. من بعد ما فطرو طلعات لالة فاطمة للاكرام قفطان بيض سامبل.. جا طايح عليها نازل من الكتاف.. و كللو محجر من جيهة الصدر و مطروز من التحت.. مع مضمة فنفس اللون محجرة.. دارو بيها البنات دارو ليها مكياج خفيف و ركزو ليها على العينين.. خلات شعرها مطلوق و دارتو بوكلي من التحت.. نزلوها جلسات حدا جوزيف لي كان بكل أناقتو و الفرحة بادية على ملامحو.. ميساء كانت هازة نور و آلاء قمر.. و جالسين كلهم فالصالون الواسع.. جا العدول سولهم واش موافقين الخ.. سيناو على العقد و تعلن زواجهم.. ضرباتها لالة فاطمة بغروتة دايزها الكلام.. تسمعات فكل أرجاء القصر.. اكرام فكرات مزيان و قررات مديرش العرس.. معندهاش مع صداعو.. و اصلا مجاتهاش دير العرس و آلاء مدارتوش.. مبغاتش تكون أنانية فهاد النقطة.. يكفي غير السبوع لي أصرااات عليه لالة فاطمة.. جوزيف و لؤي مشاو وصلو العدول للباب و خرجو من بعد بزوج.. اما البنات طلعو لغرفة اكرام.. كاملات.. دخلو و سدات آلاء الباب..

آلاء: اوا مبروووك لالة العروسة هه..

ميساء: ويتك ويتك.. شوفي معرت منين نزلات عليها الحشمة يا ختي ههه..

آلاء: سكتيي.. هاديك انا لي كنعرف ليها.. مالها ساهلة..

اكرام: (خنزرات فيهم.. ناضت حيدات القفطان و بقات بدو بياس.. ربعات رجليها و هزات قمر كترضع فيها) هنيونا ا دوك الكمارات.. مبقا حد احشم تا فخاطرو.. (جلسو حداها فوق السرير و آلاء كتلعب مع نور)

ميساء: علاه نتي كتحشمي بعدا.. وا بااااز

آلاء: شوف ليك السيدة بعدا تعرات علينا.. 

اكرام: ا ختي تخنقت بداك القفطان.. لوحي معاك ديك الكسوة..

(هزاتها آلاء لاحتها ليها.. كانت كسوة فالغوز باردة.. فوق الركبة و واسعة ديال الدار.. بعدات قمر شوية لبساتها و رجعاتها ترضع)

اكرام: آلاء..

آلاء: ويي..

اكرام: مزال مناوية تولدي ولا شنو😉..

آلاء: ويلي يا ختي متفكرينييش.. جداك منكداها عليا صباح و عشية.. قالك مكتولدش.. و انا متافقة مع لؤي منولدوش دبا..

ميساء: و اش دخلها هي.. قوليها ليها.. مزال مبغيتي تولدي.. اش فيها؟!..

آلاء: ا ويلي بغيتيها تنحرني.. منقوليها متقول ليا.. اصلا دبا را حبست الفانيد دبا.. و نتسناو على الله..

ميساء: باااينة هاد لالة فاطمة صعيييبة فطباعها..

آلاء: غير صعيبة و سكتي..

اكرام: شوو.. قمر نعسات..

ميساء: (بصوت منخافض) و حتا نور واخا مراضعش مسكين..

اكرام: ماشي مشكل.. غندي قمر و نديه.. فاش افيق نرضعو.. (دات قمر و تبعاتها ميساء بنور.. مشات لغرفتهم و حطاتهم فالأسرة ديالهم.. هي التالية كانت وجدات ليهم غرفتهم و قاداتها بنفسها)

داز نهار و جا ليل.. نعسات ولادها و مشات تكات فوق السرير.. كانت عيانة.. داز نهار طويييل.. تحل الباب بشوية.. دخل بخطوات بطيئة و سد الباب وراه.. مكانش باين ليها مع الظلام.. و لكن عرفاتو هو و تقادات فالجلسة

اكرام : جوزيف..

جوزيف: شوو متبقايش ذكري هاد السمية (شعل ضو خافت حداهم و قرب ليها جلس حداها و باسها على راسها) و أخيرا وليتي مراتي.. و ديالي بوحدي..

اكرام : (قربات ليه عنقاتو و دورات إيدياتها على خصرو) انا اصلا من لول ديالك.. و ديالك بحدك..

جرها لعندو و بادلها بنفس العناق.. بقاو شحال على ديك الوضعية.. حتا بدات اكرام كتفوه و تبعد.. بشوية..

اكرام: فيا نعاس.. غندوز نركد عيت..

جوزيف: تسناي.. بغيت نبدل سميت جوزيف..

اكرام : بصح.. احسن حاجة غدير.. 

جوزيف : و بغيتك نتي لي تختاري سمية خرى..

اكرام : انا..

جوزيف : (هز راسو باه) نتي..

اكرام : (ربعات رجليها و هي كتفكر.. مدة قصيرة شوية عاد نطقات) لقيييتها..

جوزيف : شنو هه..

اكرام : واحد السمية كانت عزييزة عليا كتعجبني بزااف..

جوزيف : اطريبينا غا متكونش شي كارثة..

اكرام : (ضرباتو على كتفو بشوية: هنينا.. سمع.. نزار..

جوزيف: نزار ؟؟!!!..

اكرام : اه.. لاش مالك.. معحباتكش؟!..

جوزيف: لا غير جاتني غريبة شوية.. و لكن زوينة..

اكرام : يااااي.. نزار هه.. (خشات راسها فصدرو) حبيبي نزار..

نزار: هبيلة.. دوزي تنعسي دبا و لا طار منك..

اكرام: (كتفوه) لاا.. غندوز نعس نيت.. عيييت..

ناض بدل عليه لبس شورط و تخشا حداها.. حطات راسها على صدرو العاري و دورات إيديها على خصرو.. سرعان ما انتاقلو للعالم التاني..

دازو يوماين فلمح البصر.. دوزوهم غير فالتوجاد للسابع.. اما اكرام كتقيل مخشية فبيتها هي و ولادها.. مكتخليهاش لالة فاطمة تحرك.. حلات عينيها ملقاتوش حداها.. ناضت كتكسل مشات لحمام دوشات.. تحيد عليها غير ريحة الدم.. خرجات لقات الفطور واجد.. طلعاتو ليها الخدامة.. لبسات الملابس الداخلية و كسوة فالحمر حد الركبة ديال الدار.. كلات بالخف و مشات عند ولادها رضعاتهم و بقات معاهم.. جاو البنات ونسوها.. تغداو و بقاو فالغرفة كيدويو.. حتا دقات عليهم الخادمة باش تاخد نور.. علماتهم بللي جا الطبيب باش اختنو.. عطاتو ليها اكرام.. و مشات كللا وحدة لغرفتها باش اوجدو راسهم.. خلات اكرام الخادمة كتلبس فقمر.. و مشات لغرفتها هزات قفطانها.. كان قفطان فالبوردو.. محجر من لفوق و حد المرفق.. جا نازل من التحت سامبل مع صمطة رقيقة مذهبة.. مبغاتش تلبس شي حاجة مشارجيا هي بنفسها لي اختارتو.. بغات شي حاجة سامبل.. دارت مكياج خفيف و خلات شعرها مطلوق.. مشات عند قمر لقاتها ملبساها.. بقات كتلعب معاها حتا جاو عندها البنات ميساء كانت لابسة قفطان فالحمر ماكياج خفيف و جامعة شعرها الأشقر شفنجة.. آلاء لبسات قفطان فالكحل حتا هي مكياج خفيف و ركزات على عينيها.. دارت كوب شفال و دورات شعرها قدامها مع طويل.. هزات اكرام قمر.. نزلو للحديقة فين غتكون الدبيحة.. كانو الدراري واقفين كيهدرو.. نزار كان لابس فوقية فالخضر و سفيفتها بيضة هاز نور فيديه و ساعتو ضارب فيها الشمس.. لؤي كان لابس جبادور فالكحل و يوسف لي جا غير ليوم فالصباح كوستيم فالزرق..

هزو عينيهم شافوهم و مشاو عندهم.. نزار مشا مباشرة عند اكرام..

اكرام: (حطات إيديها على صدرو) جات معاك الفوقية هه..

نزار: (دور إيدو على خصرها و جرها قربها ليه) و نتي مكيجيش معاك القفطان..

اكرام : يااااك..

نزار: (باسها جنب فمها) قلت غا الحقيقة..

اكرام: اوا سير بعد مني..

نزلو الحوالى كانو زووج كبااار واحد انسيك فلاخر.. بيضين و كرونهم ملويين.. عطاوهم السميات كبرو و بداو كيدبحو.. جوزيف مموالفش بهاد الأجواء.. كانو ناس قلال فالحديقة.. غير هما بيناتهم و شي أصدقاء قلال من معارف لالة فاطمة و جيرانهم.. الحفل غيكون فالدار لداخل.. نزار جر اكرام و دخلو للصالون الكبيير لي لداخل.. هما زوج صالونات مفتوحين على بعضهم.. الرجال فصالون و النساء فصالون آخر باقي الحضور قليل.. صوت الطرب الأندلسي مسموع فالرياض و رائحة البخور حتا هي عاطية.. حطات اكرام ولادها فزوج أسرة جابوهم على قبلهم.. و بقاو واقفين حداهم.. بشوية بداو كيدخلو الناس و يدوزو يباركو ليهم.. نزار مل من هاد الجو و مشا عند لؤي و يوسف و بقاو واقفين كيهدرو.. و الخدم غادين جايين.. 

داز الوقت.. و بداو الناس كيخرجو.. داز كلشي مزيان و هو هداك.. خوات الدار و طلع كل واحد لغرفتو.. اكرام غير بدلات عليها و نعسات الدراري مشات هي التالية نعسات.. آلاء حتا هي بدلات و نعسات.. حاسة براسها عيانة بزااف نهار كللو و هي ماشي تال تم.. مكلات والو معندها شهية.. اصلا لي كلاتها كتردها.. ميساء رجعات مع يوسف لكازا.. خاصهم اقادو أمورهم حيت قريب غيتزوحو هما كذلك.. لؤي و جوزيف نزلو للحديقة و جلسو كيدويو.. رجعو للهدوء لي كيعجبهم...

صبح صباح جديد.. حلات عينيها بشوية.. دارت شافتو ناعس و مزال خاشيها فيه.. تفكات من إيديه و ناضت للحمام غسلات.. خرجات لقاتو مزال ناعس.. ضحكات و مشات عند ولادها.. حتا هما مزال ناعسين.. نزلات و مشات للصال ا مونجي لقات لالة فاطمة كتفطر..

اكرام : صباحوو دادا.. (مشات باست إيديها و جلسات)

فاطمة: الله ارضي عليك.. رتاحيتي شوية..

اكرام : (هزات راسها باه و هي كتجر طوسط عندها)

فاطمة : ليوم ا بنتي غترجع كنزة.. فخبارك ياك..

اكرام : بصح.. مفخباريش..

فاطمة : علاع مءالهالكش لؤي..

اكرام : لا ماقال لي والو..

فاطمة : غيكون نسا..

اكرام سكتات و هي كتفكر فكنزة لي غتجي.. عندها فضول كبيير باش تعرف عليها.. بزاف ديال الأسئلة كتجول فبالها.. كملات فطورها و طلعات رضعات ولادها.. خلاتهم مع الخادمة و مشات عند آلاء.. لقاتها عاد خارجة من الحمام و وجهها صفر..

اكرام : مالك نتي حالك معاجبنيش..

آلاء : و الله ا ختي معرفت.. هانتي كتشوفي حالتي.. مبقيت عرفت مالي غير كنرد.. نقدر نكون كليت شي حاجة..

اكرام : لااا لا منظنش..

آلاء : اوا شنو غيكون..

اكرام : (جلسات فوق السرير) زعما ممكن تكوني حاملة..

آلاء : معرفتش..

اكرام : اوا سيري دوزي باش تحيدي الشك..

آلاء : (جلسات حداها) دبا خليك مني.. و قولي اش كاين.. عارفاك ماجاياش حبا فيا ههه

اكرام : بغيت غير نسولك على كنزة.. حيت مشيتي لأمريكا و جلستي معاها فهمتي..

آلاء : تي شمن جلست معاها الله اهديك.. على هي فين عمرها جلسات فالدار.. كنشوفها غا بليل.. و مكتهدر مع حد يا ختي.. كتهدر مع لؤي و لكن انا حسيت بيها بحالة كتجنبني.. اصلا بيني و بينك محملتهاش.. مدخلاتش لخاطري نهااائيا..

اكرام : ههه او هادشي كامل..

آلاء : و كثثثثر.. 

اكرام: فينو لؤي..

آلاء : مشا يجيبها من المطار..

اكرام : ممم مزيان.. اوا ليوم نتعرف على ختي العزيزة هه... 

كانت جالسة فالصالون فوق كنابي مقابلة مع الباب و مضورة بيها ولادها كتلعب معاهم و كضحك.. سمعات صوت الهضرة جاي من الباب و وقع الخطوات غادي و كيقرب.. هزات راسها بانت ليها داخلة هي و لؤي كيهدرو.. كانت لابسة كسوة قصيرة طالعة على الركبة مخططة بالكحل و اليض و جات لااصقة على جسمها.. قربو و وقفات كنزة كتشوف فالرياض.. متبدل فيه والو.. دورات وجهها جات عينيها على اكرام.. 

دارت اكرام حركة للخادمة باش ترد بالها مع الدراري و مشات فاتجاه كنزة.. وقفات قدامها و بقاو كيطالعو بعضهم بنظرات غير مفهومة.. مبقاو كيشوفو حتا حاجة جنبهم.. حسو بالدنيا وقفات و ضربات قلبهم غادة و كتسارع.. ساد الصمت لمدة طويلة و كل وحدة كتشوف فملامح الأخرى و كتقارن بيهم نفسها.. أكيد هادشي فمخيلة كل وحدة فيهم.. رغم أنهم توأم مختلف و لكن أوجه الشبه بينهم واضحة بزاااف.. مدات كنزة إيديها هي لولة.. عاد مداتها اكرام.. تسالمو و قربو لبعضهم تسالمو من الوجه.. 

كنزة : و أخيرا تلاقيتك.. مبروك الزيادة.. سوري.. و لكن عاد عرفت بقصتك غير البارح..

اكرام: ماشي مشكل.. شكرا..

كنزة : (بابتسامة صفرا) مشرفين... ا ختيي.. (وركات على آخر كلمة) 

اكرام : (اكتفات بابتسامة و هي كدور هضرتها فدماغها)

كنزة : سمحيليا غنمشي نطلع لبيتي.. خاص نرتاح..

اكرام : خودي راحتك.. (خوات ليها الطريق باش دوز و وقفات و هي كتشوف فيها كيفاش طالعة و صوت الطالون كيتسمع فالأرجاء.. معرفاتش لاش حسات بإحساس أنها بحالة كتستافزها و كتحداها.. ابتاسمات فاش حسات بيديه محاوطين خصرها..

اكرام : نزار..

نزار: رووح نزار..

كانت غادة فاش سمعات صوتهم ضارت.. تصدمات فاش شافتو هو.. و لكن هي سمعات نزار.. رجعات عندهم و هي كتحاول تستوعب..

كنزة : شكون نزار..

نزار: كنزة جيتي.. على سلامتك..

كنزة : الله اسلمك ا جوزيف.. احم مغتبعدش من السيدة راها مزوجة..

نزار: (باس اكرام فعنقها) اه مزوجة.. و مراتي..

(وقفات و هي كتشوف فيهم بصدمة بادية على ملامحها.. دقات قلبها بداو كيتسارعو و هي كتشوف فيه معنقها و كيبوس فيها)

كنزة: ك.. كيفاش.. مفهمتش..

لؤي: معندك ما تفهمي.. نزار هو جوزيف دبا بد السمية فاش سلم😉..

كنزة : سللم؟!.. (بقات واقفة كتشوف فيهم.. مفاهمة والو شحال من صدمة تلقات هاد النهار.. كتمات غضبها و دارت ابتسامة مصطنعة) مبروووك.. فرحت ليكم..

طلعات كنزة لغرفتها و النار شاعلة فقلبها.. وقفات قدام غرفتها حطات إيديها على البواني باش تحل الباب و رجعات حيداتها بسرعة.. خاصها تشوف لالة فاطمة هي لولة.. و مخاصها تبين والو..

نرجعو لتحت.. كانت شادة ولدها نور فيديها و نزار هاز قمر كيلعب معاها و هي كضحك و تقهقه.. ضحكة برييئة بزاااف.. ضحكة ملائكية.. كانت اكرام حاضياها و هي كضحك.. نسات نور لي بين إيديها و هي كتشوف فقمر.. عندها احساس ماشي هو هداك.. لعنات الشيطان و حاولات تبعد تفكيرها على هاد الموضوع... لاحظ نزار سهوتها..

نزار: مالك؟!..

اكرام : (لا رد غير ساهية و كتشوف فالخوا)

نزار: اكرااام..

اكرام : اا.. ءءء.. نعام..

نزار: فين كنتي ساهية؟!..

اكرام : والو غير كنفكر و صافي.. اه تفكرت..

نزار: شنو؟!..

اكرام : توحشت ماما.. بغيت نشوفها.. راني حملت ولدت و تزوجت و مكانتش فجنبي لا هي لا ختي..

نزار: صباح الخير..

اكرام : كيفاش؟!..

نزار: على سلامتك مللي تفكرتيهم.. لؤي سيفط ليهم لي يجيبهم تا لعندك..

اكرام : بصح؟!.. واااو احسن حاجة غيدير فحياتو.. توحشتهم بزااااف.. و اخيرا غنرجعو نتجمعو..

نزار: و لكن مكنظنش غنطولو هنا مزال كثر.. يمكن هاد النهار و نرجعو..

اكرام : لا لا عفاك.. بغيت نبقا مزال..

نزار: اش غتبقاي ديري؟!..

اكرام : نبقا مع عائلتي مثلا.. ها ماما و غيثة غيجيو عندي.. و عاد دادا مبغيتش نخليها.. و كنزة لي عاد رجعات مجاتش نمشي هكا..

نزار: (دار ابتسامة جانبية) كنزة😏..

اكرام : اه.. لاش مالها؟!..

نزار: راك مزال معارفة والو.. المهم انا مكنرتاحش ليها.. معرفتش لاش.. و لكن بعدي منها من الاحسن..

اكرام : را ختي هاديك واقلة..

نزار: عارف.. و كنتمنا انها دير بهاد العلاقة لي بيناتكم.. 

اكرام : و الله مفهمت فيك شي حاجة..

نزار: بلاش.. حسن..

اكرام : اوووف صافي.. دبا غنبقاو مزال ياك.. (كدوي بصوت معسول و كتبيض فعويناتها الرماديتين.. حركاتها دوبوه.. مقدرش اقول ليها لا..)

نزار: واخا واخا.. و لكن مغنفوتوش سيمانة..

اكرام: صافي منغفوتوهاش.. (باستو على حنكو بوسة خفيفة و دارت إشارة للخادمة باش تاخد قمر) انا غنطلعهم باش ارضعو.. (هز راسو باه.. و خرج للحديقة كيدوي فتيلي.. اما اكرام طلعات لغرفتها كترضع فوليداتها و هي كتلعب معاهم.. و زوج خادمات ضايرات بيها كيعاونوها فاي حاجة احتاجتها.. حتا هما ولفو بالتوأم و ولاو رادين بالهم معاهم بزاااف.. اصلا حتا حد ميقدر ميبغيش هاد الملائكة.. ضحكتهم البريئة كتبعث الطمأنينة فنفس الشخص.. حركاتهم الصغيورة ريحتهم الرائعة و بشرتهم الناعمة.. هادو هما الاطفال ملائكة فوق الارض..

كان واقف كيهدر فتيلي.. واقف وقفتو الرجولية بهيبتو المعتادة و داير إيدو فجيبو.. حتا سمع صوتها من خلفو..

كنزة: ممم نزاار.. (كتقولها بحالة كتجرب فالسمية.. دار شاف فيها و رجع كمل محادثو بحالة مشافهاش.. ربعات إيديها و هي كترمش عويناتها من الشمس لي ضاربة فيها.. تسناتو حتا كمل عاد نطقات)

كنزة : شكون ختار ليك هاد السمية.. خيبة بزاااف.. جوزيف حسن..

نزار: مكيهمنيش رأيك.. قولي اش باغا..

كنزة: لا.. حشومة تهدر مع خت مراتك هاكا..

نزار : كنزة معنديش الوقت.. اش باغا؟!..

كنزة: لاش بغيتيها هي؟!.. متهربش من الجواب.. ضحيتي بشحال من حاجة على ودها.. سلمتي.. الياهودي لي عمرو فكر حتا فشناهو الاسلام ولا مسام دبا و كللو على ودها.. خرجتي من المافيات و شحااال من حاجة.. غير باش تكون ليك.. انا مطلبت والو.. و كنت غنعطي كلشي..

نزار : انا مسلمتش و خرجت من المافيات على ودها هي.. تقدري تقولي تقريبا هكاك.. و الجواب ساهل.. لقيت قيها شحال من حاجة عمرك غتفهميها..

كنزة : صافي هادا هو جوابك لخر..

نزار : (حط إيدو على كتفها) كنزة.. حاولي تنساي عليك هاد الموضوع.. غتلقاي واحد النهار الشخص لي يفهمك.. انا متأكد..

كنزة: (بقات كتشوف فيديه لي على كتفها بلا حتا كلمة و النار كتحرق فقلبها.. مخاصهاش تهدر دبا.. نزار بقا كيشوف فيها لمدة قصيرة.. فالتالي حيد إيديه و دخل لداخل الرياض)

كنزة: كنقسم حتا غنحرقكم كاملين واحد النهار.. وعد مني ا جوزيف.. و حتا نتي ا لالة اكرام.. مبقاش بزاف.. (كانت كتشوف لبعيد.. كتحاول تقصح قلبها و دموعها باش مينزلوش.. و لكن حالفة فنفسها انها غترجع حقها.. واخا يكون على حساب حياتها..)

نرجعو لنزار.. طلع لغرفتو بدل عليه.. لبس شورط كحل مع تيشورط سماطي فنفس اللون باكس من لور.. هز فوطة و نزل للقاعة ديال السبور.. حتا الرياض فيه بلاصة السبور مجهزة مزياان بحال شي نادي رياضي.. خدا لي كون ديال البوكس و بدا كيلعب.. كيضرب و دماغو مسافر لبعيد كيتفكر ديك الليلة.. مزال ماقدر انساها.. تحفرات فدماغو.. كللو كيتصبب بالعرق.. عروف جبينو ولاو واضحين.. و عضلات بطنو زادو برزو مع تيشورط لي لاصق عليه.. 

نرجعو شوية للور.. كان متكي فوق سريرو على ضهرو فوسط غرفتو لي فالرياض.. الرياض لي كبر فيه.. منتصف الليل.. ضوء خافت كيزين الغرفة المضلمة.. الشرفة محلولة و داخل نسيم ديال البرد رائع مخللي الخوامي طايرين.. كان داير إيديه ورا عنقو ساد عينيه و مستمتع بالجو.. حل عينيه بشوية فاش سمع الباب تحل.. لقاها قدامو.. ريحة عطرها المثيرة سابقاها..

حلات حزام البينوار الأسود.. و بدات كتنزل فيه بشوية من على كتافها.. فقط على ريوس صبعانها حتا طاح.. كانت لابسة شميز دونوي فالأسود.. قصيرة بزاااف.. مشبكة من جيهة الصدر.. زادت بينات بيوضيت جسمها.. كانت مبينة جميع مفاتنها.. كتشوف فيه بجرءة زادت صدماتو.. بدات كتقرب بشوية.. كتمشا ببطئ كبيير خلاها تفرض أنوثها.. حتا وصلات قدامو.. مبقا فاهم والو.. جلس و يللا جا يهدر جلسات حداه و حطات صبعها على فمو.. نطقات بصوت خاافت و ملحون..

كنزة : شوو.. متقول والو.. (قربات ليه كثر و جلسات فوق رجليه.. فوق المعلم مباشرة.. دورات شعرها الحريري.. لجهة وحدة حتا ضرب ليه فوجهو.. حطات إيديها فوق صدرو العاري كدوزها بشوية على ريوس صبعانها حتا بورشاتو..)

نزار : كنزة.. انا..

كنزة : (حطات إيديها على حنكو) شوو.. هاد ليلة انا ليك..

فيقو من سهوتو لؤي لي حط إيدو على كتفو..

لؤي: فاش ساهي..

نزار : والو..

لؤي: (جلس و مد ليه فوطة) لا.. باين ليا ماشي هو هداك..

نزار : (خدا الفوطة جلس مقابل معاه و بدا كيمسح وجهو و عنقو لي كيقطرو بالعرق) ماشي شي حاجة مهمة..

لؤي: نتيقوك هاد المرة.. 

نزار : كنفكر غير فاكرام لي مزالة ناوية تبقا..

لؤي: بقا.. اش فيها..

نزار: (غمزو) مجاتنيش نبقا فدار مراتي😉..

لؤي: متنساش هاد الدار راك كبرتي فيها.. و دوزنا فيها طفولتنا كاملين..

نزار: معرفتش..

لؤي: (وقف و تم غادي فاتجاه الباب) من الاحسن تبقا شحال متجمعنا فدار وحدة بحال صغرنا..

نزار: نفكر..

لؤي: معندك فاش تفكر.. (وقف فالباب و دار شاف فيه) اه قبل لا نسا.. مدام كاميليا غتجي غدا فالصباح.. هادشي لي قالت..

نزار: علماتك قبل مني انا لي ولدها😏..

لؤي: المهم وجد راسك لواحد العاصفة.. راها عاد عرفات بزواجك هه..

نزار: موجد من نهار خديت هاد القرار..

خرج لؤي و خلاه كيحاول يقاد أفكارو المبعثرة.. مخاصوش يبقا يفكر فهاد الموضوع.. اكرام كتبقا ختها.. يستحيل تكون بينهم شي عداوة.. على الأقل كيحاول يقنع راسو بهادشي..

داز هاد النهار على خير.. و جا نهار جديد.. حلات عينيها بشوية لقات راسها فحضنو.. ناضت غسلات.. و خرجات مشات عند ولادها هما لولين طلات عليهم لقاتهم مزال ناعسين.. باستهم و رجعات لغرفتها لقات نزار عاد فاق.. دخل للحمام و هي بدلات عليها.. لبسات كسوة حمرة صماطي حد الركبة.. بحزام من الوسط فنفس اللون.. نزلات بخطوات بطيئة لقاتهم كيفطرو.. جلسات جنب كنزة..

اكرام : صباحوو..

فاطمة: كيصبحتي ا بنتي..

اكرام : سافا.. مزيان ا دادا.. (رجعو كياكلو فصمت حتا نزل نزار.. باس اكرام على عنقها قدام عينين كنزة لي غياكلوهم.. جلس جنبها و هو شادليها فيديها.. فطرو و جلسو مجموعين فالصالة نزلو الخدامات التوأم لاكرام و جلسو.. كنزة مجلساتش معاهم.. طلعات لغرفتها فاش شافت تيلي ديالها كيصوني و مبقاتش نزلات.. 

دخلات بخطواتها الثقال كيف عادتها.. وقفات كدور عينيها على الرياض و الحارس وراها.. خرجات اكرام و هي هازة قمر كتلعب معاها و الخدامة وراها هازة نور.. حتا لقاتها قدامها.. عرفاتها غتكون امرأة فالأربعينيات و لا حتا الخمسينيات.. واخا ماباينش عليها نهائيا العمر.. دايرة مكياج خفيغ و لابسة كسوة كحلة لاصقة على جسمها حد الركبة.. طالقة شعرها لبني و مدوراه لجهة وحدة.. دي كون فالبرتقالي مزينين ايدها.. و هازة بوشيطتها فنفس اللون فيديها.. ابتاسمات ليها اكرام بدون اهتمام و مشات باش تكمل طريقها.. حتا وقفاتها بصوتها.. 

كاميليا: نتي مرت ولدي جوزيف ياك..

اكرام : (دارت شافت فيها و هي مافاهمة والو.. هزات راسها باه و اكتافات بالصمت)

كاميليا: عطيني حفيدتي نشوفها.. 

اكرام : و لكن شكون نتي؟!..

كاميليا: واقيلا راني قلت ليك عطيني حفيدتي.. باين شكون انا.. و لكن نعودها.. انا الام ديال جوزيف.. لي ولا راجلك دبا.. بففف..

اكرام : اه سمحيليا معرفتكش.. (قربات ليها و مدات ليها قمر.. هزاتها و هي كتشوف فيها حطات إيديها على وجهها كدوزها بشوية.. ابتاسمات بلا متشعر لحركاتها الطفولية)

كاميليا: ويتووو الفنكوشة.. (كتلعب معاها) يخليلي الزيين.. (هزا راسها خنزرات فاكرام) و لكن مبغيتش مك ا حبيبتي تكون هاكا.. 

نزار : الوليدة جيتي..

كاميليا: سي باا بوسيبل.. اوووف.. (مدات قمر لاكرام بشوية عليها و خلاتها طلع باش تبدل ليهم عاد دارت عند نزار)

نزار: مالك تانا.. دخلي رتاحي بعدا..

كاميليا: ساير تفلا عليا ياك.. على آاااخر إيامي انا.. يتزوج ولدي بمسلمة.. يلعن تربيتها.. كيفاش قدرتي ديرها.. مهمكش دينك ا ولدي..

نزار: الوليدة راك مافاهمة والو..

كاميليا: لا فاهمة.. و فاهمة مزيان.. جبتيلي une pute (قحبة) تال قاع دار.. تزوجتيها واخا مسلمة و عادي.. لا سمحلي ا ولدي.. طيحتي لي بوجهي قدام كلشي.. منقدرشي نسمح بهادشي مزال..

فاطمة : لالة كاميليا جمع فمك شوية.. متءولش هاكا على بنتي.. منسمحلكش..

كاميليا: ويلي لالة فاطمة.. ميمكنشي تكوني جيتي منها هي.. انا عارفاك حتا نتي مسلمة.. و لكن تخيلي لو وحدة من بناتك تزوجاتو ياهودي.. مغتقبليهاش.. بكل بساطة حنا حرام على رجالنا المسلمات و نتوما حرام على بناتكم اي ديانة غير الاسلام..

نزلر: الوليدة.. مكتهمنيش هاد الهدرة انا.. حياتي هادي.. و انا لي كنقرر فيها..

نزلر: الوليدة.. مكتهمنيش هاد الهدرة انا.. حياتي هادي.. و انا لي كنقرر فيها..

كاميليا: يااااك ا ولدي.. هادا باش كتجازيني.. ربيت سهرت و كبرت باش نسمع منك هاد الكلام.. واااخا.. انا لي درتها لراسي.. على آخر ايامي جايب ليا الخانزات..

فاطمة: (هزات إيديها بحالة كتقول ليها وقفي) اييييه.. حدك تم.. جمعي فمك.. منسمحش ليك دوي مزال على حفيدتي اكرام هايدا..

كاميليا: (كتحاول تستوعب هدرتها) حفيدتك؟!.. لالة فاطمة.. بنتي ليا بدا كيدخل معاك الكبر.. ويلي اش سايرة تقولي.. اكرام راها غابرة سنين طويلة هادي.. الله اهديك ا لالة فاطمة..

فاطمة : مزاالة شادة فراسي.. متخافشي عليا.. و بنتي لي كانت غابرة.. لءيناها و الحمد لله.. كللو بفضل مولانا..

كاميليا: ميمكنشي.. اكرام اكرام..

فاطمة : (هزات راسها باه) اكراااام..

كاميليا: اوا مبروووك علينا.. و لاش مقلتوهاش ليا.. (خنزرات فجوزيف) جايبين ليا غير خبار النحس.. اما خبار الخير مكتوصلوهاش.. فينو لؤي..

فاطمة : لؤي راه خارج دبا..

كاميليا : ايه و لكن مفهمتش.. انا عايرت مرات جوزيف ولدي.. اش جابها لاكرام بنتنا..

فاطمة : ويلي.. بنتي لي نتي لي دخل معاك الكبر.. (بقات كاميليا كتشوف فيها بدون فهم) ا لالة را بنتي اكرام.. هي مرات ولدك جوزيف..

كاميليا: دبا نتينا قبلتي بنتك تزوج ياهودي.. عادي زعما..

فاطمة : راك مفاهماشي...

كاميليا: (قاطعاتها قبل متكمل هدرتها) معندي مانفهم.. مبرووك على وليداتنا.. واخا راه حرام عندنا و عندكم هه.. و لكن شني غنقول.. هاد الجيل مبقا يعرف الحلال من الحرام.. بنتكم هي بنتي.. واخا خاصني نشوفها و نجلس معاها.. باش نعرفها كثر..

فاطمة : اوا هايداك ا لالة كاميليا..

كاميليا: و سمحلي ا لالة فاطمة.. نمشي نشوف وليداتي انا..

فاطمة : سير سير.. 

فهاد المدة كاملة نزار كان مربع اديه و متكي على الحيك كيتفرج فمحادثتهم فصمت تاااام.. رجعات خنزرات فيه كاميليا و مشات فاتجاه الدرج.. طلعات بخطوات بطيئة بمشية ثقيلة و موزونة.. طلعات فالدرج و بقات غادة فالكولوار كتقلب على غرفة التوأم.. حتا بانت ليها كنزة قدامها.. خنزرات فيها بلا متنطق.. و دارت باش تزاوجها.. حتا كتوقفها بصوتها المستفز كيف عادتو و كتورك على هدرتها..

كنزة: على السلامة.... خالتي كامييليا..

كاميليا: (دارت عندعا و رجعات خنزرات فيها) شنوو باغا؟!..

كنزة: لا حشومة خالتي.. ماشي فاسون ديال الهدرة هادي..

كاميليا: عرفتي.. الغلط الوحيييد لي دارتو لالة فاطمة.. هو غلطات فتربيتك.. 

كنزة : حتا نتي بحالها ا خالتي.. مكنظنش ان جوزيف طلع كيف بغيتي.. اوبس.. بغيت نقول نزار..

كاميليا: اش ساير كتخربق نتينا؟!.. اشمن نزار؟!..

كنزة: ويليي خالتو.. علاه مقالولكش؟؟..

كاميليا: شنو غيقولو؟!.. سربينا خلاص.. نطق..

كنزة: ميمكنش متكونيش عارفة بللي جوزيف بدل

سميتو من بعد ما سلم..

كاميليا: (حسات بالارض دارت بيها.. تكات على الحيط باش تشد توازنها) كيفاش سلم.. ميمكنش.. نتي غير كتستافزني دبا.. ياااك.. هادشي كدوووب.. كللو كدوب..

كنزة: (حطات إيديها على كتف كاميليا) لا ا خالتي معندي لاش نكدب.. كنقسم ليك.. و سولي نزار بنفسو يجلوبك..

كاميليا: (كتغوت) سكوووووت.. سكككت.. ماباقيش تقول هاد السمية.. صافيييي.. (حيدات إيديها لي كانت فوق كتفها) متقيسنيييش.. (بقات متكية على الحيط و هي كتمشا بشوية و كتنفس بصعوبة و بصوت مسمووع.. الضبابة قدامها.. كتحاول توقف راسها بزز.. اما كنزة كانت دايرة ابتسامة جانبية و هي متأكدة بللي وصلات لداكشي لي بغات.. عاد غيبدا اللعب ديال الصح..

اما كاميليا حاولات تقوي راسها حتا تعيا و لكن مقدراتش.. الصدمة كانت قوية عليها بزاااف.. فالتالي استسلمات و طاحت فالأرض مغيبة.. 

سمعات اكرام لي كانت كترضع فقمر ردخة من ورا الباب.. عطات قمر للخادمة و خرجات تشوف اش كاين.. مبقات فهمات والو فاش شافت كاميليا طايحة فالارض.. هزات راسها شافت فكنزة.. لقاتها واقفة هي التالية و معلى وجهها حتا تعبير.. محساتش اكرام براسها حتا غوتات..

اكرام : نزلييي عيطي ليهم.. (تحنات عند كاميليا و دارت إيديها ورا عنقها.. بدات كضرب ليها على وجهها و هي كتناديها بمدام كاميليا.. ملقات منها حتا جواب.. واخا كانت كتسمعها.. و لكن معندعاش الطاقة باش تجاوب.. تخلعات عليها اكرام و معرفات مدير.. حتا بان ليها نزار جاي كيجري.. تحنى عندهم و هو موجه كلامو لاكرام..

نزار : مالها؟!.. اش طرا ليها؟!..

اكرام : معرفتش معرفتش.. خرجت و انا نلقاها طايحة.. ماشي وقت الهدرة دبا.. شوف اش دير..

نزار: (شد ليها إيديها بصبعانو كيقيس نبضها.. نبضها ضعيف و كتنفس بصعوبة.. ميقدرش اخليها مزال.. هزها بخفة و تم نازل مع الدرج و اكرام تابعاه..

نزل و هو كينادي للخدم باش اوجدو ليه السيارة.. كانت خارجة معاه اكرام و هي مخلوعة.. حتا كيوقف و يوقفها معاه..

نزار: فين غادا؟!..

اكرام : غنمشي معاك.. ماشي وقت الهدرة شوف خالتي بعدا..

نزار: (طلعها و نزلها اش لابسة.. كسوة قصيرة.. مبينة جميع مفاتنها..) دخلي بحالك معندك فين تمشي..

اكرام : و لكن... (متسناهاش تكمل كلامها.. مشا مباشرة للسيارتو و كسيرا.. كان لؤي يللا وقف بسيارتو.. غير شافو مشا سول اكرام و رجع للسيارتو تابعو فاش عرف بللي الامر كيتعلق بكاميليا...

اكرام رجعات دخلات لداخل و هي كتخبط.. طلبات من الخادمات انزلو ليها ولادها جلسات فالصالة لي مقابلة مع الباب و دورات بيها ولادها.. شعلات التلفازة و جلسات كتفرج.. متبعة مع الفيلم و مرة مرة كطل على ولادها.. هزات راسها بانت ليها داخلة مع الباب.. اه هي.. المرة لي رباتها و كبراتها.. حسات بقلبها كيضرب بقوة.. لابسة جلابتها و لاوية عليها شال فوق راسها.. كيف عادتها بمشيتها الموقرة و هي كدور عينيها فأرجاء الرياض.. بلا متحس غوتاااات بأعلى صوتها..

اكرام : ماماااا.. (ناضت كتجري عندها عنقاتها.. بقات مدة طويلة و هي معنقاها.. كتشم فريحتها مسخاتش تبعد عليها.. سرعان ما بداو دموعها كينزلو سخااان على خدها.. محساتش بيهم.. و فنفس الوقت مقدراتش تحبسهم.. اشتاقت ليها بزاااف.. راها مها.. واخا ماشي لي ولداتها.. هي لي سهرات عليها الليالي.. هي لي شافت فيها نهار نطقات اول كلمة.. هي لي شدات فيها نهار وقفات على رجليها.. هي لي حسساتها بطعم الطفولة.. هي لي بكات فحضنها فاش كضيق بيها الدنيا.. هي الأم.. و هي كلشي... بعدات عليها بصعوبة و هي كتمسح فدموعها.. 

اكرام : توحشتك ا ماما.. توحشتك بزاااف..

خديجة: تانا ا بنتي.. تانا.. ربي لي عالم بيا.. راني خسرت طرف من كبدتي..

غيثة: شتكم بحالة نسيتوني😒.. (مشات عندها اكرام عنقاتها و هي كتسولها فاحوالها.. باست حتا الدراري ولادها و مشاو جلسو كاملين.. خديجة هزات التوأم كتلعب معاهم و اكرام كتعاود ليهم على قصة زواجها.. اكيد مقالتش الحقيقة كاملة...

نخليهم كيطمأنو على أحوال بعضهم و كيتعاودو.. و نمشيو لكاميليا لي ناعسة فالمصحة.. جاها انهيار عصبي.. كانت متكية فوق السرير على ضهرها.. و شعرها مليوح فوق الوسادة.. نزار و لؤي واقفين جنب بعض متكيين على الحائط كيشوفو فيها من بعد ما فهمو سبب غضبها.. اما هي كانت مضورة وجهها للجهة التانية محاملاش تشوف فنزار..

نزار: غتبقاي ساكتة هاكا..

كاميليا: (لا رد.. ساكتة و الدمعة فطرف عينيها.. معارفش حتا اش تقول من الساس)

نزار : (مسح على راسو) الوليدة.. مغنبقاوش هاكا.. صافي لي وقع وقع دبا.. و انا سلمت.. صافي.. خاصك تقبلي الموضوع..

كاميليا: (نزلات دمعة حارة من عينيها و هي كتشوف راسها خسرات ولدها.. مسحاتها و ناضت تقادات فالجلسة.. شافت فيه بخيبة امل) خساااارة فيك تربيتي كاملة ا ولدي.. كبرتك قريتك و وعيتك.. باش تكون خليفة لباك.. طول عمري كنشوف فيك غير باك.. و لكن نتا لا.. نسيتي دينك و سلمتي.. كلشي على قبلها.. غير باش تزوجها..

لؤي: احم.. انا غنخرج.. عندي شي اتصال مهم.. (نساحب بهدوء من وسط نظراتهم الحادة.. مخاصوش ادخل.. ام و ابن بيناتهم.. خاصهم سحلو مشكلهم بيناتهم)

نزار: ماشي هكاك.. انا سلمت فاش عرفت حقيقة الاسلام..

كاميليا: اشمن اسلام داوي عليه.. اشمممن اسلام.. القتيلة و الدبيحة قدام عينيك.. اشمن اسلام... دمرتيني ا ولدي.. حطمتيني.. على آخر إيامي.. وليت كنشوف ولدي مسلم قدامي.. اش غنقول ليك مزال.. نسكت حسن ليا.. نتا بفمك قلتي حياتك هاديك.. صافي.. عيش حياتك..

نزار: (قرب ليها باس ليها إيديها و هز راسو باسها على راسها) سمحيليا.. و لكن اكثر حاجة مزيانة درتها فحياتي.. و لي عمري ندم عليها هي الاسلام..

كاميليا: (نزلات دمعة على خدها خلاتها واخدة راحتها.. هزات راسها باه.. بلا متزيد كلمة وحدة... نزار شاف حتا عيا.. رجع باسها على راسها و خرج بهدوء.. بغا يخليها تفكر فراحتها.. بلا ميضغط عليها كثر..)

داز بقية النهار.. و وصل ليل.. زينات النجوم السماء فوقهم.. كانت حاطة راسها فحضنها.. الحضن لي قيما حتاجتو كتلقاه جنبها.. دماغها كان مسافر بيها لبعيييد.. معارفاش هادشي فين غيوصلها..

فاطمة : صافي.. مديرش فبالك ا بنتي..

كاميليا : اااش منديرش فبالي ا لالة فاطمة.. كيف بغيتيني منديرش فبالي.. حياتي كاملة و انا كنحاول نبعدو من هادشي.. بعدتو على باه على ود هادشي مبغيتوش اتبعو و يولي على دينو.. حطيتو وسطكم حيت عرفتكم مغتحاولوش تأثرو عليه.. و غتجنبو هادشي.. جات دبا اكرام.. هدماتلي كلشي فرمة عين..

فاطمة : ماشي تا لهاد الدرجة.. السيد را سلم.. ماشي نتاحر.. صافي و الى سلم.. بالعكس انا فرحت لو.. مديرش هايدا ا بنتي.. 

كاميليا: مغتفهمينيش ا لالة فاطمة.. تخيلي دبا واحد من ولادك ارجع ليهودي.. باش غتحسي.. و كيفاش غتصرفي.. را نفس الحاجة.. حاسة بقلبي كيتقطع.. 

فاطمة : انا عارفة مزيااان بللي ميمكنش شي واحد من ولادي يترد على دينو.. حيت الاسلام را هو الدين الحء.. صافي ا بنتي.. خاصك تءبل هادشي لي طرا.. معندك ما تغير.. راه مجاش و سلم.. 4 شهوور و هو كيبحث فيه عاد ءرر اسلم..

كاميليا: اشمن دين حق داوية عليه.. دين القتيلة و العذاب.. الدين لي حرمك من ولدك و حرمني من راجلي و حتا صاحبهم.. اشمن دين.. اش سايرة كتخربقي.. اوووف عيييت.. علاش هاكا.. علاش باه سلم فآخر لحظة.. و حتا هو دبا رجع مسلم.. اوووف يا ربي.. (ناضت قافزة جلسات فوق السرير) زعما ميكونش عرف شي حاجة على باه..

فاطمة : سكوت.. شني عندو ميعرف؟!.. حتا حد معارف شي حاجة.. و حتا واحد مغيعرف..

كاميليا : داكشي لي بغينا..

نمشيو لغرفة خرى.. بعيدة على هادي بشوية.. من بعد ما نعسات ولدها.. ؤجعات لغرفتها.. نزار كان متكي فوق السرير على ضهرو و داير إيديه ورا عنقو كيشوف فالسقف.. و مشعل ضو خاافت جنبو.. دهلات جلسات حداه و هي كتفكر.. حاسة بشي حاجة ماشيهي هاديك.. و لكن معارفاش شناهيا..

اكرام : نزار..

نزار : ممم..

اكرام : ماماك كيبقات دبا..

نزار: شوية.. واخا نزال متقبلات الوضع..

اكرام : عادي.. را صعيبة عليها مسكينة.. و لكن مع المدة غتنسا..

نزار: انشاء الله..

اكرام : نزار.. معرفتشلاش حاسة بقلبي ضارني.. حاسة بللي هاد الهدوء.. بحال هدوء ما قبل العاصفة..

نزار: (جرها من إيديها تكاها و نعسها جنبو.. خشاها فيه و هو كسدوز إيدز على جبهتها) متقوليش هاكا.. هادشي غير من الخيال.. حاولي متفكريش فهادشي.. معندو باش ليفيدك..

كانت جالسة فغرفتها كتمشي و تجي.. و هي هازة تيلي كدورو بين إيديها..ركزات و انتابهات أكثر.. فاش سمعاتو كيصوني.. بقات شادة تيلي بيديها لي كافتف..

كنزة: الوو.. ............ اش باغي مني مزال... ................. ... لا معندي منعطيك.. مغنسمحش ليك.. .................. وااااش مكتفمش.. ...................... (قطعات تيلي و هي معصبة.. حارت وسط افكارها.. شنو دير.. عارفة حاجة وحدة.. الى شافها لؤي غيقتلها.. خاصها تصرف فأقرب وقت.. لاحت تيلي و مشات حلات الماريو كتقلب عل شي حاجة تلبسها ...

خدات سروال كحل جا لاصق عليها بحال الكولون مع تريكو فنفس اللون بكتبة فالكحل.. هزات مونطوها و خرجات بخطوات بطيئة كتسلت باش حتا واحد ميسمعها.. كتمشي على طراف صبعانها و هازة صبادري ديالها فيديها.. دازت من حدا غرفة اكرام و جوزيف.. وقفات فاش شافت الباب مبسم شوية.. نسات راسها لاش خارجة و اش باغا و هي كتشوف فيهم.. كانو فوق السرير معنقها و انفاسهم متخالطة.. كانت حاطة راسها على صدرو و كتهدر بصوت خافت.. نزلات دمعة حارة على عينيها و هي كتستحضر احداث ديك الليلة.. فاش فاق و دفعها من فوقو.. لاحها حتا طاحت فالأرض.. مزال كلماتو كيترددو فودنيها.. كانو بحال الخنجر كيتغرسو فقلبها.. 

نزار: (وقف و عطاها بالضهر) كنزة اش كديري.. اكيد راك مواعياش على راسك دبا.. سيري ترتاحي..

كنزة: (مشات وقفات قدامو و تعلات على طراف صبعانها باش توصل ليه و هي حاطة إيديها على صدرو) لا ا جوزيف.. هادي اول مرة كنكون واعية مزيااان و عارفة راسي اش باغا ندير.. انا كنبغيك.. كنبغيك بزاااف.. عفاك فهمني.. و مستعدة نعطيك كلشي.. اي حاجة.. غير طلب..

نزار: (حيد ليها إيديها و هدر بكل هدوء) و انا مكنبغيكش.. كنزة راك بحال ختي.. مكين لاش ذلي راسك بهاد الطريقة.. مغتستافدي مني والو.. و نتي خت لؤي.. منقدرش نضحك عليه..

مسحات دمعتها و هي كضحك على راسها.. عندو الحق.. ذلات راسها بزااااف.. هاهو اسس حياتو.. و هي مكتسوا والو فيها.. حياتو دبا غير اكرام و ولادو.. ضحكات على راسها و هي كتحاول تحبس دموعها.. مكانش هو الشخص الصحيح.. غلطات بزااااف فاش فكرات فيه و بغاتو..حطات إيديها على قلبها و هزات راسها للسما.. طلعات نفس عمييييق و رجعات نزلاتو.. رجعات شافت فيهم و كملات طريقها.. بلا حتا شي تعبير على وجهها.. ملامحها غير مفهومين.. نزلات بشوية.. لقات الحرس معمرين الحديقة.. متقدرش تخرج من هنا.. رجال لؤي فكل جهة.. تفكرات واحد الباب صغير كاين من الجهة لاخرة.. معارفو حتا حد من غيرها هي و لؤي و نزار.. كانو كيدوزو منو فاش كانو صغار.. رجعات و هي كتسلت حتا وصلات ليه.. تحدرات تكات على كرشها و خرجات من بعد ما تأكدات بللي مكين حتا واحد.. لبسات الصبادري ديالها و هزات تيلي ديالها من جيبها.. قلباتو لقات الميساج وصل.. مشات فاتجاه سيارتها التانية لي ديما كتحطها بعيد على الرياض.. طلعات فيها و كسيرات بجهد..

هزات تيلي ديالها رجعات تأكدات من العنوان لي سيفطو ليها.. ماشي حتا عنوان مضبوط.. فطريق السيار.. فهمات بللي هما لي غيديوها لبلاصة خرى.. طلعات نفس قوي و زادت فسرعة السيارة... مسافة الطريق و كانت فالطريق السيار.. نزلات من السياارة و لبسات مونطوها.. دارت إيديها فجيابها و تكات على لوطو كتسنا شي حد اجي عندها.. محساتش حتا وقفات قدامها سيارة سوداااء.. من نوع بورش الكبيرة.. بقات كتسنا حتا نزلو زوج رجال ببنيات ضخمة.. بدلة سوداء.. و وشام على إيديهم و عنقهم باينين.. هدر واحد فيهم بالإنجليزية..

.......: مدام عفاك غنغطيو ليك عينيك و غكلعي معانا..

هزات راسها باه.. دلرت سدات سيارتها و خلاتهم دارو ليها عصابة سوداء على عينيها.. جروها للسيارة.. طلعات معاهم و كسيراو.. كان جالس حداها واحد منهم و القدام جالسين زوج.. وقع الصمت.. صوت عجلات السيارة و انفاسهم الوحيدين لي كيتسمعو.. كانت ضربات قلب كنزة غادة و كتسارع.. واخا هكاك حاسة بالخوف.. و بزاااف.. غادة فاتجاه معارفة عليه والو.. و عارفة راسها مكتعاملش مع ناس عاديين..

بعد نصف ساعة تقريبا.. وقفات السيارة..سمعات كنزة صوت باب السيارة فاش تحل و رجع تسد.. غيكونو نزلو.. عاد تحل الباب لي حداها.. شد ليها شي واحد فيديها و تم مدخلها.. كتحس بالخلعة شاداها من صبعها الصغير كع كل خطوة.. حسات براسها كتعفط على التراب.. حتا وصلات لأرض قاصحة.. بقات غادة مع طوالة كبيرة.. عاد وقفوها.. تحلات ليها العصابة لي على عينيها.. سدات عينيها و هي كتسنا الشعا غيضرب ليها فعينيها و لكن والو.. حلات عينيها الضلام الحالك.. كيبان ليها غير خيال اشخاص ضخمين البنية.. 

كنزة : فين انا؟!.. و لاش هاد الضلام؟!.. شنو باغين مني؟!!..

صوت من وراها: شوو.. سكتي شوية..

دارت بكامل جسمعا باش تشوفو.. كان كيخوي الشراب من قرعة فكاسو.. بلعات ريقها و هي كتشوف فيه.. واضح غيكون هو الرئيس هنا.. حط القرعة و هز فيها عينيه.. مقدراتش متلاحظش عينيه الخضرين لي كيثيرو الواحد.. كان بصيص صغيور ديال النور ضارب فيه.. هو لي خلاها تشوف عينيه.. دغيا جمعات راسها و خنزرات..

كنزة: شنو باغي مني؟!.. لاش كتسيفط ليا فالقيديو و كتهددني بيه.. شنو علاقتي بيك؟!..

الشخص: شحال فيك ديال الهدرة.. (جغم من كاسو و رجع شاف فيها) رشقات ليا عليك.. و حتا الفيديو منعاودش ليك عليه😉..

كنزة: بلا متبقا ضيع الوقت بلا فايدة.. عارفاك مجايبنيش حبا فيا.. قول اش باغي.. بلا منبقاو نطولو فالهدرة..

الشخص: ذكية مع راسك.. المهم جبتك غير باش نتفاهمو.. نمسح الفيديو.. و لكن بشرط..

كنزة: شنو هاد الشرط..

الشخص: بغيت ولد ختك.. 

كنزة: ولد اكرام؟!..

الشخص : اه.. ولد اكرام و جوزيف..

كنزة: لا لا نتا هبلتي.. واش تسطيتي و لا شنو.. يستحيل نعطيه ليك.. واش كضحك عليا.. هاديك را ختي واقلة..

الشخص : (قرب ليها كثر حتا وقف جنبها.. حط كاسو فوق كتفها و هو كيلعب بيه.. كيحاول يلعب ليها على اعصابها) علاش يستحيل.. كنظن كلشي ممكن.. الى كان الفيديو غيوصل للؤي.. غيتصدم فيك بزااف.. ختو بايعة لحمها.. تو تو صعيبة شوية.. و لكن باش عجبتيني.. مزالة محافضة على شرفك.. يقدر لؤي يتفهم هاد النقطة.. لا؟!!..

كنزة: لا.. لا ميمكنش.. يدفني و انا حية ال عرف بهادشي.. و لكن فنفس الوقت منقدرش نعطيك ولد اكرام.. 

الشخص: (حط إيدو على حنكها و هو كيدوزعا بشوية) عارفك ذكية.. و غتختاري القرار الصح.. و عارفك مكتحمليش اكرام.. بلا متمثلي العكس.. و من فوق هادشي.. انا مغناخدوش ليهم ديما.. غير مدة قصيرة و غنرجعو ليهم..

كنزة: و شنو غرضك بهادشي كامل؟!.. شنو علاقتك بينا؟!..

الشخص: مغتفهميش هادشي كبير عليك شوية.. حسابات بيني و بين جوزيف.. باغي نصفيها.. و كيف قلت ليك غيرجع ليهم الولد..

كنزة : بغيت وعد بللي الولد غيرجع..

الشخص: عطيتك وعد ديال الرجال.. فكرتي؟..

كنزة: مزال..

الشخص: (شاف فساعتو) عندك زوج دقايق.. فكري..

كنزة: (هزات عينيها فيه لقاتو كيحسب فساعتو.. فكرات بللي جوزيف ضلمها بزااف.. و حرق قلبها شحال من مرة.. ماقيها باس الى تحرق على ولدو حتا هو.. و اكرام حتا هي خدات منها بزاااف ديال الحوايج.. حتا هي غتاخد ليها ولدها غير مؤقتا.. هادشي كامل داز فدماغها فهاد الدقيقتين)

الشخص: سالا وقتك..

كنزة: (هازة حاجب و منزلة لاخر) اهاه و شنو الضمان ديالي انا بللي الفيديو مغيتنشرش..

الشخص: دبا عجبتيني.. (دار شاف فواحد من رجالو و دار ليه اشارة بيديه.. جا وحط ليه شانطة قدامو.. دورها جيهة كنزة و حلها) 300 مليون.. ماشي شي حاجة.. و لكن غير للضمان..

كنزة: غنشوفو هادشي فين غيوصل..

الشخص: متخافيش كلشي مدروس.. غير خرجي الولد من الدار و غتلقاي رجالي فشارع *****.. و فالترجاع.. انا لي غنتكلف..

كنزة: واخا.. و حتا فلوسك غنرجعهم ليك.. لمجرد ميرجع الولد..

الشخص : ماشي شي حاجة مهمة..

كنزة: و لكن كيفاش وصلك الفيديو؟!.. غيكون غير داك الشماتة ديال ريان.. تفوو..

الشخص: مكيهمش كيفاش وصل.. المهم راه عندي دبا..

كنزة: كلكم بحال بحال..

الشخص: حتا تسيفطي الوقت.. و كنفضل غدا تقضي.. تقدري تمشي دبا..

كنزة: (وقفات و هي كتشوف فيه.. مخلاش ليها حتا الفرصة قين تجاوبو.. بدات كتعاير فيه فنفسعا و هي كتحس بيهم كيغطيو ليها على عينيها مرة خرى.. طلعات نفس و خرجات مع الحرس و هما موجهينها..

مسح على راسو و دار ليهم اشارة باش اشعلو النور.. شعل غير ضوء خافت..

مراد: دايرة لينا فيها ذكية ا لالة كنزة.. عايقة و فايقة.. خسارة.. طلعات اكرام ذكى منك😏.. (دار ابتسامة جانبية) هاحنا غنشوفو لؤي اش غيدير فاش اعرف بحريرتك.. و حتا نتا ا جوزيف.. واصلة نوبتك.. اما يوسف.. نتا بوحدك حتا نسالي ليك.. كنزة يا كنزة.. مزيانة هاد البنت.. الزين و الفورمة هه..

ريان : شفتي ا خويا.. هانا فدتك دبا.. كنعرف نضبر على البنات ياك.. و لكن صدفة زويينة..

.مراد: (حط إيدو على كتف ريان) خاصك تعرف بللي مكاينة حتا حاجة فالحياة سميتها الصدف..

ريان: ميمكنش.. دبا نتا لي مخطط لهاد القصة كاااملة.. و غير باش توصل للؤي و جوزيف..

مراد: اه.. و نقدر ندير ما كثر (دور وجهو شاف فيها.. لقاها كتركل و تحرك فراسها.. كتمتم باغا تهدر.. دار لرجالو اشارة.. قرب ليها واحد منهم و جر ليها اللصاق من على فمها حتا غوتات)

لورين: غتندددم على هادشي لي كدير.. غتندم بزاااف.. مغيخليوكش هاني فحياتك..

مراد: واش مكتسكتيش شوية.. و لا ياكما نتي لي غتوريني اش ندير.. متخافيش عليا.. حاسب اموري..

لورين: كنقسم ليك حتا نهار غيعرفوك مغيرحموكش.. نتا مزال معارفهم مزيان.. الى درتي هادشي لي فبالك.. لؤي و جوزيف غينوضو حرب عمرك شهدتيها.. غيدمروك حتا لآخر نفس.. اما يوسف واخا يبان ليك هاكا.. نهار ينفاجر.. النار لي بداخلو.. غتحرق كلشي..

دار اشارة لرجالو بمعني قتلوها.. داكشي لي كان تقدم واحد فيهم و لوا على عنقها حبل غليض و بدا كيزير فيه..

لورين: (بصوت مقجوج) غتشوف كلشي على عينيك.. واحد النهار غتموت ابشع موتة.. مغيرحموكش.. راك كتلعب بالنار.. ماشي لي غتحرقك.. لي غتنفاجر فوجهك..... (سكتات فاش مبقاش النفس كيوصلها.. ولات كتركل و وجها كللو زراق.. شافت الموت قدامها.. ولات كتفكر فايامها كاملين معاهم بربعة.. يوسف جوزيف لؤي و ياسر.. كرهات راسها حيت فكرات تغدر بيهم و تقلب وجهها.. بقات هكاك حتا ترخااات.. عينيها تقلبو.. حيدو عليها الحبل و دلا راسها.. حلوها من الرباطي و طاحت على الارض ميتة..

وصلات لفين كانت حاطة سيارتها من قبل.. وقفاتها و نزلات.. مبغاتش تهز الفلوس.. اولا معندها مدير بيهم.. و تانيا معندهاش كيفاش دخلهم.. لبسات مونطوها و بقات غادة و رجعات دخلات من نفس البلاصة لي خرجات منها.. بقات غادة كتسلت تاني حتا دخلات لبيتها و سدات عليها عاد رتاحت.. ابتاسمات و هي فرحانة بداكشي لي دارت.. كان كيتملكها خوف كبير فلول.. و لكن دبا حتا هي غتستافد.. حيدات المونطو و الصبادري لاحتهم.. و تلاحت فوق فراشها.. معقلاتش على راسها حتا دخلات فنوم عميييق.. كانت عيانة بزاااف..

صبح صباح جدييد.. حلات عينيها بشوية.. دورات اديها حطاتها على بلاصتو مكينش.. ناضت بشوية كتحك فعينيها.. حتا حلاتهم.. شافتو مفرش سجادة و كيصلي.. ربعات رجليها و هي حاضياه بلهفة كيفاش متخشع فصلاتو.. هادشي لي كانت كتمنا طوول حياتها.. حمدات الله فنفسها.. حيت و اخييرا رجعات لقلبها الفرحة.. عائلتها كلها جنبها دبا.. لي ولدوها و لي رباوها.. الشخص لي كتبغي راجلها دبا و اب لولادها.. تقدر تقولها لكلشي دبا.. و بلا متحشم... فاقت من سهوتها فاش شافتو سالا الصلاة..

اكرام : الله اتقبل..

نزار؛ (و هو كيجمع فالسجادة) اميين..

مشا بخطوات بطيئة فاتجاهها.. و طلع فوق السرير بحالة كيحبو عندها.. كيشوف فعينيها و هي راجعة بلور.. محساتش حتا جرها و خشاها تحتو..

نزار: (كيدوز إيدو على وجهها) و نتي مكتصليش..

اكرام : لا.. راني نافسة واقيلا..

نزار: (قرب ليها باسها بوسة خفيفة حدا فمها حتا بورشها) ممم و امتا غيسالي هاد النفاس..

اكرام : مزال الحال غير تهنا.. يللا دوزت شي 12 يوم هكاك.. 

نزار: اصلا هاد النفاس لاش دايرينو..

اكرام : الله لي خالقنا هكاك.. باغيني نتحاسب معاه..

نزار: (دور إيدو على خصرها) كنبغيك.. (تلاقاو شفايفهم و دخلو فقبلة طويييلة.. قبلة كتعبر عليهم.. على اشواقهم و على حبهم...

نمشيو لغرفة خرى قريبة منهم.. كان حاضيها و حاضي ملامحها البريئة.. و هي مزالة ناعسة.. محساتش على راسها حتا قربات جيهتو و دورات ادياتها على خصرو عنقاتو.. نزل عينيه شاف صدرها خارج.. مبقاش مغطيه ليزار.. حط ادو على كتافها و بقا مطلعها على طراف صبعانو.. حتا وصل لوجهها.. حس بيها تبورشات.. حلات عويناتها بشوية و هي كترمش فيهم.. بلا متحس ابتاسمات ليه..

آلاء : صباح الخير..

لؤي: صباح النور..

نزلات عينيها شافت فراسها لقات صدرها عريان.. طلعات ليزار و رجعات شافت فيه..

لؤي: مكرهتش كل صباح نحل عليك عيني..

آلاء : (ابتاسمات) ديما غتلقاني معاك.. كل صباح غنكون جنبك..

لؤي: كنبغيك.. نتي احسن حاجة فحياتي..

آلاء : (زادت زيرات عليه و خشات راسها فصدرو) حتا نتا... 

(وقع الصمت واحد 5 دقائق.. صوت انفاسهم و ضربات قلبهم المنتضمة الوحيدين لي كيتسمعو.. حتا كسرات آلاء هاد الصمت)

آلاء : لؤي..

لؤي: ممم..

آلاء : بغيت نقول ليك شي حاجة..

لؤي: قولي..

آلاء : (بعدات عليه شوية و ناضت جلسات.. و هي كتحيد فشعرها من على عينيها) احم.. فالحقيقة...

لؤي: (جلس هو التالي مقابل معاها و شد ليها فيديها) بلا متخلعيني.. مالك..

آلاء : مكين لاش تخلع.. (هزات إيديه و حطاتها على بطنها و هي مبتاسمة) انا حاملة.. حاملة بولدنا.. مبقا والو و نوليو عائلة..

(معرف باش تبلا.. تخلطات عليه الفرحة مع الصدمة.. ناض هزها.. نزل من فوق السرير و هو كيدور بيها فأرجاء الغرفة.. بانت الفرحة فبريق عينيه الزرقين.. كيضحك بابتسامة عريضة و حتا آلاء كضحك معاه..)

لؤي: و اخيرا غنولي اب..

آلاء : (هزات راسها باه..) مبروك علينا.. وا حطني دبا.. غا بشوية عليا..

لؤي: (حطها و شد ليها وجهها بين إيديه) هادا احسن خبر غنسمعو.. بغيت كلشي يفرح بيه..

آلاء : انشاء الله..

نرجعو لاكرام.. من بعد ما فطرات فغرفتها و رضعات ولادها.. خلات جوزيف خارج على ود شي خدمة.. و نزلات و هي هازة نور و الخادمة هازة قمر.. مشات فاتجاه الصالون.. يللا جات دخل بانت ليها كاميليا جالسة هي و لالة فاطمة.. غير شافتها بلعات ريقها و دارت باش ترجع بحالها.. حتا كتوقفها بصوتها..

كاميليا: تسناي.. متمشيش.. اجي ا بنتي..

دارت اكرام كتشوف فيها و هي مستغربة.. مفهمات والو.. دخلات و جلسات جنب لالة فاطمة.. و كاميليا دارت اشارة للخادمة باش تعطيها قمر.. 

كاميليا: غزااالة.. يا ربي تحفضهم بزوج.. الفناكش..

اكرام: آمين..

كاميليا: (هزات راسها شافت فاكرام بجدية) سمع ا بنتي.. انا هاد الخبار كانت صعيييبة عليا.. و لكن ما بيدي ما ندير.. هادا قرارو.. و انا عارفة ولدي.. حتا حد ميقدر يأثر عليه.. بالسيف عليا نتقبل الواقع.. و مبغيتش نضلمك حتا نتي معايا..

اكرام : مفهمتش..

كاميليا: ا بنتي حتا نفهم انا بعدا.. انا عزيزة عليا جداك بزاااف.. و فمقام ماما.. و حتا الام ديالك.. كانت عزيييزة فقلبي.. كثر من ختي.. و ربي وحدو لي شاهد.. سولي داداك كنا بحال الخواتات.. واخا كان بينا فارق ديال الاديان.. دبا بالسيف عليا نتقبل ولدي سلم.. كون كنتي شي وحدة خرى كنت غنكرهك.. و لكن منقدرش.. كتشبهي لمك بزااف.. كنتمنا تكوني كتشبهي ليها حتا فطباعها..

اكرام : (نزلات دمعة حارة على عينيها.. و لكن سرعان مامسحاتها) الله ارحمها.. اصلا انا مكنعرفش عليها شي حاااجة.. 

كاميليا: ماماك كانت احسن حاجة طرات فحياتنا كاملات.. هيام.. فعلا مكينش شي حاجة توصفها.. لوحة رسمها ربي فجمالها.. و اخلاقها شي حاجة مكتوصفش.. هي الوحيدة لي كانت كتوريني صورة زوينة على الاسلام.. باقا عاقلة ا لالة فاطمة فاش دارت الحجاب.. انا لي مرة و تزعطت فيها..

فاطمة: اااه ا بنتي مكدبتيشي.. كانت المثال على الاسلام.. (تنهدات و وقفات) انا غنمشي نشوف اش ندير.. لميااااء لميااااء.. (كانت كتناديها و هي خارجة.. غير خرجات مشات كاميليا جلسات جنب اكرام و هي مزال هازة قمر)

كاميليا: كنتمنا تكوني نتي بحال ماماك... حيت كنزة ماشي بحالها.. كنزة من طول عمرها عندها حب التملك.. كتبغي كلشي ديالها واخا تعرف تاخدو بالغصب.. خايفة انها دير شي حاجة تندم عليها حياتها كاملة.. و لكن لي متأكدة منو.. ان فداخلها كاين واحد الجانب زوين.. بغيت غير نقرب منك عائلتك كثر.. عارفاك مزالة جديدة على هاد الجو.. و مزال مكتعرفيهم حق المعرفة..

اكرام: شكرا..

كاميليا : لاش..

اكرام: مكرهتينيش.. فكرت انك غتكوني كارهاني دبا.. عارفة صعيبة عليك انك تشوفي ولدك كيمشي من بين إيديك.. حيت حتا انا ام.. و لكن ا خالتي.. الاسلام هو الدين عند الله.. و شكرا.. حيت قربتيني من ماما.. عمر شي حد ما فكر اعاود ليا عليها.. عرفت غير سميتها و شفت صورتها.. و حتا دادا فيما نسولها عليها كتهرب من الجواب..

كاميليا: داداك معمرها تقبلات ماماك كزوجة ابن.. دوزات عليها الوييييل الكحل.. تقدري تقولي كيفما كدير دبا لآلاء.. غير باباك الله ارحمو كان كيقدر لالة فاطمة بزاااف.. و كان كيضلم هيام مسكينة.. ماشي بحال لؤي.. راك شفتيها دبا غير جبدناها خرجات..

اكرام : الله اسمح ليها و صافي.. (شافت فقمر) شو نعسات هه.. ديما كتنعس و عينيها محلولين..

كاميليا : عادي راها باقا صغيرة.. و متبقاش تنزلهم بزاف.. ممزيانش ليهم.. الدراري باقين صغار نتينا لي كتلعب بيهم..

اكرام : مكنقدش نزل و نخليهم...

كاميليا : لا.. متولفهمش الهزان.. غير رضعهم من بعد كمطهم.. و خليهم ينعسو.. طلع دبا نييت.. متبقاش تخرجهم.. و الخدامات يبقاو حاضيينهم.. علاه مالهم شنو خدمتهم هنا.. 

جلسو مجموعين كيتغداو.. طاولة طويييلة جامعاهم و الخدم ضايرين بيهم.. عائلة كبيييرة.. من طبقات و عادات مختالفة.. و ماشي كلهم كيجمعهم الدم.. كتجمعهم علاقة كبر.. علاقة أسمى من هادشي كامل.. كانو يهدرو فمختلف المواضيع.. شي كيضحك شي كيهدر بجدية و شي كيتغزل.. من غير وحدة.. لي كانت جالسة كتلعب بالفورشيط فيديها و هي كتفكر فحريرتها.. خديجة و غيثة ملقاوش مشكل على انهم ماشي من نفس الطبقة.. بالعكس تصرفو على راحتهم.. و حتا حد مهدر معاه.. اساسا واخا غالب عليهم الفقر.. هما ناس راقيين.. راقيين بأبسط الحوايج.. كيفاش اجلسو و كيفاش اياكلو.. ماشي شي حاجة كتخص غير الطبقة الراقية.. العكس تماما.... كملو غداهم و طلع كل واحد لغرفتو.. اكرام كانت مزالة واقفة مع لالة فاطمة على شي خدامات و كيهدرو.. دارت كتبان ليها خديجة واقفة.. لابسة جلابتها و كتسنا فيها تيالي الهدرة..

اكرام : ماما.. فين غادة؟.. شفتك لابسة جلابتك..

خديجة: اوا ا بنتي شغنقول ليك.. خاص نرجعو لكازا.. براكة علينا..

اكرام: ا ويلي ا ماما.. شمن رجوع و توما عاد جيتو.. سيري تجلسي الله اهديك ا الوليدة..

فاطمة: اه بصح.. بنتي عندها الحق.. مزال عليك الحال.. متمشيشي دبا..

خديجة: مكرهتش ا لالة فاطمة.. و لكن منقدرش.. لابد منمشي.. راك عارفة ولاد غيثة مع المدراسة.. غيبو واحد اليوماين باراكة.. يرجعو لقرايتهم..

اكرام : علاه ما القرايا غطير.. راها كتسناهم غير بقاو مزال ماما عفاك..

خديجة: و الله ا بنيتي منقدر.. مرانيش مولفة هاد الجو.. و منقدرش نبقا فيه.. راك عارفاني ا بنتي.. خاصني نمشي..

اكرام : اش غنقول ليك ا ماما.. مكرهتكش تبقاي معايا مزال..

خديجة : اوا هادشي لي عطا الله ا بنتي..

اكرام : (مشات عنقاتها و هي مطلعة شفاتها السفلى) غنتوحشك بزاااف..

خديجة : تااانا ا بنتي تانا.. و رد البال لراسك و لراجلك.. و حتا وليداتك.. متبقايش تلعبي بيهم.. را شفتك كيكديري ليهم.. غتصدقي خارجة عليهم..

اكرام : فههمت ا ماما.. مخاصش نبقا نزلهم نخليهم فبيتهم غير نرضعهم نكمطهم باش انعسو.. 

خديجة : هاااكاك ا بنتي.. حيت باقين صغار و كيبغيو انعسو مزيااان.. اجي كيكديري معاهم بليل..

اكرام : كيبقاو معاهم الخدامات.. حيت راجلي المصون مناقصوش الصداع..

خديجة : من حقو هه.. و حتا نتي تبتي لرض شوية راك مزالة نافسة و نتي كطيري..

فاطمة : اييه ءولها.. راني عيت فيها.. و لي فراسها فراسها..

خديجة : انا لي عارفاها.. واخا تعياي تخبري عليها مكدير غير لي فراسها..

اكرام : شفتكم تافقتو عليا نتوما😒..

خديجة : بسلامة عليك ا بنتي هاد الساعة.. حنا باغين غير مصلاحتك..

رجعات عنقاتها و خرجات سلمات على غيثة عي و ولادها.. بقات واقفة حتا شافتهم طلعو فالسيارة و كسيرا بيهم الشيفور..

رجعات دخلات للدار و طلعات مباشرة عند التوأم.. طلات عليهم كانو ناعسين.. خرجات و مشات لغرفتها..

داز الوقت و وصل ليل.. من بعد ما تعشاو.. اكرام كيف عادتها مشات عند ولادها.. دخلات لقاتهم حالين عينيهم كيضحكو و الخدم جنبهم.. دخلات و جلسات كتلعب معاهم بشوية.. سهات فملامحهم البريئة.. معرفاتش لاش عندها شي احساس خيب.. حل نزار الباب و دخل.. دار اشارة للخادمات باش اخرجو و جلس جنب اكرام.. دور اديه على خصرها و جرها عندو.. حطات راسها على كتفو و هي مزال شادة فإيد قمر الصغيورة..

اكرام : فخبارك.. انا اسعد وحدة دبا.. كنت عايشة فغموض كبيير.. كنت حايرة و تالفة.. و لكن من نهار عرفتك.. كلشي تقاد فحياتي.. (عنقاتو و هي خاشية راسها فصدرو) كنبغيك..

نزار : نتي روحي و حياتي.. نتي النفس لي كناخد.. فت انا مرحلة الحب.. وصلت لواحد النقطة مكتوصفش.. ماشي حب و ماشي عشق.. شي حاجة كثر.. 

اكرام : يا ربي تخليك ليا..

دام الصمت لواحد المدة قصيرة.. صوت انفاسهم فقط لي كيتسمع.. حتا من التوأم مبقاش كيتسمع صوتهم.. طلات عليهم اكرام لقاتهم نعسو.. ناض نزار طفا عليهم الضو.. جات اكرام توقف لقات قمر مزال مزيرة ليها على صبعها.. وقفات و بقات كتشوف فيها.. باستها على راسها و هي كتشم فريحتها الطفولية.. حطات إيديها على شعرها كدوزها بشوية.. مسخاتش تبعد عليها.. قلبها ضارها من جيهتها.. عندها واحد الاحساس فشكل.. معارفاش لاش.. و لكن كتمنا يكون غير احساس و صافي.. 

اكرام : نزار.. (شاف فيها بمعنى شنو) نديهم ينعسو حدايا هاد الليلة عفاااك..

نزار: خللي عليك الدراري فالتيقار.. غتخصري ليهم نعاسهم..

اكرام: (كترمش فعويناتها) عفااااك.. 

نزار: لا هي لا.. عارفك غير غتعدبيهم بداك النعسة العجيبة ديالك..

اكرام : مقدرتش نخليهم.. ضارني خاطري و الله..

نزار: (دار خارج) راني دويت.. غير احساس و صافي..

اكرام : (بصوت خافت سمعاتو غير هي) كنتمنا.. (دارت باست قمر و حيدات صبعها من وسط إيديها بشوية.. كانت مزيرة عليها.. مشات عند نور باستو هو التالي و هي كتشوف فملامحو.. قلبات الدورة باش تخرج.. يللا غتعتب الباب.. رجعات باستهم مرة خرى.. هاد المرة بوسة طويييلة.. مسخاتش تبعد عليهم.. خرجات سدات الباب بشوية و هي مراقباهم.. لقات نزار كيوصي فالخدم عليهم.. كيوصي و يهدد.. حدرات راسها شافت فالارض و بالها كللو مع ولادها.. حاسا بخوف كبير.. خوف غير طبيعي.. مكرهاتش تبقا معاهم.. و لكن سرعان ما لعنات الشيطان و مسحات هاد الافكار من بالها..

فجهة خرى كانت كدور فغرفتها بحال الحمقة.. معارفة مدير.. واش هاد القرار لي خدات هو الانسب ليها و لا لا.. حيدات هاد الافكار من بالها و هي كتفكر بللي هادي احسن طريقة باش تنتاقم.. اصلا الولد غيرجع ليهم.. غير غتحرق قلبهم شوية.. كيفما تحرقات هي.. تلاحت تكات فوق سريرها على الله يديها النعاس.. مزال الحال دبا.. خاص حتا ينعس كلشي.. بقات كتقلب حتا عيات.. والو ماجاهاش النعاس.. ناضت هزات تيلي ديالها و بدات كتلعب فيه.. خاصها غير دوز الوقت و صافي... 

هزات راسها شافت فالساعة.. الزوج ديال ليل.. غيكونو نعسو و شبعو نعاس.. ناضت لبسات بسرعة بحال البارح.. غير هاد المرة مهزاتش المونطو.. و لبسات كونفيرس بلا مكيدرش الصوت.. جمعات شعرها على شكل شفنجة و حلات الباب.. خرجات بلا حس غادة مع الكولوار.. وقفات شافت مع جنابها.. مكين حتا واحد.. حلات الباب بشوية و هي كدعي فنفسها ميكون حتا واحد فالغرفة.. طلات و هي تلمح زوج خادمات جالسات و معنزات فريوسهم.. داهم النعاس و هما حاضيين التوأم.. دورات وجهها شافت فالتوأم.. الضلام ماكيبان والو.. قربات كتشوف فيهم.. لابسين بزوج الابيض.. بدات كتفكر نور فين كينعس فاش كدوز عليه مرة مرة.. مدة دقيقتين و هي توقف قدامو.. عاد تفكرات.. قربات ليه بشوية هزاتو.. حطات إيد تحت من خصرو و لاخرة تحت ليكوش.. خشاتو فصدرها و هي كتحاول تخليه ناعس.. رجعات خرجات و سدات وراها الباب..

نزلات بخطوات بطيئة حتا وصلات لبلاصة البارح.. تحدرات حطات الولد فالارض.. و خرجات.. بقات متكية على كرشها و جراتو.. غير خرجاتو وقفات كتسوس فحالتها.. شافت مع جنابها و كملات طريقها.. مخداتش سيارتها هاد المرة.. مشات غير على رجليها حتا وصلات لعندهم.. كانت سيارة سوداء بحال ديال البارح.. غير شافوها خرجو نفس الرجال.. يللا جات تمد ليهم نور.. شافتو حل عينيه.. رجعاتو عندها و هي كتشوف فيه.. بدا كيضحك و كيمد إيدو لعندها.. تصدمات.. معرفات راسها باش تبلات.. بقات كتشوف فالبراءة لي فعويناتو و رجال مراد قدامها كيتسناو.. 

الراجل: (بالانجليزية) مدام.. صافي خاص ناخد الولد..

كنزة : (خنزرات فيه) مشغلكش.. دير خدمتك و تسنا.. (رجعات كتشوف فنور بتردد.. معرفات مادير.. حارت و هي كتشوف فملامحو.. قصحات قلبها عطاتو ليه و هي كتمنا انه يكون راجل فكلمتو و يرجع الولد..

كنزة: تهلاو فيه.. حتا ترجعوه..

الحارس: (هز راسو باه و طلع فالسيارة.. بقات واقفة كتشوف فيهم حتا طلعو فالسيارة و كسيراو.. غمضات عينيها و هي كتفكر فهادشي لي دارت.. حلات عينيها فاش تفكرات راسها فالزنقة فنصاصت الليل.. شافت مع جنابها و دارت كتمشا بسرعة حتا وصلات للرياض و دخلات كيفما خرجات..

صبح صباح جديد.. صباح غيغير مجرى حياتهم مرة خرى.. صباح غيتسبب فجروح كبيرة.. جروح متقدرش تداوى بسرعة.. و يمكن عمرها تداوى...

حلات عينيها بشوية على أشعة الشمس لي داخلة من الشرفة.. فلحظة محساتش على راسها حتا ناضت قافزة.. شافت فنزار كيصلي قدامها كيف عادتو.. حطات إيديها على قلبها لي وللا كيضرب بسرعة مفهمات والو.. حاسا بشي حاجة فداخلها و معارفاش شناهيا.. اصلا ليل كللو و هي كتقلب.. منعساتش فراحتها.. حاسا باحساس خايب... نزلات من فوق السرير و مشات حلات الباب بلا متشوف مع جنابها.. تركيزها كللو فبلاصة وحدة.. خاصها طمن عليهم.. مشات بخطوات متسارعة مباشرة لغرفتهم.. و مع كل خطوة كيزيد خوفها كثر.. حلات الباب.. مبانوش ليها الخادمات.. قربات طلات عليهم.. بقات واقفة مشوكية.. حسات بقلبها تهز من بلاصتو.. ملقاتش قمر.. كاين غير نور.. حبسات راسها باش متسخفش غير بالسيف.. قوات راسها و فكرات بللي معندها قين تمشي.. تقدر تكون مع لالة فاطمة.. هي بنفسها ممتيقاش هادشي.. و لكن خاصها تمسك و لو ببصيص امل صغير.. نزلات جرية وحدة.. مشات نيشان للصالون.. لقات لالة فاطمة و كاميليا جالسات كيهدرو.. 

اكرام : (كتهدر و هي كتلتاقط انفاسها.. بصوت مقطع و كيرجف) دااادا.. داااادااا..

فاطمة : (دارت فزع شافت فيها.. وجهها صفر مشا منو لون.. خلعاتها) اكرام.. مالك ا بنتي.. شني عندك..

اكرام : دادا.. قمر.. قمر معندكش.. مهزيتيهاش..

فاطمة : لا ا بنتي.. مهزيتهاشي.. علاه مالها مكايناشي فبيتها..

اكرام : لا ا دادا.. لا مكيناش.. و حتا الخدامات مكيناتش..

كاميليا: صافي غير تهدني ا اكرام.. غتكون غير معاهم.. 

اكرام : لا.. هما مكينزلو الدراري فين..

فاطمة : تسنا ا بنتي نمشي نشوف.. 

يللا جات تهرج من الصالون.. دارو كاملات فاش سمعو صوت شي حد جاي كيجري.. كانت وحدة من الخادمات.. وقفات قدامهم و هي كترجف.. وجهها ولا زرق بالخلعة..

اكرام : فينها بنتيي.. فينها قمر.. دويي..

الخادمة : لالة.. خليني نشرح ليك..

اكرام : (شنقات عليها بلا متحس.. شداتها من عنقها و لصقاتها مع الحيط و هي كتنفس بقوة و تغوت) قلت ليك فييينها قمر.. فينهااا بنتيي..

الخادمة بقات ساكتة معندها كيفاش تهدر من غير صوت انفاسها لي كيتسمع بقوة.. خنقاتها.. جات كاميليا كتجر فيها.. بصعوبة باش قدرات تبعدها عليها.. طاحت الارض و هي حاطة إيديها على عنقها كتحاول تلتاقط انفاسها.. كلشي لي فدار سمعو الغوات و نزلو بسرعة.. بقاو واقفين و هما ما فاهمين والو.. من غير كنزة لي دارسة السيناريو كامل..

اكرام : (مزالة كتغوت) دوييي.. هدري قبل منقتلك..

نزار : اكرام اش كاين؟! مالك على هاد الحالة..

اكرام : سولها هي.. (كتنعت فالخادمة) ملقيتش قمر فبيتها.. و فاش سولتها مجاوباتش..

نزار : دوي نتي فين هي قمر ...

الخادمة : (كتهدر بصوت متقطع بالبكا و هي كتنخسس.. عينيها فزكو بالدموع) سيدي.. و الله ماعرفت.. داتنا عينينا بزوج.. انا و البنت لي معايا.. موالفين كنتناوبو... و لكن هاد المرة معرفتش اش طرا لينا معقلناش.. او.. (انفاجرات بالبكا) او فالصباح ا سيدي ملقيناهاش..قلبنا الدار كاملة.. قنت بقنت و وااالو...

كلشي تصدم.. نزلات عليهم هدرتها بحال الصاعقة على قلوبهم..

اكرام غير سمعات هدرتها طاحت الارض و هي كتبكي.. كتبكي بحرقة و هي كتنادي "بنتي قمر..".. تخنات عندها آلاء كتحاول تسكتها و تصبرها..

نزار العافية شعلات فيه.. عروقو جبينو و إيدو خرجو.. عينيه ولاو حمرين بكثرة الغضب كينفتو النار.. محسش على راسو حتا شنق على الخادمة..

نزار: كنقسم فمي بالله و طرا لبنتي ادنى حاجة.. حتا غنحفر قبرك بيدي.. لا نتي لا صاحبتك... (لاحها فالأرض بقوة حتا تردخات و تم خارج و هو كيمسح على راسو.. حاس براسو غينفاجر.. لؤي غير شافو خرج تبعو بسرعة.. لقاه غيطلع فسيارتو.. حتا وقفو بصوتو و هو كيناديه..

لؤي: نزار تسنا..

نزار: (ردخ الباب ديال السيارة) شنو؟!..

لؤي: فين غادي بعدا؟!..

نزار: (جمع إيدو على شكل قبضة و ضرب الزاج ديال السيارة حتا تشتت) معرفتش.. معرفتش.. و لكن مغنبقاش مربع إيدي..

لؤي: لي دار هادشي غيكون واحد منا فالدار.. يستحيل شي واحد اقدر ادخل.. 

نزار: اصلا حتا واحد ميقدر لا يدخل و لا يخرج.. كيفاش غتكون خرجات..

لؤي: زعما تكون باقا فالدار.. يستحيل.. حيت الخدم كيدورو فكل قنتة فالصباح.. حتا من المخزن.. راك عارف..

نزار: وي عارف.. و لكن كيفاش خرجات..

لؤي: خاص تهدن هي لولة باش نفكرو كيفاش غنلقاو حل لهادشي.. (هز راسو بانت ليه اكرام خارجة هي و آلاء.. حالتها حالة.. وقفات قدام نزار و شداتو من الكول.. نطقات بصوت جاااف و مقهور)

اكرام : رجع ليا بنتي.. 

نزار تصدم مبقا عارف ميقول.. هز راسو باه و اكتفى فقط بالصمت.. معندو حتا كلمة يقولها.. حيد ليها إيديها بشوية و باسها على راسها كيحاول اطمأنها و هو شاد وجهها بين إيديه..

نزار: غترجع..

طلع فسيارة آخرة.. و تبعو لؤي.. كسيرا بسرعة و هو كيفكر فوعدو.. واش فعلا غترجع..

نمشيو لغرفة خرى فنفس الرياض.. كدور فالغرفة و هي خدامة كتاكل فضفارها.. قفزات فاش سمعات صوت تيلي كيصوني.. قلباتو لقات نيميرو بريفي كيف العادة.. طلعات نفس و جاوبات..

كنزة: الو..

مراد: شفتك جبتي البنت ماشي الولد..

كنزة: غلطت صافي.. بحال بحال اش بغيتيني ندير ليك..

مراد: كنت باغي الوريث.. و لكن حتا البنت كيبقا الواقع ديال غيابها كبير.. (دار ابتسامة جانبية و قطع.. خلاها غتموت بالخلعة لا تفرش.. عارفة مزيااان بللي نزار و لؤي اذكياء.. ماشي اي واحد العب معاهم.. يقدرو فاي لحظة يكشفوها...

نزلو لتحت.. كانت آلاء جالسة جنب اكرام فوق كنابي و هي متكية على كتفها كتبكي.. كاميليا و لالة فاطمة بعاد عليهم شوية واقفين كيتحسرو على حالة اكرام..

كاميليا: عرفتي اش تفكرت.. هاكا طرا لهيام.. نفس السيناريو كيتعاود.. كيفما تخطفات اكرام واحد النهار.. ها بنتها تخطفات ليوم.. كنتمنا غير متكونش نفس النهاية و يلقاوها.. خايفة على اكرام بزاااف..

فاطمة : انشاء الله غيلقاو قمر.. صافي بلاش من هاد الهدرة دبا..

سكتو بزوج فاش شافو الخادمة منزلة نور فيديها و هو كيبكي.. اكرام حسات بقلبها تهز فاش سمعات غواتو.. فلحظة معرفاتش لاش حسات بحالة سمعات صوت قمر.. خنزرات فالخادنة و خداتو.. عنقاتو و خشاتو فصدرها و هي كتبكي.. هي كتبكي و هو كيغوت.. بعداتو شوية و مسحات دموعها.. شافت فآلاء كاميليا و داداها.. و هدرات بصوت باااح..

اكرام : عفاكم غير سيرو.. مبغيتش نشوف الشفقة فعينيكم.. (يللا جات آلاء تهدر.. كملات كلامها) عفااكم.. غير خليوني.. بغيت نبقا بوحدي.. غير مافيا مايطلع..

جبدات البزول و بدات كترضع فنور.. آلاء شافت حتا عيات و ناضت طلعات.. كامليا و لالة فاطمة كذالك.. حتا من الخدم مبقاوش كيدورو جيهتها... سالات رضاعت نور.. و حطاتو حداها كان ناعس.. جمعات رجليها عندها و هي كتفكر فبنتها.. فين غتكون و كيغتكون حالتها دبا.. 

دازت تقريبا شي زوج ساعات و هي على نفس الوضعية متحركاتش.. مقابلة مع الباب حاضية لي داخل و لي خارج و مرة مرة كتقلب تيلي ديالها لا تلقا شي اتصال من نزار... شوية بانت ليها شي خادمة داخلة و فيديها زوج طرود.. واحد كبير شوية و فوقو واحد آخر صغير.. معرفاتش لاش شدها فضول تعرف ديالاش.. واخا كتفكر غير فبنتها.. و لكن حسات بشي حاجة ماشي هي هاديك فيهم..

اكرام : اش داكشي؟!..

الخادمة : لالة غير شي طرود بسميت سي نزار.. لقاهم حارس قدام الباب..

اكرام : حطيهم غير تم..

الخادمة : (هزات راسها باه و حطاتهم فوق الطاولة.. بلا متزيد كلمة وحدة مشات لشغلها) ...

بقات جالسة و مرة مرة كدور عينيها جيهة الطرود.. معارفاش لاش باغا تمشي و تهزهم.. لعنات الشيطان.. ماشي وقتهم دبا.. خاصها تفكر فبنتها و زايدون الطرد ماشي ليها.. بلا متحس لقات راسها مرة خرى كتشوف فيهم.. حتا كتبغي تنوض ليهم و كترجع تراجع.. طلعات نفس قوي و وقفات فاتجاههم.. معندو مايطرا الى شافتو غير تحيد هاد الشك من بالها.. هو راجلها دبا و لي ديالو ديالها.. قربات ليهم و هزاتهم.. حطات الطرد الكبير فالأرض و جلسات فوق الكنابي.. حيدات اللصاق بشوية و لاحتو.. حطات إيديها لي كترعد على الغطاية ديالو.. معرفاش باش عندها احساس خيب من لول.. العرق ولا كيقطر منها و هي كتهز فيها حتا حيداتها.. بلعات ريقها من داكشي لي شافتو قدامها.. حسات ب100 خنجر و خنجر تغرسو فقلبها.. حسات بيه كيتقطع من الداخل.. طاحت الارض و هي مزال شادة الكارطونة الصغيرة.. معرفات تبكي و لا تغوت.. معرفات تنظب و لا تنتاحر.. شي حاجة مكيتصورهاش العقل البشري.. شي حاجة ابليس.. و ميقدرش افكر فيها.. كانت آلاء نازلة باش تشوفها.. و لكن الصدمة كانت اقوى عندها هي التالية.. شهثات بصوت عالي و دارت إيديها على فمها.. محساتش بدموعها حتا نزلو سخان على خدها.. اكرام هزات راسها شافت فيها و ابتاسمات.. ابتسامة وراها اوجاع حتا واحد ميقدر اتصورها.. قربات إيديها لي كلها كترعد و هزاتو بين إيديها.. هزات رأس بنتها.. هزات طرف من قلبها مقطوع.. شداتو بين إيديها و هي كتقيس فوجه بنتها.. فوجه قمر.. قمر.. سماتها هاد السمية حيت هي لي ضوات عليها حياتها.. حياتها لي مبقاش عندها معنى.. قربات راسها ليها و خشاتو فصدرها.. خشاتو بقوة و دموعها نازلين.. قلبها كيتقطع.. شعور مكتحس بيه غير الأم.. الخادمات وقفو من هول المنضر لي شافو.. نزلو دموعهم و هما كيتحسرو على حالها.. تمات نازلة كنزة كتمختر.. وقفات فاش شافتها كتبكي.. آلاء كتبكي و الخدم كيبكيو.. مفهمات والو حتا شافتها حاضنة شي حاجة بيديها.. عرفاتو رأس قمر فاش حطاتو اكرام من إيديها و حلات الطرد لاخر.. شهقات و هي ممصدقاش داكشي لي كتشوف بعينيها.. هو قال ليها غيرجعها كيفما عطاتها ليه.. بلعات ريقها و هي كترجف غير راسها.. اكرام مرجعاتش تصدمات فاش شافت جسم بنتها فالطرد لاخر.. كانت عريانة.. إيديها كتفتف مقاداش توقفها.. و صوت شهقاتها مبقاتش قادرة تكتمو.. فنفس اللحظة دخل لؤي و نزار.. لي بدورهم تصدمو.. ملقاو ميقولو.. نزار قرب ليها كثر و هو ممتيقش عينيه.. ميمكنش تكون هادي بنتو قمر.. لا مخاصوش اتيق هادشي.. اكرام هزات جسم قمر بين إيديها.. مخفاوش عليها آثار ديال الدم لي تحت منها.. ميمكنش.. 

اكرام : اغتاصبوها..

كلشي شاف فيعا و زاد أجهش فالبكاء.. نزار جلس على ركابيه قدامها.. محسش بدموعو حتا نزلو.. كيبقا اب..

مقدرش اقرب منها و لا يقيصها.. حس بقلبو من الداخل كيرجف.. شاف الموتى حتا عيا.. و قتلهم بيديه.. و لكن عمرو حس بهاد الاحساس.. احساس كيقطعو من الداخل.. طفلة صغيرة.. مليها حتا ذنب.. مزال مكملات حتا شهر مقاد.. تموت بهاد الطريقة.. تغتاصب و يتقطع راسها.. ملقا حتا كلمة يواسي بيها اكرام.. هو بنفسو مقادرش يتقبل هادشي.. هو بنفسو حس بضعف كبييير فداخلو.. حس بالعجز.. حاس بيديه مربوطين.. بنتو ميتة قدام عينيه و مقادر ادير والو.. انهار من الداخل ديالو.. كيانو كيتحرق..

اكرام حطات جثة بنتها و وقفات.. بقات راجعة بلور و هي كتحرك راسها بلا.. و تمسح فدموعها..

اكرام : لا.. لا.. لااا هادي ماشي ندبنتي.. ه

بلفين غير اخدعوني و يحرقو قلبي.. (نزلات عينيها فنزار) ياااك ا نزار.. هادي ماشي نتنا.. ياك.. غير كيكدبو علينا.. باغين غير ادمرونا..

نزار : (شاف فيها رجع شاف قدامو و حدر راسو.. معارفش باش اجاوبها.. لؤي فاش شافها هكاك مشا شدها من كتافها من وراها كيحاول يهدأها..)

لؤي: صافي اكرام غير تهدني..

اكرام : (نزلو دموع حارين على خدها.. هدرات هاد المرة بهدوء: عفاك ا لؤي.. قول ليا هادي ماشي بنتي..

لا جواب.. حتا حد ماقدر يهدر.. من غير شهقات الجميع.. لالة فاطمة جلسات فوق الكنابي من هول الصدمة مقاداش حتا تحرك.. كاميليا متكية على الحيط و كتحسر على حفيدتها.. فلحظة غوتات اكرام.. خلاتهم كاملين قفزو.. حتا من نور لي كان ناعس.. فاق و هو كيغوت.. صرخة خرجات من أعماق اعماقها.. صرخة تسمعات فأرجاء الرياض كامل.. صرخة زلزلات كيانهم.. بدات كتندب فوجهها و هي كتغوت.. كتغوت بكلمة وحدة "قمر".. لؤي كان شادها مزيان من إيديها باش متقربهاش من وجهها.. نزار حتا هو وقف كيجري عندها وقف قدامها فاش شافها كضرب راسها مع الحيط.. كتغوت على حر جهدها.. باغا تهرج داكشي لي فداخلها.. و لكن مقدراش.. مزالة كتشوف دم بنتها فيديها.. مزالة صورة بنتها قدام عينيها.. كتغوت و تبكي.. كلشي كيشوف فيها مصدوم.. آلاء هزات نور و خرجات بيه للحديقة كتحاول تسكتو و فنفس الوقت تبعدو على داك الجو.. اما كنزة مقدراتش تبقا واقفة مزال.. ركابيها خواو بيها.. جلسات على الأرض و هي كتشهق.. متصوراتش انها غتكون سبب فجريمة بشعة بحال هادي... بشوية بشوية اكرام بدات كتهدن.. حبسات من الغوات و هي مزال كتبكي و تشهق.. جرها نزار عندو عنقها و خشاها فصدرو.. خلاها كتبكي على راحتها و هو مزير عليها..

نزار : (كيدوز إيدو على شعرها ) شوو.. صافي.. كنواعدك غنرجع حق بنتنا..

اكرام : (بعدات عليه شوية و شافت فيه بعويناتها الدامعين) انا مبغيتكش ترجع ليا حقها.. انا بغيتك ترجعها ليا كاملة.. ياك واعدتيني.. واعدتيني بللي غترجع.. و لكن رجعات غير جثتها..

نزار: (ملقا باش اجاوبها.. رجع خشاها فيه و زير عليها كثر.. بشوية بشوية حس بيها ارخات بين إيديه.. طل عليها لقاها فاقدة الوعي.. تنهد هزها بين إيديه و تم طالع بيها لغرفتها.. نزلات دمعة حارة على عينيه و لكن سرعان ما مسحها.. 

نزل جوزيف مع الدرج بخطوات بطيئة من بعد مخلا اكرام ترتاح فالغرفة.. بالو كامل مع هادشي لي طرا ليوم.. سيناريو كاامل تعاود فدماغو.. لو عرف سبب هاد المصايب يقطعو طراف.. و متبردش النار لي فداخلو.. نزل و هو يلمح لؤي لي كيهدر فتيلي.. لؤي غير شافو نها المكالمة و تم جاي فاتجاهو.. 

لؤي : اتاصلت بالبوليس.. ضروري بالسيف علينا..

نزار: خاصني نعرف شكون.. كنقسم حتا غنخليه يتمنا الموت و ميلقاهش.. 

لؤي : خاص نتأكدو بعدا بللي هادي نفسعا قمر..

نزار: (خنزر فيه بلا مينطق)

لؤي: الدراري الصغار كيتشابهو ا نزار..

نزار: (مسح على راسو و هو حاس براسو غينفاجر) معرفتش.. معرفتش... (مشا بخطوات ثقيلة و بطيئة فنفس الوقت فاتجاه الجثة.. تحنى و جلس على ركابيه قدامها.. مزال مامصدق.. خاصو يعرف حاجة وحدة دبا.. واش هادي بنتو.. واخا متكونش هي قمر نفسها.. فهم راسو كيتعامل مع وحوش بدون ذرة رحمة.. جا لؤي وقف حداه)

لؤي: بلا متقيس شي حاجة.. باش فاش اجيو البزليس يعرفو لخدمتهم..

نزار: (غوت بلا ميحس.. خلا كلشي يقفز بصوتو) لؤي.. راني بكامل قواي العقلية.. عارف راسي اش كندير بلا متوريني..

لؤي: (بقا كيشوف فيه بنظرات غير مفهومين.. بقا على نفس وضعيتو.. متخركش و منطقش.. عارفو باش فيكون حاس دبا.. راه اب.. حتا هو قريب غيولي اب.. عارف احساس شحال صعيب.. كيتمنا فالداخل ديالو متكونش هي قمر.. و لكن القدر لعب لعبتو المسخة مرة خرى.. الاقدار لي كتحكم.. و حتا واحد فيهم مغيقدر ابدل فالواقع شي حاجة...

سرعان مجاو البوليس.. حاوطو المكان و هما كيسولو مختلف الاسئلة على لؤي و نزار.. كانو كيجاوبو ببرود.. عارفين الشرطة معندها فاش تفيدهم باش اعرفو الجاني.. عارفين راسهم كيتعاملو مع مجرم خطير.. مغيفهم ليه غير مجرم بحالو.. استجوبو الجميع تقريبا.. نزار و لؤي غير حاضيينهم.. حاسين بالوقت كيضيع منهم.. بغاو استجوبو حتا اكرام.. بحكم انها هي لي حلات الطرد و هي لولة شافتو.. و لكن اكيد نزار مخلاهمش.. لي فيها كافيها.. مغتكونش عندها الطاقة لأسئلتهم القاسية.. ميقدرش اغامر بيها كثر..

خدات الشرطة الجثة و خرجات.. اكيد خرج معاهم حتا نزار و لؤي باش اتبعو الأمور.. نزار باغي يتأكد فقط من ان الجثة واش جتثة بنتو و لا لا.. فقط لا أكثر.. هادشي لاش مزال صابر للشرطة.. طلع فسيارتو و فجنبو لؤي و هو كيفكر فعالم الاجرام لي خرج منها.. كان كيفكر انه عمرو غيرجع ليه مرة خرى.. و لكن على ما يبدو هاد القرار خاصو يرجع افكر فيه..

وسط غابة كبيييرة.. غابة شاااسعة بأشجار شاامخة.. نباتات و ورود فمختلف الألوان ضايرين بيها من كل جيه.. ضورات عينيها على المكان و هي مفاهمة والو.. بقات غير كدور فعينيها.. عجبها المكان.. خصوصا الفراشات لي كتحوم عليها.. هزات راسها فالسماء الزرقاء الصافية.. و الشمس لي نورها باعث الطمأنينة فنفوس الجميع.. سرعان ماتحولات ابتسامتها لدمعة واقفة فعينيها فاش تفكرات بنتها.. فلذة كبدها.. فلحظة سمعات صوت صراخ.. صراخ طفولي.. بصوت عذب جاي من بعيد.. حسات بقلبها تهز و هي متبعة الصوت و كتبعد النباتات لي حابسين عليها الطريق.. وصلات لواحد الهبطة.. بان ليها من بعيد واد ذو ماء ازرق صااافي.. بقات نازلة و الصوت غادي و كيقرب منها كثر.. وقفات قدام الواد.. و صوت الصراخ و لا كيتسمع فودنها على شكل ضحكات.. دورات وجهها بانت ليها قمر.. اه هادي بنتها قمر.. روحها قمر.. ترسمات ابتسامة على وجهها.. ابتسامة عريضة و هي كتشوفها ناعسة على جدع شجرة و هي كتلعب برجيلاتها الصفيورين و كضحك.. كيفاش وصلات لهنا.. حسات بضربات قلبها بداو كيتسارعو فاش سمعاتها قالت ماما.. اه نطقات.. نطقات و قالت ماما.. مهتماتش فديك اللحظة كيفاش نطقات و هي فهاد السن.. مهتمات لحتا حاجة.. كتشوف فير بنتها قدامها.. بدات كتمشى بخطوات بطيئة فاتجاهها.. و كلها شوق باش تحضن بنتها..

فلحظة تغير لجو من الصافي.. لجو هائج.. ضربات رعدة قوية فالسماء خلاتها تهز راسها.. شافت السما غايمة كتبعث بالحزن.. مهتماتش و رجعات كتكمل طريقها بسرعة هاد المرة.. محساتش حتا بدات قطرات المطر كتساقط.. بقوة كبيييرة.. الواد هاج.. رغم ذلك موقفاتش.. و لكن الاقدار حكمات باش توقفها.. معرفاتش كيفاش لقات الواد حاجز بينهم.. مفهماتش كيفاش امتا و علاش.. قمر بدات كتبكي و تغوت.. هزات اكرام راسها شافتو.. رجل طويل ببنية ضخمة.. لابس كللو الاسود و دلير لثام على وجهو.. ملمحات والو من غير عينيه الخضرين.. بداو دموعها كينزلو بلا متحس فاش شافتو هاز سيف طوييل فيديه و كيهز فيه الفوق.. غوتاااات على حر جهدها باسم بنتها.. صرخة تسمع صداها فالغابة كاملة.. و لكن للأسف كان نزل سيفو حتا طار راسها.....

حلات عينيها و هي قافزة.. كلها كترعد.. دورات عينيها على ارجاء الغرفة و هي كتنادي باسم قمر.. آلاء و كنزة كانو حداها فاش غوتات.. مفهمو والو..

اكرام : قمممر.. قمممر.. قمر.. بنتيييي...

بقات كتغوت بدون شعور.. وقفات و هي مزال كتنادي.. بدات كدور فارجاء الغرفة بلا متسكت.. آلاء و كنزة دوهاتهم بحركاتها.. كنزة محساتش براسها حتا جراتها جلساتها فوق السرير و جلسات جنبها..

كنزة: اكراااام.. صافي تهدني عفاك..

اكرام : بغيت بنتي.. (بداو كينزلو دموعها حارين على خدودعا الحمرين) جيبي ليا بنتي.. قلبي كيتقطع ا كنزة.. جيبو ليااااا بنتيييييي.. (غوتات على حر جهدها و تكات على صدر كنزة و هي كتشهق بصوت عااالي.. دورات إيديها على خصر كنزة و هي خاشية راسها فصدرها و كتنخسس...)

كنزة معرفات راسها باش تبلات.. كانت بحال شي بنوتة صغيرة كتبكي فحضن ماماها.. عنقاتها هي التالية و هي مزال مخرجات من الصمة لي تعرضات ليها.. كيفاش قدرات دير هادشي فبنت صغيرة.. واخا يكون قلبو مصنوع من حجر.. ضحكات على تفكيرها.. هو اصلا معندوش القلب.. حسات بالرجفة فداتها.. شافت فاتجاه الشرفة ضلمات الدنيا.. تنهدات فاش شافت نزار و لؤي داخلين للغرفة.. استغلات الفرصة و ناضت من جنب اكرام بسرعة.. حسات بشعور خيب بزاااف و هي جنبها.. شعور كيقتلها من الداخل... 

نزار و لؤي جاو من مركز الشرطة و معلى وجههم حتا تعبير.. على الأقل تأكدو بللي البنت مكانتش مغتاصبة.. غير دم واصل ليها لتحتها.. واخا هاد الخبر مغيغير حتا حاجة.. و لكن على الاقل ىاه نقطة مزيانة.. مزال حتا لغدا عاد غيقدر اتأكد واش الجثة هي جثة قمر نفسها.. خاص الوقت للتحاليل الطبية...

دخل نزار و جلس جنب اكرام.. عيان بزااااف.. نفسيا و جسديا.. اكرام غير ساكتة و دمعة فطرف عينيها.. ما قدر اقول ليها والو.. مبغاش اخللي ليها امل من لا شيء.. كاينة فرصة انها متكونش بنتهم.. و لكن بنفس النسبة ممكن تكون بنتهم.. مبغاش ازيد حطمها كثر من امل فارغ.. تكا فوق السرير و هو كيدور احداث ليوم فراسو....

كانت كدور فغرفتها.. مغرفة مدير.. حارت وسط افكارها.. هزات مونطوها و نزلات مع الدرج.. خرجات من الدار بلا ميشوف جيهتها حتا واحد.. كلشي كيفكر غير فهادشي لي وقع ليوم... بقات غادة كدور مع الزناقي.. مشات فين موقفة سيارتها.. خرجات الشانطة لي فيها الفلوس نزلاتها و رجعات خرجات.. بقات جاراها و هي كتخيط فالدروبة.. حتا وقفات فنفس البلاصة لي عطات فيها قمر.. بلعات ريقها و هي كتشوف فنفس السيارة مزالة واقفة فبلاصتها.. مشات و دقات عليهم.. نزلو الزاج بشوية.. تصدمو فاش شافوها.. مكانوش متوقعين مجيئها..

الرجل: (بالانجليزية كيف العادة) شنو؟!..

كنزة: بفيت نهدر مع سيدك..

الرجل: حيدي من هنا عفاك..

كنزة: سمع مزيااان.. راك مزال معارفنيش شكون انا.. و وسط اي عائلة كبرت.. نقدر نمحيك من الدنيا فزوج تواني.. متنساش راني شايفة وجهك مزياااان..

الرجل: (شاف فصاحبو و هما كيهدرو فير بالعينين.. هز تيلي دوز لابيل.. هدر معاه هو فلول.. حتا خدا الاذن عاد دوزو ليها..

مراد : مال لالة كنزة معذبة راسها تا لهاد الدرجة..

كنزة : نتا واحد حقيير.. مكتسواش..

مراد: وا شتيي ها تخصار الهدرة دبا..

كنزة: عطيتيني وعد و كلمة راجل انك غترجع قمر.. مكنتش كنظن راسي كنتعامل مع شماتة..

مراد: انا واعدتك غنرجعها.. و رجعتها كيفما قلت.. مواعدتكش بانها غترجع حية ترزق..

كنزة : انا لي غالطة حيت فكرت نتعامل معاك.. مغنزيدش معاك فالهدرة.. فلوسك هاهوما عند رجالك معندي مندير بيهم.. عمري شفتك و عمرك شفتيني.. و صافي..

قطعات و رجعات التيلي للراجل.. مدات ليهم الشانطة و زادت يي😍..

كانت التانية صباحا.. السماء سوداء.. القمر مباينش اليوم.. و حتا النجوم كانت مغطياها الغيوم السوداء.. حتا واحد مقدر اغمض جفن من جفونو.. مقدروش انعمو و لو بتانية قسط من النوم.. نزار كان متكي فوق السرير كيشوف فالسقف و فراسو الف حاجة كيفكر فيها.. الافكار كلها مخربقة فدماغو.. مبقاش عارف الصح من الخطأ... اكرام كانت جالسة فالشرفة.. على الأرض.. جامعة رجليها عندها كتشوف فالسما و الدمعة فطرف عينيها.. فالداخل ديالها كتمنا يبان و لو بصيص صغيير من ضوء القمر.. قلبها كيتقطع.. معالم بحالها غير لي خالقها.. حتا من نور مبقاتش داياها فيه.. ظلماتو واخا ماليه حتا ذنب.. و لكن كاميليا مقدراتش تخليه و جابتو عندها.. خافت يتكرر معاه نفس الشيء لي طرا مع قمر مرة خرى.. ميمكنش ليها تخليه مع الخادمات هاد المرة...

حسات بالعطش.. من الصباح متحطات قطرة الما ففمها.. مقاداش تنوض و لكن شحفة تمكنات منها.. تنهدات و وقفات.. خرجات من الشرفة و مشات فاتجاه الباب.. نزار حاضي كل حركاتها.. غير شافها وقفات قدام الباب ناض جالس..

نزار : فين غادا؟!..

اكرام : بغيت غير نشرب..

نزار: غنمشي معاك..

اكرام : مكين لاش.. صافي..

مخلاتش ليه القرصة فين اجاوبها و خرجات.. بقات غادة مع الممر.. بان ليها الضو ديال مكتب لؤي شاعل و الباب محلول شوية.. مهتماتش للأمر و نزلات للمطبخ.. لقات الخادمات جالسات كل وحدة كيفاش و كيخمو و يتحسرو على الحالة لي وللا فيها هاد الرياض.. غير شافو اكرام وقفو كاملات و هما كيتسناوها غير تنطق باش انفذو..

اكرام : فير سيرو جلسو.. باغا غير نشرب..

دارو كيفما قالت.. مشات هي شربات و رجعات طالعة لغرفتها.. دازت مرة اخرى من قدام المكتب.. هاد المرة سمعات صوت لؤي كيهدر.. معرفاتش لاش جاها احساس بللي الموضوع كيخص قمر.. قربات بشوية و هي كتسمع لهدرتو.. حسات بتوثرو فنبرة صوتو..

لؤي: يوسف.. صاحبي غير عاود تأكد..

يوسف : دور تقود.. راني هدرت.. تاكدت من الفيديو شي ثلاثة المرات.. صافي.. مافيهش الشك نهائيا.. الفيديو ممفبركش.. حقيقي 100%..

لؤي : مغتخسر والو الى رجعتي تاكدتي..

يوسف : واش غتوريني خدمتي.. كوكان مفبرك غنعرفها من المرة لولة.. هادشي كيمشي ليا فالدم..

لؤي: مقادرش نتيق داكشي لاش..

يوسف : (تنهد) اوا اش غدير دبا..

لؤي: معرفتش.. معرفتش.. حاس براسي غنقتلها الى تصرفت دبا..

يوسف : خاص تحكم فاعصابك ا صاحبي.. فكر بشوية و عرف كيفاش تصرف..

لؤي : معرفتش..

يوسف : سير ترتاح دبا.. و انا غدا غنجي عندكم.. 

لؤي: بسلامة..

قطع معاها و هو مزال كيفكر.. مبقاش ولا ادنى شك فصحة الفيديو.. و لكن عقلو الباطني مباغيش اصدق هادشي...

طلع البيسي و دخل مباشرة عاود خدم الفيديو.. تكا على الكرسي و دار إيدو ورا عنقو.. بدا كيعاود فالقيديو و معلى بالوش بالعنين لي مراقبينو من ورا الباب.. كان الفيديو على كنزة.. فاش كانت كتافق مع مراد على خطف نور.. فيه كلشي.. كل كلمة دازت بينهم تسجلات.. كان كيبان غير شوية من وجه كنزة بحكم الظلام و لكن عرفو كيفاش يخليو شوية النور عليها.. لؤي حاس براسو غينفاجر.. حابس راسو بالسيف باش مينوضش يقتلها و يشرب من دمها...

اكرام دارت إيديها على فمها و دموعها نازلين شلال من عينيها.. ممتيقاش بللي ختها لي دارت فيها هككا.. ختها لي حطماتها و دمراتها.. هي لي قتلات روحها من الداخل.. محساتش على راسها الا و هي قدام غرفة كنزة.. حلات الباب بلا مدق.. ملقاتهاش.. تفكرات بللي دازت عليها فالصالون.. نزلات بسرعة و هي تلمحها جالسة هي و آلاء.. غير شافوها وقفو بزوجات..

كنزة: اكرام مالكي؟!..

اكرام بقات كتشوف فيها بنظرات كلهم حقد.. حسات بحرقة كبيرة فقلبها.. كانت تمنا الموت ولا هاد العذاب لي ولات عايشاها.. كيفاش ختها قدرات تقطع ليها قلبها هككا.. عطاتهم بنتها بلا متبين ولو ابسط حركة ديال الرحمة.. محساتش على راسها حتا لقات راسها جاراها من شعرها و كدي و تجيب فيها.. آلاء مبقات فهمات والو و هي كتشوف فيها دارتها تحتها و هي كتنتف و تغوت.. كتحاول تبرد ولو غير جزء بسيط من الحرقة لي فقلبها..

اكرام : الله العن طبوووون مك يا بنت القحبة.. يلعن الزامل بوووك يا الخانزة.. بنت صغيييييييرة ا غيييباد الله.. مزال مكملات حتا 2 سيمانات مقادين.. واخا تكوني حجر يااا الكلبة.. غير باش درقي وسخك با المسخة.. الزامل لي جا يمسح فيك رجليه..

بقات كتنتف فيها و هي كتعاير و تغوت ربي لي خلقها.. حاسا براسها ضعيفة بزااااف من الداخل.. كنزة حتا هي كانت كتغوت و تبكي و هي كتحس بشعرها كيتقطع و جلدة راسها غطير.. كلشي نزل فاش سمعو غواتهم.. مفاهمين والو.. الا لؤي غير سمع هدرة اكرام فهم بللي شافت الفيديو.. واها معرفش كيفاش.. مكانش عندو الدماغ لي يفكر حتا فجواب هاد السؤال... بقات اكرام فوقها و ناضت و هي كتلهت.. مناضت حتا بردات هوايشها.. حاسا بنار حارقة شاعلة فيها.. الجنون كينقزو فوق راسها..

كنزة شادة فشعرها و هي كتبكي..

فاطمة : (مشات عند كنزة كتجري) ويلي بنتي.. شني عملتي.. هبلتي و لا..

اكرام : (كتغوت) خليييها.. خليييييها.. تستاهل مااا كثر.. هادشي كامل و ميبردش النار لي فقلبي.. 

كاميليا : بنتي غير شرحي لينا شنو واقع..

اكرام : (شافت فلؤي لي داير ادو فجيابو و متكي على الحيط) سولوه هو يجاوبكم.. 

كلشي بدا كيشوف فلؤي كيتسناوه ينطق.. تنهد بصوت مسموع و هدر..

لؤي: كنزة هي لي عطات للمافيا قمر.. داتها ليهم بيديها.. و هادشي بفيديو سيفطوه هما نفسهم.. هانتي تفضحتي دبا ا لالة كنزة..

كنزة: (شدات الكنابي و هي كتخاول توقف) هماااجية.. فين تربيتي يا المسخة... انا منااادماش على داكشي لي درت سمعتييي.. تستاهلوو.. كلكم دمرتوني.. (كتشوف فنزار و اكرام) خصووصا نتي ا اكرام.. من نهار دخلتي لحياتنا قلبتي مجراها كامل.. كرهتك قبل ما نشوفك كااااع.. خديتي مني كلشي.. حياتي عائلتي.. راحتي و حتا الشخص لي كنبغي.. تستاهلي اي حاجة درتهة فيك.. سمعتييي.. و مكين العاهرة و المسخة قدك.. نسيتي ماضيك و لا شنو..

اكرام : سيري الله اياخد فيك الحق.. اشنو خديت منك.. ااا دوي.. شنو خديت.. فكرتي غير فواحد 8 شهور لي دوزت معاكم ياااك.. هادشي فاش فكرتي.. سنيييين طويلة و انا بعيدة على عائلتي.. فالبرد فاش كنتي نتي فحضن دادا متكية و مدفية راسك بحوايجك لي مارك و كتسناي الخدامات يدورو عليك.. انا كنت كنعس بالجوع بلا عشا.. كنتلوا فمانطة بالية كللي كنتفتف بالبرد.. الى كليت اليوم كنت كنفكر شنو غناكلو غدا.. نتي كلشي كان موفر ليك.. عمرك شي حاجة نقصاتك.. (بداو دموعها كينزلو بلا متحس) كنت باغا نعرف غير شي حاجة على عائلتي.. غير شكون انا.. حيين و لا ميتين.. مكنت عارفة والو.. واش عارفة شحال صعيب هاد الشعور.. و دبا بنتي ماتت.. (طاحت على ركابيها كتبكي و تشهق) قتلتيها بلا حتا ادنى رحمة.. هزيت راسها بين إيدي.. عمري كرهت شي حد و لا حقدت عليه لحد الان.. عمري هزيت فقلبي من جهة اي واحد.. و لكن نتي ماشي غير كرهتك دبا.. وصلت لمستوى مكرهتش نغرس ضفاري فقلبك و نجبدو ليك بيديا.. حرام عليك... حراااااام علييييك.. عمري نسامحك.. لا دنيا لا آخرة..

سكتات و هي مزال كتشهق و تنخسس.. الجناوى كيقطعو فيها من الداخل..

كان واقف متكي على الحيط و النار شاعلة فيه.. مكرهش يقتلها و يشرب من دمها.. جمع إيديه على شكل قبضة و تم غادي فاتجاهها.. غير شافتو جاي عندها بدات كترجع بلور.. خلعها بنظراتو و عينيه لي كينفتو النار.. شوفاتو مكيبشروش بالخير نهااائيا.. بقات راجعة حتا لصقات على الحيط.. هز إيدبه و حطها على عنقها كيدوزها بشوية.. خلاها حتا ترخات معاه و نسات راسها.. ملامحو جامدة مكدل على ادنى تعبير.. فلحظة زير إيديه على عنقها حتا خنقها.. بقا ملصقها على الحيط و هو كيطلع فيها حتا مبقاتش لامسات رجليها الارض.. حطات إيديها على عنقو و هي كتحاول تفك راسها من بين إيدبه.. كان خاكمها مزيان بقبضة قوى منها.. 

نزار: شنو ندير فيك دبا؟!..

كنزة معندهاش الطاقة باش تجاوبو.. كانت كتشوف غير فلؤي شوفات ترجي باخلصها من بين ادين نزار.. و لكن بدون فائدة.. لؤي متحركش.. حاسا بيه غيقتلها.. شافت الموت قدام عينيها.. كان بحال شي وحش.. ممخدمش عقلو.. حيد إيديه على عنقها بشوية.. طاحت الارض و هي شادة فعنقها كتحاول تسترجع انفاسها و كتكح.. نزل جوزيف تا لمستواها جرها من شعرها و همس فودنها..

نزار: درت غير بصداقتي مع خوك.. اما كنت غنوريك المعنى الحقيقي ديال العذاب..

لؤي كان غير واقف بدون ادنى حركة.. على وجهو برود مستفز.. عكس الداخل ديالو.. حاس براسو باغي يقتلها.. باغي يقطع راسها.. ياريتو قتلتها حسن ميشوف هاد النهار.. لالة فاطمة قطعات ليها فقلبها بغات تمشي عندها و هو يجي لؤي بخطواتو الثقيلة كيف عادتو.. دار ليها اشارة باش توقف و متكملش طريقها.. وقف قدام كنزة و هو مزال داير اديه فجيابو..

لؤي: تهزي..

بقات كتشوف فيه بعينين دامعين بلا متنطق..

لؤي: (من تحت سنانو) قلت تهزييي..

شدات فالحيط بلا هواها و حاولات توقف.. واخا مقاداش.. و لكن بالسيف عليها.. و اكرام مزالة فبلاصتها طايحة فالارض و كتبكي.. شاف فيها كيفاش مدمرة.. كلها كترجف.. متستاهلش هادشي فحياتها.. شد كنزة من دراعها بقوة و تم مخرجها معاه.. دار شاف فنزار بمعنى تبعني... 

جرها خارج بيها و هي كتبكي و كتهدر بصوت مخنوق..

كنزة : لؤي عفاك.. و الله ما درت معاه على انه يقتلها.. قالي غير يحطفها كنقسم ليك.. لؤؤي.. لؤي..

خرج بيها الحديقة بلا مينطق طلق منها بقوة حتا كانت غطيح.. شدات فراسها فاخر لحظة..

لؤي: (بنبرو حادة) شفتي وجهو؟!..

كنزة : كنقسم ليك ا لؤي ما كنت عارفة عفااك....

لؤي: (قاطعها قبل متكمل و هو كيغوت) سولتك جاوبي.. بلا زيادة.. واش شفتيه؟؟..

نزار جا و وقف حداهم.. دار ايدو فجيابو و هو كيتسناها تهضر..

كنزة : (بلعات ريقها بصعوبة) لا مشفتوش..

آلاء حتا هي تبعاتهم و وقفات جنب لؤي و الصدمة مزال واضحة على ملامحها..

لؤي: شفتي فيه شي حاجة كتميزو.. اي حاجة..

كنزة: (هزات راسها باه و هي كتمسح فدموعها.. كتهدر و تنخصص) اه.. عينيه.. عينيه فواحد الخضر.. وااضح و كليير.. قدرت نشوف غير عينيه فداك الضلام.. و عاد إيديه لي كلها وشام..

آلاء كانت حداهم غير سمعات هدرتها حسات بقلبها تهز و فبالها 100 فكرة و فكرة كدي و تجيب فيها.. زعما ممكن اكون نفس الشخص.. حدرات راسها و هي كتفكر احداث ديك الليلة المشؤومة..

لؤي: صافي هادشي لي شفتي..

كنزة : هزات راسها باه..

لؤي: يللا خرجي برا..

كنزة : كيفاش.. شنو كتقول؟!.. (هزات راسها بانت ليها لالة فاطمة جايا كتجري عندهم حالتها حالة.. هازة قفطانها.. و هي كتبكي)

لؤي : راني هدرت.. خرجيي برا.. و بلا متعولي تشوفي فالكونط ديالك.. غدا غيتسد.. 

كنزة : كيفاش.. واش عارف راسك شكتقول.. متقدرش دير هكا.. 

لؤي: نقدر.. و غتشوفي على عينيك.. فلوسك را كلنا عارفين مزيااان خسرتيهم فامريكا.. (فلحظة تحول ملامحو من ملامح هاديين لوحش عروقو خارجين و وجهو حمر.. غوت حتا خلا كلشي قفز) يللا خرجييي برا منعاودش نشوف وجهك مرة خرى..

فاطمة : (قربات ليه و شداتو من إيديه و هي كتبكي) لا ا ولدي.. متءدرشي دير هايدا.. راها ختك.. فين غتخرج فهاد الليل.. عفا ولدي لما رجع فكر.. خللي غير لغدا و شوف اش دير.. الله ارضي على ولدي.. 

سكتات و هي كتشهق.. حاطة اديها على فمها و كتبكي بحرقة.. كتشوف فعائلتها كدمر قدامها و مقادرة دير والو.. ايديها مربوطين.. لؤي حيد اديها لي على اديه و هدر بصوت قاصح كيدل على ان صبرو نفذ..

لؤي: هادا كللو بسبابك ا دادا.. نتي لي فششتيها لدرجة ولات باغا كلشي ليها.. و دبا جا وقت تحمل نتائج اخطاءها.. حتا اكرام ختي.. متنسايش هادشي.. حبست راسي باش منقتلهاش غير على ود ام جمعاتنا.. راها تحت القبر دبا.. (دار شاف فكنزة لي واقفة و دموعها شلال من عينيها.. هدر بصوت خلاها تقفز من بلاصتها) مغنعاودش هدرتي 100 مرة.. خرجيي بحالك.. يللا تحركي قودي عليا من هنا.. 

(بلعات كنزة ريقها و دارت خرجات.. كتسمع فصوت بكا و شهقات لالة فاطمة لي طايحة فالارض و كتزيد توجع.. حاسا براسها غتخنق.. خرجات من رياض و هي كدور فالشوارع معارفة راسها فين تمشي ولا فين تحط راسها)

لؤي دار شاف فلالة فاطمة ملقا ميقول ليها مزال.. تنهد بصوت مسموع و هو كيمسح على راسو..

لؤي: آلاء تبعيني..

لا رد.. كانت ساهية و كتشوف فالارض.. و دماغها مشغول فبلاصة خرى.. هاد المرة غوت..

لؤي: آلااااء..

آلاء : (قفزات) ااا.. ءءء.. نعام.. 

لؤي: قلت تبعيني..

آلاء : خاص نهدر معاك..

نزار شاف فيهم.. دار ايديه فجيابو و تم راجع للداخل.. حتا وقفاتو آلاء بصوتها..

آلاء : الموضوع كيخص هادشي..

نزار رجع زوج خطوات و هو كيتسناها تهدر.. لؤي حتا هو ركز معاها..

آلاء : (بلعات ريقها) احم.. حتا لي كان خاطفني.. (سكتات شوية و هي كتسترجع احداث ديك الليلة.. نزلات دمعة من عينيها و لكن دغيا مسحاتها) حتا هو بنفس هاد المواصفات.. عينيه خضرين.. عمري نساهم خضر كلييير.. و.. و إيديه كلها وشام.. يعني ممكن اكون نفس الشخص؟!..

لؤي: علاش مقلتيش هادشي من قبل..

آلاء : مجابتهاش الفرصة و صافي..

نزار: إذن هو نفسو لي قتل ياسر.. هادا ماشي اي واحد.. خاص نعرفو قصتو.. و كنقسم حتا ندفنو حي..

فاطمة جنبهم كتسمع و كدورها فدماغها.. خايفة من داكشي لي فبالها يكون صحيح.. بلعات ريقها و دموعها مزال مقادرة تحبسهم..

نرجعو للداخل.. كانت طايحة فالارض كتبكي بحرقة و كاميليا جنبها.. حاسا بقلبها كيتقطع طراف.. تموت و متشوفش هاد النهار.. مكرهاتش تمشي تقتلها و تقطع راسها بيديها.. واخا مغتقدرش تبرد النار لي شاعلة داخلها.. 

كاميليا : را حرام ا بنتي هادشي لي كدير فيه.. را غتقتلي راسك هككا.. متاكلي متشربي.. غتموتي قبل الوقت.. 

اكرام : اااش بغيتيني ندير.... را بنتي هادييييك.. الله يا ربي و ختييي لي غدراتني.. ختيييي لي قتلاتني..... الله اياخد فيها الحق... بغيتها عمرها ضحككك مزال.. حرااام عليها.... و الله حتااا حرااااام.... كرهتها و الله حتاا كرهتهاااا..